ثلثا رجال العالم.. تحكمهم زوجاتهم



شارك الموضوع :

[JUSTIFY]الرجل وهو طفل أول ما يوعى على الدنيا ويقدر يميّز تتحكم فيه أمو.. تعلمو متى وكيف يتبول؟.. تفطمو من الرضاعة والفطام تحكم برضو.. تتحكم في وقتو كلو وطريقة أكلو.. متين ياكل.. وكيف ياكل.. أكل باليمين ما بالشمال.. وهو صبي تتحكم فيهو برضو.. بعد ما تعلمو الاستحمام.. تخليهو يستحما براهو.. يا ولد استحما.. يا ولد اشّطف قبال ترقد.. يا ولد سرح شعرك دا قبال تمرق.. يا ولد غير قميصك دا وسخان.. يا ولد ما تباري لي الولاد الصعاليق ديل.. وهو شاب برضها تتحكم فيهو.. وهو خلاص ياخد على التحكم.. وأي مرا يتزوجها تبدا من حيث انتهت أمو.. لكن يحدث صراع بين الأم والزوجة وكلو عشان التحكم.. الصراع ممكن يكون سافر وواضح.. وتستعمل فيهو كل الأسحلة البي تجيدها المرأة.. ويكون هو مسيكين مجابد بيناتن.. والبتكسب فيهن ح تتحكم.. قالت إحداهن وهي تشكي وتبكي أن نسيبتها كانت ترى أن التحكم فيها هي، هو أسلم طريق للتحكم في ولدها.. ودائما تقول ليها (ولدي تعبان)؟.. وتمشي تجر عنقريبها في خشم باب الأوضة البيرقد فيها عشان الشفع.. وتقعد تحاحي فيهم.. وتطلب منها تسكّت الشفع ديل ما يجوطو.. يخلو أبوهم دا ياخد ليهو رقيدة.. ولدرجة أنها طلبت منها أن تحدد النسل.. وما تملى ولدي شفع.. الحول بي زول.. يأكلكم من وين؟؟.. حتى أنها اشتطت وبقت تذكرها بمواعيد حبوب منع الحمل..!!؟؟.. أها ماشة ترقدي.؟ الحبيبة نعل ما نسيتيها؟..!! وهي بذلك تكون قد تحكمت وسيطرت على ولدها بطريقة غير مباشرة.. وسيطرت على تناسلو كمان.. واستغلت الزوجة كأداة تحكم.. وحولتها من متحكمة إلى متحكم فيها.. عابرة إلى التحكم على جناها.. يعني بقت تتحكم فيها وفي ولدها.. والزوجات البي يفلتن من تحكم الحماة.. ويستفردن بالزوج.. يتحكمن فيهم.. فيهن واحدات بطريقة مباشرة وعينك عينك وما ساعلات في أي جعص زول.. ممكن تنهرو قدام أبوهو وأمو على الهواء مباشرة.. وفيهن واحدات في غاية الذكاء والفهلوة وتفتيحة لمن غلط.. تتحكم فيهو وتوريهو إنو هو المتحكم.. وإنو هو جمل الشيل.. علما بأن جمل الشيل ذاتو داير ليهو زول يقودو ويتحكم فيهو.. وهو ماشي يتقدّل ويفتكر نفسو ماشي بي مزاجو هو.. وفي زوجات التحكم عندهن بقى ولا بالنضم.. وأزواجهم خضعو لبرمجة.. ما تنضم ولا حرف ولا تفتح خشما.. التحكم بالنظر.. تعاين ليهو بس.. وهو يكون عرف المطلوب منو شنو.. ويسويهو وفي سرو يطنطن (إنتي غايتو الله يهديكي!!.. خلاص قومتي على حميّر العيون؟).. (انظر حولك)!!..

دراسة علمية أوردتها صحيفة السياسي الكويتية تقول إن ثلثي رجال العالم تحكمهم زوجاتهم.. وقالت الدراسة إنه أي مرا تحس أنها بتتحكم في راجلا بتكون مبسوطة.. يعني ما نحن برانا!!.. مافي أخو بنات يتحسس.. الخير رااااقد.. تلتين رجال العالم زوجاتهم حاكماهم.. أما التلت الباقي ديل عزابة.. يعني لسه واقفين في الصف.. وفي طريقهم لأن تتحكم فيهم زوجات المستقبل!! وبعدين الدراسة قالت بيكونن مبسوطات.. وأي زوج بحب زوجتو بتمنى إنها تتبسط.. والله يديم البسط وتسوي ليهو القيد حرّن.!!
[/JUSTIFY]

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.