د/ عادل الصادق المكي

حفرة الدخان.. الدكة


[JUSTIFY]
حفرة الدخان.. الدكة

أمونة جات تتكا من السرير للدكة.. مقطع من غنية قديمة.. تُغنى في السهلة في الأعراس.. ترقص على أنغامها أمونة وأخواتها.. أمونة اسم الدلع لي آمنة.. يعني زي زينوبة اسم دلع لي زينب.. وتطور اسم دلع زينب من زينوبة.. إلى زوبا.. وهو تطور طبيعي مع تطور المجتمع.. الذي يحتم أن يتطور اسم دلع زينب.. عشة عشوشة (وعشوشة يقولون إنها هي مرة ود أبرق).. الدكة هي حفرة الدخان.. تتكون حفرة الدخان من حفرة وبداخل الحفرة نص قُلة(القُلة بت الزير).. مثبتة في الحفرة.. هاجرت حفرة الدخان مع السودانيين في هجرتهم.. في الخليج استعاضت المتدخنات عن الحفرة بعلبة حليب النيدو الكبيرة الفاضية.. ثم فكر المخترعون والمستثمرون في أن يعملوا دكة متحركة من الخشب (موبايل دكة).. الدخان معروف لكل من هبا ودبا.. وما محتاج لشرح.. تسمى الجلسة الواحدة في حفرة الدخان باللمة أو الغملة (البوخة).. كانت طقوس الدخان أن تتلما نساء الحلة المتزوجات في جلسة دخان.. كل واحدة تاخد ليها لمة.. (في أحد أسواق أطراف العاصمة توجد محلات دخان قدر ظروفك.. الحساب بالبوخة.. البوخة بي خمسة جنيهات.. أرخص من الشيشة.. مش؟).. الدخان يعتبر حمام بخار أو ساونا.. يجلي الجسم ويصبح نضرا.. الشاف والطلح.. هما وقود الدخان زي البنزين والجازولين.. الفرق إنو لو سعر البنزين زاد الناس بتطلع الشارع وتحتج.. لكن لو زاد سعر الطلح كلو زول ماسك خشمو عليهو وما بيقول بغم.. (يكونو مالم يا ربي؟).. أنا لو بكان وزير المالية أخلي البنزين في سعرو.. وأزيد الطلح.. وأخلي جالون الطلح بتلاتين جنيه.. شوف كان في زول يفتح خشمو؟.. كانت العروس تحجز للدخان مدة أقلها شهر.. يدسوها عشان يدخنوها.. ويسمنوها (يتم التسمين بي علوق المواصة).. وما في زول بيشوفها إلا ذوات الحظ العظيم من قريباتها وصويحباتها من النساء.. أما الرجال لو كتبوها لي واحد في روشتة ما بيشوفها.. يدخنوها ثم تعمل السكاكين أو ما شابه في الجسم ويخرطو كل الكدوب والخلايا الميتة.. وبعد مدة الدس المحددة تلقى (الجيران اتخلعو).. من السماحة البقت على العروس.. أدوات الدخان بالإضافة إلى الدكة.. شملة والشملة هي ما تتشملم به المتدخنة.. وتتلفا بيهو وتتغمل في داخله.. والنطع.. وهو برش مستدير الشكل مخروم من النص.. خرم في حجم حفرة الدخان.. ويوضع في الحفرة.. ما زالت المتدخنات الحادبات على مصلحة الوطن يحتفظن بالنطع بالرغم من شبه اختفاء لأخواته التبروقة والعتنيبة.. حطب طلح.. فرار أو قدوم لتكسير وتشقيق الطلح.. بالإضافة إلى زوج هدي ورضي يكسر الطلح للمرا.. (ديل رجال الزمن الفات البيكسرو الطلح.. أما رجال الزمن دا بيكسرو تلج).. وعليبة فيها شوية دهينة.. للترطيب وإظهار آثار الدخان.. ومؤخرا تلقى فتيل لدواء القحة الشراب كإضافة جديدة.. الواحدة تدخن وتتمسح بو.. وتمشي النادي لحفلة العرس وتتقدّل.. ولو كنت أنا لي ايد في شركة الأدوية.. لسحبت كل المواد الفي الدوا دا وخليت المادة البتخلي الدخان يشيل.. واسميهو (دكافيد) واكتب عليهو الخلطة السحرية لي شيل الدخان.!!

[/JUSTIFY] د. عادل الصادق مكي
الباب البجيب الريح- صحيفة اليوم التالي