رسالة لزول وهم!

بدءاً.. أحييك يا وهم… زمن ما تلاقينا.. لعل المانع خير.. قالوا مشغول.. مشغول دي علينا.. امانة أنك بالجد وهم.. جيتك في البيت.. لقيت خالتي «سكينة» سألتها منك قالت عامل مهم.. متين يا زول الأهمية.. أنت ما ياك الزول القبيل بعد الفول بسف الطحنية.. اشتقنا نعرف عنك حاجة.. قالوا كل يوم في بلد.. بالله كيف حتيت الجالوص وجبتو أرضي ورفعت ذات العماد.. «أجي سنة واحدة تعمل دا كلو.. يا ابن خالتي».. وأنت عارف انك ما قدر دا ولا عندك شهادة كدا ولا فهم ولا فلاحة.. الموضوع شنو يا زول نقول أقسام.. بري ما أظنها.. دا قلع عديل.. بس عليك الله خلي الوهم بتاع الأهمية.. مشتاقين نشوف الحاصل شنو.. لكن بالجد بعد الحصل ليك أنا تاني ما بعذب محمد ولا أحمد أولادي على القراية والمذاكرة.. شوف ناس صابر الكانوا أوائل المدارس هسه سواقين ركشات وبياعين اسكراتشات.. اريتهم بحالك.. بس عليك الله ورينا الوصفة السحرية.. لأنو الحاسدين قالوا الشغلانة فيها غسيل ولا دخان ولا حقن.. أها يا وهم شغلانتك شنو بالضبط؟.

٭ الرد.. شفاتة ساي!

شكراً استلمت ردك على السؤال.. وكتر خيرك على المطايبة.. لكن بالجد ما قدرنا نفهم أكتر من أنك بقيت زول شفاتي.. بس خلينا أي حاجة شفاتي دي «حلال ولا حرام» عشان أنت عارف أبو محمد جنو يسأل من الحتة دي.. وقالوا الزول البتكلم كتير عنها وعن غيرها أكيد عندو مآخذ.. لأني بديت أفكر اخليهو يجي يتعلم منك الشفاتة.. ما لقينا من تشدده إلا الوجع والانحسار وترانا «يا ابن خالتي» لسه من بيت إيجار لبيت إيجار.. ردك الظريف خلانا نتأكد انك ما زلت ياكا الزول المحبوب دا.. نذكرك بالخير وأيام كت انت ابوالعيال بتملحوا مع راجل أم سلمة جارتنا.. «الله يرحمه».. المهم يا اخوي بعد الكلام دا كلو النجيك للنجيضة اكان ابونا ما عرف الشفاتة نشوف الاولاد.. عنها الجامعات والأحلام والفلسفة أو على الأصح «العلم ملحوق» والجامعات راقدة وما يظلمك إلا قرشك.. والعلم بقى بالقروش.. المهم يا زول اسمعني جاي.. نحن مرقنا للشفاتة تب ويانا ليها وهي لينا.

٭ آخر الكلام!

..رسلنا ورديتوا.. الله يديم الود.. أها خلونا في بالكم.. وما نكتر عليكم النقة.. نقول قربنا نرحل من بيت الإيجار للملك الحر.. أسمنت وطوب وسيخ.. «أها نلملم حاجات الوليدات».. نبقى مارقين.. «نعمل مورينقا».
[/JUSTIFY] [LEFT]مع محبتي للجميع[/LEFT]

سياج – آخر لحظة
[email]fadwamusa8@hotmail.com[/email]