ربي.. لا تمحنا.. لا تبلينا

إن المناخ والبيئة والطبيعة.. والوراثة.. لها دور كبير في تشكيل شكل الإنسان.. الطول.. لون الشعر.. شكل العيون.. شكل الرأس.. الخشم ..النخرة.. الشلاليف.. الكرعين.. والايدين.. حتى أطراف الأصابع دي.. والضفور شفتوها حتى هي المناخ والبيئة لها دور في تكوينها.. إضافة إلى السلوك الفردي.. تلقى ناس طوالي يقرضو في ضفور ايديهم.. أقل ورطة واللا حيرة ايدو مشت على خشمو وقعد يقطع في ضفور أصابع ايدهو ويتفتف.. وعلماء البايولوجيا مع علماء الفسيولوجيا.. بيقولو أي عضو في الجسم يكون استعمالو كتير بيكبر ويقوى.. وحجمو بيكون أكبر من الطبيعي.. خصوصا النسيج العضلي.. والعكس هو الصحيح.. يعني عضو مهمل ويقل استعمالو بيصغر وحجمو يقل.. في ناس متفلهمين تلقاهم لما ينضمو يرفعو حاجب واحد.. ويخلو التاني .. أها بعد فترة العضلة المسعولة من الحاجب الديمة مرفوع دا بتقوى ويزيد حجمها لاستعمالها الكتير وغير المموسق مع الحاجب التاني… وتلاحظ إنو الحاجب بقى مرتفع أكتر من أخوهو التاني.. عشان تاني يتفلهمو.. الداير يتفلهم ومصر إنو يرفع حواجبيهو في النضم إن ما داير يتعولق اليرفعن الاتنين.. وفي ناس برضو فلهمة منهم تلقاهم بيضحكو بي طرف الخشم اليمين مثلا.. وديل دائما الناس المعتادين يضحكو على الناس.. أها ديل برضو بعد فترة الخشم بيتلوي باليمين.. لأنو العضلة المسعولة من لوي الخشم باليمين بتكبر وتقوى وتجر الخشم لليمين.. وقدر ما يحاولو يعدلوهو تاني ما بتعدل.. يموتو بيهو كدي بس.. وبرضو في الناس المتفلهمين وبينضمو بالانكليزي ويحاولو يحاكو الخواجات.. برضو خشمهم بتعوج.. وبرضو في ناس البيقطعو في الناس ويمدو شلاليفهم على الزول البيقطعو فيهو.. يعني يكون قاعد معاك بدل ما يأشر بيدو.. ياشر بي شلاليفو على الزول الداير يقطع فيهو ويقول ليك (زولك دا).. أها ديل بعد فترة ح يكون عندهم قداديم.. ولما يكبرو ويتقدمو في العمر والعضلات ترخرخ تتحول القداديم لي تلاليش.. ويموت الواحد فيهم وهو متلش.. وبعض من البشر تلقاهو متعود لما ينف يمد شلوفتو الفوقانية.. مع إنو ممكن جدا ينف من غير استعمال لأي شلوفة، لكن برضو ممكن تكون فلهمة.. وأحيانا تكون حيرة ساكت وما عارف يسوي شنو.. يقول بدل ما شلوفتي دي قاعدة ساكت، النشغلها شوية.. المشي والقعدة والوقفة كل حاجة الناس تنتبه ليها.. وإياكم ثم إياكم أن تحاكو الناس.. يعني واحدة تكون معجبة بي ممثلة وللا فنانة .. وتقعد تمشي زيها.. ح تتعولق وعشرين دكتور تجميل ما يقدرو يعدلوها تاني.. وخصوصا لو كانت مؤهلات الممثلة أو الفنانة أعلى منها وهي دايره تحاكيها.. يعني مافي واحدة ضعيفونة ومعصعصة وتكون دايره تحاكي مشية فنانة سمينة.. وحات الله تتعولق عولاق السنين.. وأقل شي يجيها غضروف.. تعرف إمكانياتها وتمشي قدرها.. وتعرف إنو الله قااااااعد.. أعرف إحدى المعصعصات وهي معجبة بفنانة سمينة ربنا رزقها من فضله عليها.. ودي قاعدة تحاكيها في المشي.. تراها حسي اتعولقت وقعدت.. ولما تجي ماشة.. ككو.. ككو بس.. وماشة على كرعيها..!!