راديو “دبنقا”.. دردقي بشيش

قالو لكم دنيا دبنقا دردقي بشيش.. يعني براحة وبي حرفنة.. وبلا شلهتة.. وبتخطيط ومسايسة.. اندهشت جدا لتصريحات ونضم وزير الإعلام في البرلمان كما ورد في الوسائل الإعلامية.. مرة يقول إنو غلبهم تب يشوشو على راديو (دبنقا).. ومرة في إنهم قاعدين بتفاوضو مع ناس النايل سات عشان يشوشو عليهو.. أفو يا سيادتك رويدي قدر دا يوقفكم على فرد كراع؟.. بعد ما قال إنو راديو (دبنقا) يوجه رسالتو لمواطني دارفور.. ويمدهم بمعلومات مغلوطة ويحرضهم.. نضمك صح معلوماتو كلها غلط في غلط.. علا يا سيادتك راديو (دبنقا) استماعو عالي جدا.. ومعظم الشعب السوداني بقى يسمعو.. وبعد جوطتكم فيهو دي ونضمكم الكتير عنو روجتو ليهو مجااااااني وعلى حساب الدولة!!.. كان تسكتو وتسوو الدايرين تسوهو.. انتو الغتاتة نسيتوها واللا شنو؟.. من غير جوطة وهرجة.. ومن غير ما تورو ناس أصلا ما كانو عارفين في حاجة اسمها راديو (دبنقا).. بقو يكوسو ليهو ودايرين يسمعوهو ويشوفو الرويدي الجهجه الناس دي وين.!؟ وبيقول في شنو؟.. سيادتك القصة ما قصة تشويش ومساككة للرادي.. القصة قصة إعلامكم.. قنوات مالية الدش وما عندها طعم.. شغلها كلو.. غنا ورقيص أشتر.. وإعلانات ومحاولة صناعة نجوم يدفرو فيهم دفيّر.. وبرامج فطيرة حتى البرامج الحوارية تشككنا من طريقة التقديم غير الذكية تشككنا بأنو معد ومقدم البرنامج متفق مع الضيف المسعول الكبير قبل الحلقة.. (سيادتك نحن ح نعصر عليك شوية علا خسمتك بالرسول ما تزعل مننا).. يرد الضيف (يا زول أعصر علا ما تعصر بالحيل).. ويجو وكأنه العصر حاصل، مصيبة هؤلاء القوم أنهم مستهونين ذكاء المتلقي السوداني وإنو كاشف اللعب من أولو… أو برامج ممجوجة لمشغولية الناس واستغلال الحاجة والفقر.. دفار مليان بتوجازات و(قرقراب) وحايم يوزع فيها.. وخوفي مع الغلاء الحاصل دا بعد شوية بدل البتوجازات يوزعو كباريت!!.. إعلام طاااااارد… مافي زول بيقعد يعاين فيهو أو يسمعو إلا ويحلف تاني ما يجي بي عندو.. واليسألوهو كلو يقول مافي إمكانيات مادية؟.. مافي إمكانيات مادية؟.. وأكتر من 6 قنوات تسوط فينا؟.. دي شغالة بشنو؟.. تاني بقولها لملمو القنوات دي في قناة واحدة وجودو جودو الشغل!!.. بعدين قول ربنا وفقكم وشوشتو على (دبنقا).. أها ح تشوشو على العربية؟.. واللا على (البي بي سي)..؟ واللا على الفرنسية 24؟.. واللا على القنوات المصرية؟.. واللائحة تطول.. سيادتك إنتو محتاجين لإعلام موازي وقوي.!!

الأعمار بيد الله:

قال مقدم البرنامج اللايوق وشليق للمطربة المعروفة في الحلقة الأولى من برنامجه قبل (26) سنة.. قال لها: معليش يا أستاذة عمرك كم سنة.؟ ردت عليهو وهي تبتسم: (عمري أربعة وعشرين سنة.. ما تشوفني كدي أنا صغيرة خلي بالك).. ثم دارت الأيام ونفس مقدم البرنامج الشليق ونفس المطربة ونفس السوعال بعد 26 سنة.. ردت: ( أجي يا أخواني.. أجي أجي.. زماااااااااااااااااااااااااااااااااااااااااااااااان إنت ما سألتني وقلت لك 24 سنة!!.. إنت ظانيتك كبرت وبقيت تنسى؟).!!