مخير الله

الو.. اللواية:-

“التلفونو مقفول.. واللا مشغول.. واللا ما بيرد علينا.. تروح عليهو الجائزة.. وتاني يشمها قدحة.. خلو تلفوناتكم فاتحة واقعدو صاقروها.. أها نشوف الرقم”

“الو.. السلام عليكم”

.. عليكم بالسلام.. لا إله إلا الله امحمد رسول الله.. منو؟ البتول؟.. حسي دا وقت تضربي فيهو تلفون؟. ”

“”معاك النيل الأزرق وام تي ان.. انت فزت معانا بجائزة

“يا زولة كدي اصبري النمرق من الحمام.. ما معاكي ضكر ينضم معاي؟ حالتي ما حالة ونسة مع انتاية.. لامه فيني لواية الله لا وراكي”.

” سمح.. أها.. قلتي كيفن؟.. لا إله إلا الله امحمد رسول الله.. أصلو عارفة عارفو.. اللقاشي دا بيسويها فوقي”..

“انت فزت بجائزة.. ممكن نعرف اسمك؟

“يا زولة؟؟. لااااااااااااااا إله إلا الله وأشهد أنك محمد الرسول الله.. اسمي العجب حسب الله.. وحات الله بطني دي ما مخلياني أعرف راسي من كرعي.. تحرقص تحرقص تحرقص”..

“العجب.. يا العجب.. أول مرة تفوز بجائزة؟

“لا.. لا.. زمانكتية.. لا إله إلا الله أشهد أنك محمد رسول الله.. بطني حمتني الونسة كلوكلو.. قلت لك زماااانكتية (جزت بي فايزة).. في كرتلة.. فزت بي مشط وفرشة شعر.. وأديتني أمي.. النضم دا نضمن قديم.. لا إله إلا الله أمحمد رسول الله.. ما قضيتو؟ تخولني أرجع علي الحمام؟.. لواية لواية لواية الله لا وراكي.. كان ماكم مستعجلين ارجوني ادخل وامرق عليكم”..

“تجي تستلم الجائزة من مركزنا”

” سمح.. إن صبحتّ حي.. من الحالة دي، بصلكم تب”!!!

مافي مانع تقدمو جوائز.. وتفرحو فقراء المسلمين.. لكن الطريقة دي.. بتدخلكم في إشكالات كتيرة.. وحالة العجب المتخيلة دي واحدة منها.. قبال كدي برضو واحد اتصلتو عليهو وقلت ليهو فزت.. قال لكم ما داير جائزتكم.. ولا بوريكم اسمي.. اها تبقو في زي دا؟.. ممكن تشوفو طريقة تعلنو عن نفسكم وتدو الناس جوائزها من سكات.. اخير من شيل الحال دا.. الأرقام عندكم مسجلة.. باسماء اصحابها.. اعملو القرعة قدام عيون الناس ووروهم الفايز منو.. واعلنو عنو.. ووصفو ليهو محلكم وبيجيكم ان دايرها.. وان ما دايرها كمان وفر!!!

…………………

تربية المحن:-

رفع محامي أمريكي منو وليهو رفع دعوى ضد صديقه الأمريكي قال انو مربي ليهو شمبانزي في البيت قال “انو الزول دا حاجز الشمبانزي بدون وجه حق”

يعني أمريكا دي.. تمشي وتتلفت ما يلم فيك محامي كايس لي شغل ويرفع فيك قضية لا تحرا لا تدرا.

هو دا زاتو يستاهل، المربي شمبانزي دا.. اظنو ما محمول ؟.. دا كان يكون هنا وساكن غرب الحارات وعندو سبعة شفع وامهم وامها قاعدين معاهو.. لو ما مرق طفش وخلا الشمبانزي يربيهم ليهو، لوموني!!!!

………….

قال لها:-

ماذا أعطيكِ؟ أجيبيني

قلقي ؟ وجعي؟ غثياني

ماذا أعطيكِ سوى قدرٍ

يرقصُ في كفَّ الشيطانِ

أنا ألفُ أحبُّكِ.. فابتعدي

عنَّي.. عن ناري ودُخاني

فأنا لا أملكُ في الدنيا

إلا عينيكِ.. وأحزاني

نصيحة:- الزول دا اختيهو، بيملاكي فقر!