ما تندهش

لو قلت ليك أرحل وأمش..

ما الإلفة يا سيد الرجال.. لا بالكلام.. لا بالقرش

***

بعدك أخير من قسوتك..

رغم المآسى الفي البعاد..

أنا مابتغرني روعتك.. ولا دمعتك من غير وداد..

زمن التلاقي خلاص رحل.. والريدة زاااتا بقت رماد..

وخداري بسقيه الدموع.. ده إذا بعد غيبتك عطش!

ومااااااا تندهش..

**

كل الغنا الغنيو ليك.. ختيتو فى رف الأسف..

ومرقت للناس من جديد.. أضحك مع الموج والصدف..

لا بعدك الريدة انتهت.. لا بعدك التحنان وقف..

بس خايف المعنى الجميل.. في سكة الأحزان يطش..

ومااااا تندهش

**

راهنت بيك كل الظروف.. وحلفت أخلص لي هواك..

ورغم السنين العشتهم.. أحلى المشاعر كان معاك..

أنا ليلي كان قبلك طويل.. وقصر بعد شاف نور سناك..

وهسع حبابك يا شجون.. أصلو الفرح كان زيف وغش..

ما تندهش

***

فريت عليك توب الحنين.. وفتحت أبواب العشم..

ظنيت خلاص.. جاني الخلاص.. فارقت أي عذاب وهم..

هسه الحنين أصبح أنين.. وتاري العشم أصلا وهم..

وبدت ملامح الشوق تكش..

ماااا تندهش..

***

أنا ليك كتبت الريد ملك.. وإنت البراااك فرطت فيو..

جيتك مستف بالوصال.. قايلك حبيبى المشتهيو..

أخلفت وعدك لي هواي.. اخترت غيري التصطفيو..

ما تنعل الحظ التعيس.. بنيانا كان ناقص عرش..

مااااا تندهش..

تلويح:

وأمتع نفسى بالدهشة!!!