قيامة وقايمة نار حمرا

قالوا لينا يوم 21 -12 -2012.. دا يوم القيامة.. الناس استعدت.. من أول الشهر.. المتدين قريشات من زول رجعن ليهو.. والزعلان ومتلوم في زول مشى عافاهو.. وفي ناس لزموا تبروقة الصلاة ما قاموا منها إلا يوم خمسة وعشرين ورجعوا لي سجمهم ورمادهم..

وبعد كم يوم بعد ما اطمنا تب إنو مافي قيامة حسي.. إتلحنا غنية:

اقروا ليها يا الفقرا..

قيامة وقايمة نار حمرا

الغريبة الناس ترقص وتكورك وتزعرد في القيامة القايمة دي.. والفنان المكسر في القيامة دي، لابس نبلة في رقبتو ويغني مبسوط إنو حبيبتو قيامة وقايمة.. ونار حمرا كمان.. حسي زي دي لو شفتها من بعيد في شارع الله دا، ما بخليهو ليها؟.. نحن ناقصين خُلع؟.. كمان يحب ليهو قيامة وقايمة؟

لكن باقي لي دي ونسة منو ساكت.. حسي إن بقت قيامة جد جد.. حيبقى رقيق.. جرية واحدة ويلقوهو يتلفت في نص ناس بوكو حرام.. وهي تكون مبسوطة برضو شبهوها بالقيامة قايلة القيامة سمحة!!!!..

يا اخي شبهها بحمامة، بي جدادة، بأي حاجة تانية غير القيامة، بي وزة ولومها في الدواحة الفي الجنينة “ليه يا الوزة ما بتعومي.. شايفك في الجنينة تحومي”..

الفنانين علي مر تاريخ الغنية السودانية ما طاري لي واحد فيهم شبه حبيبتو بالقيامة.. والزول إن زهجان من زول و داير يداعيهو بيقول ليهو قامت قيامتك..!

في الوقت داك 2012 قالوا القيامة حتقوم لأنو الكرة الأرضية بقت قريبة وفي حافة (الثقب الأسود) الفي الفضاء وحيبلعها.. والدنيا حتجوط.. وكل زول ياكل نارو..!!!.

في الأيام الفاتت برضو علماء الفلك ومعاهم ناس ناسا (وكالة الفضاء الأمريكية) قالوا لينا الشمس حتشرق من الغرب.. ودي زي ماهو معروف عندنا كمسلمين من علامات الساعة.. بعدين ناس الفضاء ديل يهابشو كدي لمن يجيبوها ضقلها يكركب.. ديمة مشلقين فوق ويجيبوا في الاخبار الكعبة.. كان خلونا علي غبانا دا اخير لنا..

آخر خبر من السماء من الجمعية الفلكية بجدة (بقعة ضخمة عبرت قرص الشمس وازداد حجمها بشكل دراماتيكي وأصبحت منذ اليوم كوحش وهي تتجه في طريقها الآن إلى الكرة الأرضية بحسب فلكية جدة هذا اليوم(23/10).

وقالت الجمعية الفلكية في جدة إن هذه البقعة أكبر بقعة تسجل في دورة الشمس الحالية وهي البقعة الشمسية التي حدثت بعد انفجار من نوع “إكس1” ولكنه في ذلك الوقت لم يكن مواجها للأرض.

وأضافت فلكية: جدة منذ ذلك الوقت زاد حجم البقعة بشكل دراماتيكي وصل إلى الضعف وتطورت بشكل ملحوظ والمسألة الآن بحسب الجمعية هي مسألة وقت قبل أن يحدث انفجار شمسي قوي جديد)..

أها شفتو؟؟.. بقعة ماشة علينا.. وانفجار شمشي.. وهيصة جاية فوق الدرب.. ومسألة وقت.. ونحن برضو نقضي باقي الأيام الجاية دي نغني ونرقص:

اقروا ليها يا الفقرا..

قيامة وقايمة نار حمرا

هي لو بتقوم علي الفنان براهو مالو؟.. . دي حتقوم علينا كلنا، لا ايدنا لا كراعنا..!!!!.