دِهن دِهن كركار.. الصلعة تولع نار

الطلاق عند الهنود الحمر.. السكان الأصليين للولايات المتحدة.. الخواجات والناس المقومين الدنيا ومقعدنها ديل جت وافدين.. وملقطين وأمريكا لحم راس.. الطلاق عند الهنود الحمر.. المرا ممكن تطلق الراجل.. ما بتقول ليهو أمشي إنت طلقان.. ترمي ليهو هديماتو في خشم الباب، يجي من الشغل ويلقى هديماتو مردومات في خشم الباب.. يشيلن ويشوف ليهو حتة يقعد فيها.. معناتو المرا خلعتو.. لا محكمة ولا هيصة.. لكن ممكن يجي حرامي ويسرق الهديمات من البيت جوا ويفرتقن جنب خشم الباب ويشيل السمحات ويخلي الكعبات.. ويجي الراجل يلقى هدومو برا.. ويعتبر إنو المرا خلعتو.. ويكون خلعو الحرامي.. خلعو هو، وخلعها هي، قدر ما تجري ورا الراجل عشان تشرح ليهو ما يتلفت عليها ويكون خلاص بوّز وزعل وإن ردّ يقول لها:

( حبايبنا.. قرايبنا

تطردونا وتخلعونا

وفي الآخر تجرو ورانا

وتحنسونا

تاني إن شفتو قعر أضانكم

تشوفونا..).. وعيك بي وشيهو.. الخلع في الإسلام جائز وله مسبباته ومبرراته.. يعني ممكن الزوجة تمشي المحكمة وتقول الراجل دا فعلتو وتركتو وفيهو وفيهو.. وتشيل حالو زييييييين للمحكمة.. وبعد داك تطلب الخلع.. وممكن المحكمة لو رأت إنو نضمها بيستحق الخلع بتخلعها منو.. وتخلي خشمو ملح ملح.. كنت أعتقد أن زوجة وصلت للمحكمة وقالت ما دايره الراجل بتكون مرا متضررة ضرر شديد وما خلاها تمشي المحكمة إلا سبب قوي وعوجة كبيرة.. إلى أن قرأت في إحدى الصحف المصرية أن زوجة مصرية رفعت دعوى خلع لأن زوجها عندو صلعة.. أو في الحقيقة قامت ليهو صلعة.. والصلعة دي قاعدة تحرجها مع أصحابها وصاحباتها.. يكونو قاعدين يكاووها بصلعة راجلا.. وطلبت من الراجل أن يشوف حل في الصلعة الفضحتها دي.. بأي طريقة حتى إنها عرضت عليهو يزرع شعر.. لكن الراجل أبا يسمع نضمها.. وقال صلعتو عاجباهو.. أقول لهذه الخجلانة من صلعة راجلها.. إنه في استبيان عن الرجل الجذاب.. وجد أن حوالي خمسة وسبعين في المئة من النساء في بريطانيا.. وحوالي تمانين في المئة من النساء الأمريكيات يرّين أن الرجل الأصلع أكثر جاذبية وإثارة من أب قجيجة.. رايك شنو تمشو تاخدو ليكم شهرين في أمريكا تخلي نسوان الأمريكان يعيدن ليك الثقة في نفسك وأنك معرِّسة راجل أصلع يكسر الما تتكسر..!! وبعدين إنتي عرستيهو بصلعتو..؟ الصلعة دي نان ما جاتو وهو معاكي.. يعني استلمتيهو بي شعرو.. خلاص رجعيهو لي أهلو بي شعرو..! يا بت الناس إنتي دايره تطلقيهو وتخلعيهو عشان عندو صلعة.؟ لو كان مع الصلعة عندو تلاليش كان سويتي شنو.؟.. الله لا وراكي كائنات عندنا.. كان ضربتيهو رصاص وانتحرتي وراهو.. لكن نحن نسوانا أريتن نسوان السرور.. نسوان جنة.. الواحد عندو صلعة وتلاليش ويسف سعوط.. ونضمو مسيخ.. وبعد دا كلو تكون مبسوطة منو وتقول لك (حلاااااااااتو).. وتدلعو ( حمودي جا وحمودي راح وحمودي قال.. و..بري.. حمودي مكجن ملاح القرع).. شفتي..!؟.. كمان حمودي قاعد يكجن.!!