تكنـوجنـونـيا

[SIZE=5][JUSTIFY][CENTER][B] تكنـوجنـونـيا [/B][/CENTER]

التكنلوجيا.. أصبحت كل شيء في حياتنا.. وبالتالي ح تغيرنا من راسنا لي كرعينا.. ح تغير من ثقفتنا.. التكنلوجيا ح تغير من سلوكنا الغذائي.. التكنولوجيا تهدد قيّمنا ومثلنا وأخلاقياتنا.. التكنلوجيا ح تغير من أشكالنا وهندامنا.. وونستنا.. التكنولوجيا ح تغير من قناعاتنا الاجتماعية.. يعني بالعربي الفصيح نحن أصبحنا عبيد للتكنولوجيا.. وأصبحت هي المالكة لكل شيء فينا.. مشاعرنا وأحاسيسنا.. حبنا لبعض الكنولوجيا مدخلها نخرتا فيهو.. كرهنا لبعض التكنولوجيا تساعد فيهو.. قطيعتنا وشماراتنا.. كلها تكنولوجيا.. خبثنا ومؤامراتنا كلها تكنولوجيا.. صدقنا “إن اتلقى”.. وكضبنا كلهن تكنولوجيا.. زواجنا سببو التكنلوجيا.. طلاقنا سببو التكنولوجيا.. غايتو بس مخير الله علينا.. ترانا نصوط فيها صغارنا على كبارنا.. نصاحنا على مجانينا.. أناتي علي ضكور.. نسوط وبعد داك الزارعها الله في الحجر تقوم!!

تحدثت قبل ثلاثة أعوام ونيف “رايكم شنو في نيف دي؟”.. قبل ثلاثة أعوام ونيف كتبت عن المخدرات الرقمية.. وهي غير المخدرات النباتية “البنقو.. والماراغوانا مثالا”.. والمخدرات الكيماوية.. “حبوب الهلوسة.. والخرشة مثالا”.. المخدرات الرقمية تعتمد على الكمبيوتر والانترنت.. وتوجد مواقع تروج لها.. وتبيعها.. يبيعو ليك ذبذبات موسيقية مسجلة وتخدرك وتسطلك زي الترتيب “في ضُمة من جربوها”.. وتخليك تعيش في دنيا السطلة.. كانك مسطول بأحد أنواع المخدرات المعروفة.. وتقول المواقع إن كل نوع ليهو عمل محدد هناك نوع للاسترخاء، ونوع للهلوسة، ونوع للنشوة الجنسية.. حتى أنهم أعلنوا عن نوع يقوم مقام الفياغرا!!

في مرضنا وعافيتنا.. التكنولوجيا دخلت بي تقلها.. أبسط شيء لو داير تفحص سكري هناك جهاز رقمي صغيروني تشيلو في جيبك يفحص ليك السكري.. تمسكو تفحص مرتين ما تصدق.. في التالتة يقررررب يزهج منك ويقول لك “يا زول خلي الطرطشة وامشي شوف ليك دواء ينفعك.. قلنا ليك سكرك أربعمية”.. وإن طنشتو وفحصت.. في المرة الرابعة يهددك “يا زول، سعيلي الله ما تخلي البتسوي فيهو دا..علا اقع في الواطا دي وادشدش حتة حتة”!!

برضوعن طريق التكنلوجيا ممكن تختار(ي) شريك حياتك.. برامج كمبيوتر كتيرة تديها المواصفات العاوزها في شريك حياتك وتديها مواصفاتك انت بس خليك امين وما تحاول تكضب عشان تلقى (شبهك ويبقى الله ما قبحك).. تطلعو ليك.. لكن المصيبة تديها مواصفاتك بالضبط ويجيك الرد “نأسف النوع البيشبهك وبينفع معاك دا، انقرض زمااااااااااان”.. أها بعد داك تسكت ساكت وتعرس اي حاجة تلاقيك من سُكات.. وبدون نقنقة!!

أما في آخر أخبار التكنولوجيا ومحنها “ظهر مؤخرا تطبيق لأحدث هواتف آيفون وأجهزة آيباد يمكنه توقع الموعد المحتمل لوفاة مستخدمه، بناء على المعلومات التي يقدمها عن نفسه وعن نمط حياته”.

عليكم الله ما تغشوهو…

لكن خايف الواحد يديهو المعلومات صاح.. يطلعو ميت قبال عشرة سنوات.. ويكتب ليهو في شاشة الموبايل (امشي يا بعاتي)!!

طولة العمر إن شاء الله:-

فعيونُكِ خيلٌ جامحةٌ

تغزُوا الصحراء وترميني

وجبينُكِ كنزٌ مرصودٌ

وجفونُكِ نصلةُ سكّينِ

وشفاهُكِ خمرٌ لو عُصِرتْ

ذابَ العنقودُ على التّين

وبصدرِك عطرٌ يُرجعُني

لأراهقَ بعدَ التسعِينِ!!

[/SIZE][/JUSTIFY] د. عادل الصادق مكي
الباب البجيب الريح- صحيفة اليوم التالي