يا عريس بأمانة.. العروس جربانة.. طلِقـــا
في بعبشتي وهبيشي في الإنترنت.. وقعت فوق نضم شيلني هم والله،
النضم بيقول إنو العملة الورقية، قروش الورق دي، من فئة الجنيه لي عند فئة الخمسين جنيه، قاعدة تنقل أمراض كتيرة وخترية، أمراض معدية، يعني نحن الواحد كان ماهيتو إتوخرت أسبوع يزعل ويتحرق، ويقرب يحرد الشغل، ويحارب ويخاصم مديرو، ومسيكين المدير يكون ما عندو إي ذنب، ويكونوا ناس الشركة الله يجزيهم عن المسلمين كل خير موخرين الماهية مخسوس عشان ما نتعادا من القروش ونمرض والشغل يتعطل، المهم لقيت دراسة مسوياها مجلة أمريكية متخصصة اسمها(سازرن مديكال)، إنو قروش الورق دي قاعدة تنقل أمراض كتيرة وخترية، منها أمراض جلدية خترية، (الله يغتي على البنيات وخسوساً الشغالات في البنوك وطول النهار يعدّن في القروش)، ومرض فيروس الكبد الوبائي، ومرض التايفويد، والسالمونيلا، والنزلات المعوية، وأكياس الديدان وأكياس القارديا والأمراض الفطرية الجلدية، والجرب. الأمراض دي كلها في الدولار.. والدولار ما فيهو نضم، أها قروشنا المبشتنة دي يكون خبرا شنو؟.. عندي حاجة داسيها من الناس.. اللي هي كل ما أمسك الماهية قاعدة تجيني نزلة، أنا قايلا حساسية ماهية، أتاريها عدوة من القروش.! ونحن كمان عندنا ناس أول ما يلم في رزمة حقت ورق قروش، يمسكها ويقعد يعد وكل مرة يبل أصبعو بي لسانو، ويقعد يحسب وهو مبسوووووط، مع كل بلة أصبع يكون شالّو كمية من الميكروبات وداها خشمو، ومن خشمو نقل لي للقروش، وتلقى الكمساري في المواصلات عشان يرجع لك الباقي يقبض رزمة قروش بي سنونو في خشمو ويديك الباقي من جيبو، وبتاع الدكان يكون عندو نزلة يقش نخرتو بيدو ويشيل بها الباقي يديك ليهو واللا يدخل إيدو في الدرج ويقعد يصوط القروش كلها، وبعدين الجزارين، تلقى الجزار عرقان تديهو ورقة الخمسين يقعد يحسب وكل مرة يقش في العرق بالورقة من جبهتو، ويحلف لك طلاق إنو دي أحسن لحمة، ويكون هو عندو قوب أو جرب ويقش الجرب في الورقة، والورقة تقع في إيد عريس، والعريس يخُت ورقة الخمسين أم جرب دي، يختها مع قروش سد المال ويودوها لي ناس العروس، والعروس مسيكينة تشيل الورقة وتمشي تتحشر في الأوضة وتبوسها عشان فيها ريحة الحبايب، والجرب يتشعبط فيها وتجرِّب، وبعد يومين يظهر للعروس جرب، والعروس وأهلها يدخلوا في ضفورهم، وما يعرفو يسو شنو؟.. ويدسو خبر جرب العروس وما يصل الخبر لأم العريس وأخواتو، العريس برضو يكون جِرّب من الورقة اللت الخمسين، ويوم رقيص العروس تكون الفنانة البترقّص العروس غتيتة وحاسدة، وتكون عرفت خبر جرب العروس من الحنانة، وتجي وترقص العروس، وتقعد تغني:
السيسبانة..
خدرا ورويانة..
يا عريس بي أمانة
العروس جربانة..
و طلقا.!!
[/JUSTIFY]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة