و… تتمحّن في البعير القدامك دا

صناعة النجم.. اقصد بالنجم نجم في كل مناحي الحياة العامة سياسي، مطرب، رجل أعمال، إعلامي، رياضي.. صناعة النجم علم. وبتدرس وعندها قواعدها.. وتعتمد علي جوانب كتيرة.. أهمها الإعلام.. منها التدريب علي السلوك الإيجابي طريقة الكلام طريقة المشي طريقة الأكل حتى شراب الموية وشراب الشاي يعني ما ممكن واحد نجم ومشهور يقعد يشفط في الشاي” ويييييط.. ويييييييط”.. في ناس بيقرفو من الحركة دي بالتالي ترسخ في ذهنو.. اول ما يجي الفنان النجم يغني ويفتح خشمو ويقول “يا حبيبي ووووووووين”.. دا هنا طوالي يستدعي إلى مخيلتو “ويييييييييط ويييييييييط” بتاعة شراب الشاي.. وشوية وشوية يكجن النجم دا.. النجم بيكون تحت المراقبة من كل الناس.. أي زول داير يشوفو.. وداير يشوفو في أحسن وضع ممكن.. وخصوصا لو كان مطرب.. الإعلام فعلا مهم للترويج وتسويق اي نجم.. لكن أحيانا مع الشتارة والخرمجة قد يكون الإعلام خصما علي النجم.. “وقد يستغل خبثاء الإعلام أسوأ أوضاع وحالات النجم والتركيز علي عرضها.. وذلك بغرض اغتيال شخصية النجم” عشان كدا مفروض اي نجم تعرض عليهو المادة المسجلة الح تبث أو تنشر ويشوف نفسو كيفنو فيها ومن حقو يرفضها ويمنع بثها أو نشرها.. يعني ممكن أحد خبثاء الإعلام يركز علي لقطة لي فنان بيتمخت بطرف عمتو حتى لو كان في مناسبة بكا.. ويقعد يردد “إنه الإنسان الذي ينضح إنسانية” ويكرر معاها صورة المخيّت شوية شوية الناس ح تخلي الإنسانية وتركز في نخرين المطرب.. كتير من نجوم المجتمع عندنا يظهرو في القنوات في أوضاع تخجل والله.. وسلوك ما مقبول من المعجبين ونفسية المتلقي.. حتى القعدة في الاستوديو. قعدة شترا.. زول في بيتو ما بيقعدها قدام مرتو ووليداتو.. يجيبوهو متفرجخ.. أو متعنقّل. متعنقل يعني قاعد وركبو في حنكاتو ما بيكون قاصد لكن الكرسي القاعد فيهو يجبرو علي كدي مسكين وهو يكون اصلا من ذوات الرُكب. أو يكون راكب فوق كرسي طويل وكرعيهو مدلدلات ويطوطح فيهن.. أو مشتّح كل كراع في بلد ويهوزز فيها كمان!!

بعض محاولات صناعة النجوم البائسة في السودان تهمل جوانب كتيرة ومهمة.. وتركز علي جانب التكثيف من ظهور النجم أكبر وقت ممكن في وسائل الإعلام.. المهم يظهر لكن كيفنو؟ ما مهم.. لاحظت كتير من محاولات صناعة النجوم. وقدونا بيهم قد.. كل يوم تلقاهو قدامك.. وفي وضع زي الزفت.. ويشهد الله في واحد مطرب كان يتعرض لعملية صناعة فاشلة.. بقيت لما أشوفو أقوم جاري جري من القناة وما أرجع ليها إلا أكون أديتو وقت كافي يكون انكشح فيهو وأرجع تاني.. أو نجم مطرب تكون رقبتو أطول من المقاس المتعارف عليهو.. ويجيبوهو لينا لابس كرفتة كمان.. وتشوفو كأنو جمل ومربوط في رقبتو حبل.. تخلي الغنا وتتمحن في البعير القدامك دا.. هنا اختيار اللبس مهم جدا بيحيث يتماشى وشكل الزول.. ويظهر الأشياء الجميلة فيهو، إن وجدت!!