الله يكفينا شر قالوا وقلنا



شارك الموضوع :

[JUSTIFY]

الله يكفينا شر قالوا وقلنا

في خبر علمي مثير.. والليام دي النت يشيل ويجيب لنا في اللخبار المثيرة.. قبل يومين خبر (علماء يؤكدون نهاية العالم ستكون بعد 100 عام كحد أقصى).. مئة سنة كحد أقصى.. يعني ممكن أقل من كدي.. إنتو بتخوفو منو؟.. نحن غايتو خاصة نفسنا كان انتهى واللا كان قعد كلو عندنا واحد.. أصلو ما فارقة معانا.. لاقين منو شنو عليكم الله؟.. بلا أمريكا تسوط فيهو ونحن مرة نتضاير ومرة نتفرج.. ومضايرتنا أكتر من فرجتنا.. إن نضمنا وووب.. وكان سكتنا تراها دي السواطة.. خليهو ينتهي كان منتهي..

خبر علمي تاني ومثير بيقول: (استمرار المرأة بطهي الطعام يضر بصحتها).. تابع علماء من المركز الطبي لجامعة راش، الحالة الصحية لـ 2700 امرأة (42 52 سنة) لمدة 14 سنة، وتوصلوا إلى أن المرأة التي تقضي في المطبخ وقتا طويلا في تحضير الطعام، يزداد احتمال إصابتها بأمراض القلب وارتفاع مستوى ضغط الدم ومستوى الكوليسترول..

نان مو صُح..

الواحدة لحدي ما الحَلة تنجض تكون حتلّت اللحيمات الفيها وتاكل.. والضواقة، تتبخ وتضوق.. تاخد لها رقيدة وتقوم (كب.. كدي النقوم أشوف حلتي دي سوت كيفن).. تكشفها والحلة تجقجق في النار وتشيل لها لحيمة في ايديا.. و(حي حي حي) وتنفخ بشخما فيها وتجدعها جواهو.. وتلوك.. ترجع تاني تاخد لها رقيدة وتقوم (كب.. كدي النقوم النشوف حلتي دي سوت كيف) علي التكل.. وبطرف الكمشة جغيمة.. وتبلعها ( كدي.. أريتو تبيخ البنيات لي حدهن..) اربعطاشر سنة.. البي يحميها يجيها كوليسترول شنو؟.. الراجل يختو ليهو الغدا ويحتج (الملاح دا ما فيهو لحم؟).. تتدفر لها عضم قدامو وتقول ليهو (ما تراهو دا اللحم).. يمسك العضم ويقولها وهو مدنقر بحثا عن لحمة فيهو (دا عضم.. عضم سااااكت).. تقول لو ملقية عليه باللوم (أسوي لك شنو.. ما دام الجزازير ديمة غاشنك ويدوك العضام).. فيقتنع بكلامها.. ويمسك العضم ويمص ما بداخله من تايوع.. حامد شاكر.!.

خبر تالت:

بعد أن تعشو بما قسم الله لهم.. من بوش.. ورقدو كل زول فوق عنقريبو.. يتفرجو في التلفزيون.. بقناة أجنبية فيها فتاة أجنبية برضو.. خلتو ينظر إليها نظرة سريعة مقارنة سريعة بينها وبين المكوعة قدامو.. أيقن إنه وبشر الصابرين إذا صبرو.. كان خبر عن: (فندق يفتتح غرفة أسفل المحيط الهندي بتكلفة 1500 دولار في الليلة الواحدة، تقع الغرفة على مسافة 13 قدما، أسفل سطح المحيط الهندي)..

وشافو فيديو مع نفس الخبر يعرض في الأوضة وهي الموية.. قالت وهي تتشهق (أحيييييييي!!.. من أداني فيها نويمة)..

رفع رأسو عاين لها (الرحيمة.. الرحيمة.. إنتي باقي لي بقيتي طمحانة طمح شديد.. تسوي بيها شنو؟.. حسي الخريف الفات دا.. ماكي أسبوع بي حالو نايمة وسط الموية، في أويضتك دي.. شن لقيتي!!؟)

خبر رابع:

قال الشاعر:

ألا أيّها النّوّام ويحكم هبّوا

أسائلكم هل يقتل الرّجل الحبّ؟!

فقالوا: نعم حتى يرضّ عظامه

ويتركه حيران ليس له لبّ

ما تصدقهم.. الناس ديل بس عشان نهزتهم من النوم وسألتهم.!!

[/JUSTIFY]
د. عادل الصادق مكي
الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.