كوش نيوز .. أخبار السودان بين يديك

شوكة حوت.. لا بتتبلع لا بتفوت



شارك الموضوع :

[JUSTIFY]

شوكة حوت.. لا بتتبلع لا بتفوت

“بير طويل (بئر طويل) منطقة صغيرة المساحة تعرف أيضا باسم مثلث بارتازوجا تقع بين مصر والسودان خالية من الموارد، ترفض الدولتين المطالبة بالمنطقة أملاً في ضم مثلث حلايب وشلاتين المتنازع عليه” بير طويل دي لصق حلايب من الجهة الجنوبية الغربية.. النضم دا واضح؟.. يعني دي واطا ما عندها سيد.. لا السودان ولا مصر.. وقاعدة جنب شوكة الحوت اللا بتتبلع لا بتفوت (شوكة الحوت حلاليب) من سنة ستة وخمسين واقفة لنا وواقفة للمصرين في حلوقنا.. لا دايرة تتبلع لنا ولا دايرة تتبلع لهم.. ترانا نتلاوى فيها، ناخد صنة، ولما واحد يزعل من التاني يحدرو ويجرها عليهو ويقول ليهو “اديني حلايبي”!!

قريت نضم انو خواجة امريكي اسمو (جرميا هيتُن).. من بلد اسمها (ابنجدون) في ولاية فريجينا.. في الولايات المتحدة الأمريكية.. عندو بنيتو عمرها سبعة سنوات مدلعة فوقو دلع شديد.. قالت ليهو “يابا في عيد ميلادي نفسي ابقى اميرة في مملكة حقتي”.. ونسة شُفع.. الابو قال لها “ليكي علي تبقي اميرة”.. قوم كوس وكوس.. ولم في بير طويل دي.. وتعال وارفع فيها علم من عندو.. علم حقو براااهو.. وعين بنيتو أميرة (مملكة شمال السودان).. ال هي بير طويل.. وقالو أصدر عملة.. وقال داير يكلم مصر والسودان طالما هم ما دايرين الواطا دي هو دايرها.. وح يكلم منظمة الوحدة الافريقية.. وقال ح يحول المملكة دي الي جنة وح يزرع فيها.. والعجيبة لو ظهر ليهو فيها بترول.. وأصلها ما بتخلا من دهب! المحيريني الزول دا، لقى الواطا دي كيفن؟ من أمريكا يجي ويقعد فيها؟ وعارف قصتها، وأنها ما عندها وجيع ومافي دولة مطالبة بيها!! فكرت قلت دا لو انا وحدستني نفسي ومشيت هناك وسويتها ما مملكة سويتها عمودية وعينت بنيتي (عمدة).. أول يوم أصبح فيها وقبال ما أقول بسم الله الرحمن الرحيم.. أعاين القى لي وليد واقف وشايل دفتر ويكورك لي، اصل عندو يفتح الدفتر ويقول لي “دايرين حق النفايات”!! يا ناس هوي اللمريكي دا الحقوهو قبال يتقدّم كتير.. وحات الله يلحق يتوكّر فيها.. ويجيب عقاب اهلو الفي أمريكا ويملوها ليكم أمريكان ست.. تاني إن نهرتوهو ساكت تنشبك فيكم امريكا ويحلكم الله.. وخايفو حسي يكون وقّع معاها اتفاقية دفاع مشترك.. أها كيف الشورة؟ والنصيبة الأكبر يكون وقّع برضو اتفاقية مع إسرائيل.. ويقول لكم داير موية من النيل.. أصلو البحر دا قاعد كل سنة يغرقكم ويبشتنكم ويبهدلكم.. وعيب منكم ناس جيرانكم يموتو من العطش وانتو تموتو من الغراق.. بير طويل منطقة عبابدة، يسكنها اللمريكي دا والعبابدة ح يبقو هنود حمر (ويييييي.. ويييييييي)، غندور الحق ناسك!! الحقوهو مادام خبر باكنها قطعا يلقى طريقة يسجلها باسمو.. دي ما ح تبقى شوكة حوت زي حلايب.. دي ح تبقى ليكم حوووتة بي حااااااالا.. وقيل تمساح عشاري و(سدّر حبس الفجج)!

[/JUSTIFY]
د. عادل الصادق مكي
الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.