اتحزّم.. و.. إتلزّم



شارك الموضوع :

[JUSTIFY]

اتحزّم.. و.. إتلزّم

في برنامج (الأسرة المتحزمة) تتطالعنا الشيفاية/ علوية كوارع وتقدم طبق اليوم.. بعد ما ترفع ايدها الشمال وتكشكش غويشاتا الفالصو في وشينا وبتقول:-

عشان البلد ماشة لي دُحديرة.. دُحديرة خترية.. ونحن ربات البيوت.. ربطنا الأحزمة.. وربطنا كرعينا من الحوامة.. وأنا كشيفاية.. وأنا ما تشوفني كدي؟.. عندي الحزام اللسود.. وكاحساس مني بالبلد ومشاركة مني عشان نتجاوز الأزمة دي.. أقدم لكم كل يوم.. لمن ربنا يزيل الغُمة دي.. أقدم أطباق ما بتكلفكم أي حاجة.. بي سااااااكت.. طبق الليلة اسمو.. اتحزم والتلزم.. ما بتندم.. المقادير:

بصلة

– قعورّة (جمع قعر) قعورّة طماطم

– عشرة عيدان ملوخيىة مورقّة

_شوية ملح بطرف اصابعيكي

– عشرة حبات فلفل أسود.. إن ما لقيتي تجيبي عشر نملات ابريش تزعطي منهن الريش وتشيلي الكرعين بملقاط حواجب.. والنملة من النص تقطعيها لي حتتين..

– قشر بطاطس

قشر ليمون

بيضيّن ود ابرق “خلي وليداتك يغيبو من المدرسة هوي يا اختي هي المدرسة شن طعمها؟ ان قرو، وإن ما قرو واااااااحد وحات الله، في النهاية يطلعو حلاقين. واطلقيهم في الحلة.. بيكونو عارفين ودابرق قاعد يبيّض وين؟.. خليهم يجبو ليك دستة بيض ودابرق”

– “تلاتين جرام عُضام مجروشة.. عُضام عرقوب”.. راقدات الجزازير قاعدين يجدعوها في الواطا

– جردلين موية

أها يلا نجي.. لعمل الطبق.. تحضري حلة مقاس بانيو.. تربطي البصلة في سلك ولو لقيتي سنارة علقتيها فيها يكون أحسن.. أوعك ترمي قشر البصيلة دي لأنو ح تزيني بيهو طبق بكرة الح يكون بيتزا عضام السمك بالنبق.. تعلّقي البصلة في طرف الحَلة.. تصوطي باقي المقادير مع بعض.. تكُبيهن في الحلة.. تكُبي فوقن جرادل الموية.. تشيلي الحلة وتمشي لسيد الدكان تشحديهو ينزل قدرة الفول شوية.. ويخلي ملاحك دا يغلي ويسبّك.. تقعدي جنب الكانون وكل مرة بطرف المفراكة تشيلي من الملاح بيدك الشمال بالمفركة وتدقيها في يدك اليمين وتضوقي. لحدي ما تتأكدي إنو الحلة نجضت.. وتشيليها وتجري علي البيت.. وتخلي أفراد الأسرة يرخو الحزام شوية.. وتجيبي صبابة وكوز.. وتغرغري أفراد الأسرة بالصبابة واحد واحد تدخلي الصبابة في الخشم وتقفلي النخرين بايدك الشمال وتغرفي باليمين بالكوز.. عشان تضمني إنو مافي ولا نقيطة من الملاح وقعت في الواطا.. أما التحلية فهي.. ممكن تكون من سلطة فواكه (أم قشيرة).. والبتتكون من قشر موز وقشر برتكان.. وقشر منقة ان اتلقى لانو عندنا ناس قاعدين يالكو المنقة بيقشرها ويمصوها وما يخلو فيها إلا الكدوكة.. ممكن تستفيدي من كدوك المنقة كطحين برضو.. وتضيفيهو لسلطة فواكه (أم قشيرة).. تجيبي المقادير دي وتضيفي ليها ضلافين ضان (عشان الجلاتين) وتماسك السلطة.. تختيها في النار لمدة ربع ساعة برضو عند سيد الفول.. وتقدميها للأسرة.. وبالهنا!!!

قال الشاعرة غادة السمان وهي تشكي وتبكي:-

“و لم أكن لأثق بك

إذا صافحتني

خشيت أن تسرق أصابعي

وإذا قبلتني

أحصيت عدد أسناني

لكنني أحببتك”

قلتي ليهو كدي وسكت؟!

[/JUSTIFY]
د. عادل الصادق مكي
الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.