ماشي السما السابع

لما كان ابني محمد صغيرا في السن في عمر الخمسه سنوات.. كان كل ما أجي أطلع ينشبك فيني ويقول علا يمرق معاي.. وكان قبل ما ينشبك.. يسعلني ( ماشي وين يا أبوي؟).. أرد عليهو وعشان أطفشو.. ( ماشي السما السابع).. وأمشي أخليهو يبكي.. ويجري يشتكي لأمو.. لما تسألو مالك بتبكي.. يرد عليها ويشيل نفس ويخت نفس( أبوي الشين دا.. أبا يسوقني معاهو السما السابع).. طبعا أنا قلت كدا لاستحالة السفر للسما السابع.. وتلقى ناس كتيرين لما يزهج يقول ليك ماشي السما.. وبعد مرات لما يكون زهجان بدرجة قرف.. يرفع أصبعو فوووووق ويكون مديك ضهرو وماشي.. ولو رددت السؤال تاني ح يتلفت عليك ويكون عاضي شلوفتو وينفض ايديهو ويقول ليك.. ( يا اخي داير مني شنو؟ كرهتونا.. يا اخي.. دا شنو العالم اللواييق دي؟).. اكتشف العلماء الأمريكان كوكب جديد خارج المجموعة الشمشية النحن فيها.. ويبعد عننا حوالي عشرين ترليون ميل.. أو ستمائة سنة ضوئية.. الكوكب دا يشبه الواطا النحن فيها.. ويدور حول نجم زي ما الواطا بتدور حول الشمش.. ودرجة حرارتو معقولة.. وعندو غلاف جوي.. وفيهو موية.. أهاااا.. السفر ليهو كيفنو؟.. يعني الناس لو دايره تسافر دايره ليها مئات السنين لحدي ما تصل.. يعني لو فرضنا إنها مئة سنة بس.. ومع تطور الاتصالات.. ولو دايرين يبرونا ويختاروهو من عندنا.. علا يسفرو شافع ولدوهو الليلة ويكلموهو باسمو وهو فوق الدرب.. ويعلموهو النضم وهو فوق الدرب.. وينضم مع أهلو.. وأمو تشوف فيهو في السفينة الفضائية وهو يكبر كل يوم وصلاتي على النبي بقى راجل.. وتتلفت علي أبوهو وتقول لو( الولد كبر وبقى للطهارة.. أها كيف الراي؟).. يقول لها (كدي خليهو يمشي ويجي علي اليمين أطهرو وأعرس لو في فرد يوم).. ولما يصل الكوكب ح يصلو مخرّف.. يتصلو عليهو يقولو ليهو إنت وين يا زول؟.. يتلفت ويقول ليهم أنا في أم بريميطة.. وأهدي الغنية للزوجة كلتوم بالخرتوم ولعثمان باللبيض وسعدية بالدويم.. ولمحمد بالسعودية.. وأقول له يا زول مالك طولت كدي؟.. أبوك مات، ما جيت، أمك ماتت، ما جيت، أختك ست النفر ماتت، ما جيت، خالتك أم حقين ماتت ما جيت.. يا زول تعال والقروش طايرة..!! ويكون هو فوق الدرب في سفرو للكوكب الجديد قاعد يتونس مع أهلو وعرف النضم دا كلو.. وخرّف عليهو وهو يطأ أرض الكوكب الجديد.. وما يعرفو منو صرفا ولا عدلا.. لكن ممكن يسفرو شافعين ضكر وانتاية.. ويخلوهم يكبرو في السفينة ويعقدو ليهم وهم في السفينة ويعرسو ويلدو.. وهم في السفينة.. وديل برضو يكبرو ويعرسو بعض ويجوطو علم الأنساب.. لكن المهم يصل بني آدم لحدي هناك.. ويقدر يرسل معلومات يستفيدو منها الناس.. وتخلي البشر يهاجرو من الواطا.. ويمشو حتة تانية يمكن القلوب تتصافا ويكونو حكومة عريضة.!!