د/ عادل الصادق المكي

“الشحدة” حق من حقوق الإنسان


[JUSTIFY]كنا تلاميذ في الابتدائي.. مجموعة معينة من الطلبة (الفوانيس).. والفانوس هو من يقتات علي الاخرين.. كانو الطلبة ديل ساعة فسحة الفطور.. يبارو الطلبة واحد واحد.. ويمد يدو ويقول ليك “اديني قريمة”.. يقصد تديهو حتة من الساندوتش بتاعك.. يقول ليك كدا ويقعد يعاين ليدك يشوفك ح تقطع ليهو من وين؟.. لو حس انها بسيطة يقول لك “ما تزيدها شوية.. انت مالك طماع كدي؟”.. شحدة هؤلاء الطلبة ليست بسبب ضيق ذات اليد والفقر.. لكنها طفاسة.. .وهواية.. يوفرو قروشهم ويلفو حوش المدرسة كلو ويفطرو علي حساب (القريمة) المن سندوتشات الطلبة.. والشاي برضو.. يباري الطلبة.. ويكون شايل ليهو كباية فاضية.. ويقول لكل واحد “أديني جغيمة”.. في نهاية المطاف تكون كبايتو اتملت.. ولو في امتحان وقاعد جنبك برضو يشحدك إجابة سؤال.. ويقعد يحنس فيك “أنا مش صاحبك؟”..

الشحدة أحيانا قد تكون ليست نتيجة حاجة.. تكون هواية.. ومزاج.. وخصوصا لاصحاب المزاج من التمباكة.. شحدة السفة عندهم جزء من الكيف.. تلقى واحد منهم يشاكل ولدو عشان شحد قروش.. .وبعد ما ينتهي من دق ولدو وانت تحجزو منو يقول ليك “الولد داير يطلع شحاد”! يروق شوية ويقبل عليك “الولد عكر دمي يا اخ.. نفسو صغيرة!! دايرين يجبدوهو أخوالو.. كدي جيب سفة”!! لوعارف أنك بتسف!!

النرويج أغنى دولة في العالم.. ودخل الفرد فيها أعلى دخل لبني آدم على وجه البسيطة.. إذ يبلغ دخل الفرد فيها حوالي اتنين وخمسين الف دولار في السنة.. حوالي مئة اتنين واربعين دولار في اليوم.. يومي علي الله مئة اتنين واربعين دولار.. .اقل راتب لعامل حوالي خمسة الف دولار في الشهر.. لكن دي نحن زيهم واحد واحسن منهم كمان .. عندنا كمساري الحافلة أو الهايص بياخد خمسين جنيه في اليوم.. وفاطر ومتغدي والركاب قاعدين يلمو ليهو القروش من بعض بالإضافة لأنو ينهرنهم ويتفشا فيهم!! المهم هذه النرويج الشبعانة.. أخيرا اصدرت قانون يوقف قانون منع الشحدة.. يعني من حق أي إنسان يشحد.. ومن حق أي إنسان يدي قروش للشحاد بعد أن كانت ممنوعة.. للشاحد والمشحود.. ولمن يسهّل الشحدة.. .وكان القانون يحاسب عليها بسنة سجن وغرامة.. واعتبر نشطاء حقوق الانسان في النرويج.. انو منع الشحدة ضد حقوق الإنسان.. شفتو؟..؟.. يا دوووووب عرفو انها حق من حقوق الإنسان.. وشابكننا أنهم هم عالم أول ومتحضرين!! وخايف نهااااارة باكر.. يكونو هم أسياد الشحدة ويتهمونا باننا قاعدين نكش الشحادين.. وفي التقرير السنوي لحقوق الإنسان تبقى نقطة سوداء.. ونقعد في الغلاط.. عشان كدا خلو الشحادين يا جماعة.. وعشان تثبتو ليهم انكم ناس حقوق إنسان بالصح بالصح.. تعترفو بالمهنة وتنظموها.. تأجرو ليهم (الاستوبات).. قصاد مبلغ معلوم يدفعوهو يوميا ومقدما.. عشان ما يزوغو.. وتدوهم ايصالات.. والترخيص اهم حاجة.. ترخصو الشحاد وتعلقو ليهو نمرة في ضهرو!! وكل شحاد يشتغل في الخط بتاعو.. يعني ما يجي شحاد ترخيصو الكلاكلة يضايق ناس ترخيص سنتر الخرطوم.. وبعد داك نشوف ناس حقوق الانسان ديل تاني سببهم علينا شنو؟!
[/JUSTIFY]