أريتو كان رماني

المودِر يقع متحدِّر:

كان راقدا على قفاهو.. جادع يدو فوق وشيهو.. شريط من ذكريات سنينه العشرين القضاها في قفص الزوجية.. والذي حسي أنه بعد أن كان قفصا أصبح علبة كبريت.. اتمغا يمكن بكراعو يكسر حيطة بيت الكبريت قبل عليها وهو يتمعّن.. قالت له وهي قاعدة تسرح في شعرها قدامو.. تمعط في الشعر من المشط وترمي في السبت وتااااني توكر المشط في الشعر وتغمض عين وتفتح عين وتجرو.. وتنهي السمفونية بي (أححححححي).. وهو يتفرج قالت له (والله أصلو مافي أيام.. حسي أنا بظكر زماااااان قبال ما تعرسني.. نضم قبال عشرين سنة ظانيتا.. أبضراع أخوي قبضنا جنب البير نتونس.. خمشك من نصك وداير يرميك في البير علا حجزو عباس ود سعد.. غايتو هئ هئ هئ الله كاتب لك عمر).. قعد في نص العنقريب ورفع ايديهو الاتنين مع رفع الأصبعين السبابة وقال لها وقد خنقتو العبرة ( أريتو كان رماني.. أريتو كان رماني.. أريتو كان رماني).. لبس نعلاتو ومرق وهو يكرر (أريتو كان رماني أريتو كان رماني)..

دقة دهب صيني:

(اعتداء نساء على موظفة تطعيم ونهبها بالديم) في اللخبار:

قالت (عندما طرقت أحد أبواب المنازل للقيام بواجبها تجاه تطعيم الأطفال.. إنها تعرضت لعملية نهب مصوغاتها الذهبية بعد الاعتداء عليها بالضرب من قبل مجموعة من النساء)..

* لكن يا بت الناس تتكشكشي بي ضهبك إنتي ماشة تطعمي واللا ماشة عرس..؟

ربما تطنطن شماتة جارتها المكجناها:

(أها ضوقي البوبار دا.. تراكي ادقيتي.. الخوف تكون الدقة دقة دهب صيني)..

اقتراح للصياغ.. دقة التطعيم!!

نصائح لكنها غير ملزمة:

عزيزي الزوج:

لو إنت طالع وفجعة وقعت، وزوجتك قالت ( أُممممممممممممك)..

فاعلم أن زوجتك بتحبك ودايرة الوقعة دي لي نسيبتها..

من ناحية أخرى:

لو جيت داخل وملصت هدومك وشافعك الصغير جا وقف قريب منك وقعد يعاين ليك مساااااااافة لحدي ما حيّرك.. فاعلم أن زوجتك كانت بتقطع فيك مع زول.. والشافع بيفتش في الحاجة الفيك وكانت موضوع القطيعة..!!

طيارات حمودي:

قرأ لها.. (تقرير للطيران الخاص): (رجال أعمال سعوديون يمتلكون سبعمائة طائرة خاصة)..

قالت وهي تلوي خشمها امتعاضا.. (عان ديل.. كمان يتبوبرو؟.. وحات الله حمودي ود هاشم أخوي عندو حداااااشر طيارة.. حمودي الما فقع من البيضة دا.. يا يدوب داخل في سنتو التامنة.. عندو حداشر طيارة.. وبدون طيار كمان إن ما عجبهم.. يا يما هاشم أخوي الله يغطي عليهو وعلي وليداتو).. عاين لها مساااافة.. قالت

( بتعاين لي كدي مالك؟.. أصلي عارفاااااااك مكجن هاشم أخوي.. عشان أفلح منك وأنجض منك.. ماهيتو خمسمية ألفي وعندو عمارتين.. وإنت ماهيتك قدرو مرتين، مليووووون جنيه وسجمك ما عندك).. ما زال يعاين لها وقال ليها (خلاص قومي.. قامتك قيامتكم إنتي وهاشم أخوكي.. نشفتو ريقي.. شيلي الكووووز دا.. واملي لي موية) ..!!