ثورة القـــرود الحُرّة
المسار (أ): لوري مليان موز يمشي معسكر القرود.. ويدورو اللوري ويمشو برااحة مع غنية زنقار (اللوري دردق بي .. من كسلا لي تسنيّ.. اللوري).. ويشتتو الموز.. بعد كل مئة متر يرمو كيلو موز في اتجاه الحدود الأريترية.. القرود تباريهم.. لحدي ما يصلو أسمرا.. يملصو القرود هناك ويجو راجعين..
المسار (ب): أربعين طشت.. يملوهن مريسة.. يختوهن حول معسكر القرود.. تجي القرود تشرب المريسة الفي الطشاتة تسكر.. والقرد يطشم ويرقد لا ايد لا كراع.. يلقطوهن في أقفاص.. ويجيبوهن الخرتوم.. ويختوهن في سجن دبك و(يبقن لحين السداد).!!
..أها قصرتّ؟؟
وفي خبر قبل يومين بـ(اليوم التالي).. أن اللجنة جهزت تب.. وح تسافر إلى كسلا (للوقوف على المشكلة).. وقال المسعولين إنهم ح يعملو (سمنار).. ويناقشو مشكلة القرود الثائرة.. سمنار؟.. وقومة وقعدة؟.. شوفو يا ناس اللجنة طالما قررتو كدي إياكم ثم إياكم إقصاء أي زول من مناقشة المشكلة.. وناس سبعة زايد سبعة ما تنسوهم.. مافي حزب ينقنق بعدين.. ويلومكم ويقولو انتو ما جادين في الحوار عشان ما سوقتوهم يناقشو مشكلة قرود كسلا.. ويقوم يحرد الحوار كلو ويشيل حالكم ويقعد يكورك إنو الوطن يمر بمنعطف خطير.. بعدين ما توقعو مع القرود أي اتفاقية بدون حضور كل الأطراف.!!
الموضوع داير حل سريع وإسعافي في الوقت الراهن.. بعدين السمنارات والندوات وورش العمل ملحوقة.. غايتو يا ناس الحياة البرية.. تقعدو تتلبدو كدي.. القرود دي بعد شوية تجيب عناقريبها وتسكن مع الناس في بيوتها.. وتلقى القرد واقف لست البيت فوق راسا في التكل وغازي كوعو وينهر فيها (يا ولية بتتمحركي مالك؟.. اللكل دا ما مرق؟).. وممكن يطلقها من راجلا ويعرسها هو.. والمهر والشيلة عليها إن ما عجبكم كمان.!! وكية ليكم سيرة ودلوكة وغنا (والليلة ساير لي بت القبايل يا عديلة ليه).. و(سنة يا ولد.. انت قرد واللاّ سيد بلد ..ووين).!!
[/JUSTIFY]
