[JUSTIFY]المبدعين عندنا قلال.. لكن المقلدين كتاااااار.. والبسرقو الإبداع ويعتبروهو حقهم بكل قوة عين وبلا خجلة ديل مالين البلد.. الغريبة الواحد فيهم عارف نفسو سارق الابداع.. ويجي ينجعص في التلفزيونات أو في بيوت البكيات أو العروسات.. ويخلف كراع فوق كراع ويقلوّز عِمتو.. ويقعد ينضم.. أنا وأنا وأنا.. ويقوم ينفض صلبو مرتاح البال قرير العين.. ويمشي علي أهلو.. الشحدة شحدة الله والرسول دي برضها فن وفيها كتير من الابداع..زي ما السرقة فن.. والنشل فن.. والاحتيال أبو الفنون.. كلها تحتاج إلى شخص مبدع يجدد فيها وفي طرقها.. لفتت نظري شحادة بنية صغيرونة عمرها نحو عشر سنوات في احد شوارع الخرتوم.. البنية دي تجي للبنات بس.. تقيف جنبها وتكورك لها “يا عسولة.. ربنا يديك العريس السمح.. ربنا يديكي العربية السمحة.. كرامة”.. لاحظت أن هذه الشحادة المبدعة..كانت تتخير العسولات من الائي عمرهن قد تجاوز الثلاثين.. وكانت تركز على موضوع العريس دا تركيز شديد.. وأصلو ما شفت واحدة منهن ما ادتا حاجة.. سمعت واحدة من الخائفات المصابات بالبورافوبيا وتقول ليها “انتي بس ركزي على العريس.. العربية أجليها شوية.. نا كل يوم بجي بي جاي وعندك عندي جنيه”.. مثل هذه الشحادة اليافعة تحتاج إلى رعاية الدولة.. وحمايتها.. مش يقعدو يساككو فيها.. فهي تعمل على رفع الروح المعنوية لبناتنا المستعجلات على رزقهن وتطمينهن.. فقد عرفت كيف تخترق عواطفهن وتضرب على وتر حساس.. قلما لا تنفحها احداهن بورقة نقدية.. كان وقتها شبح خروف الضحية يطاردني.. وكل ما اشوف لي كوم خرفان أعاين ليهو وأقعد أسمع الأسعار.. وحليفة أسياد الخرفان بالطلاق.. نحن اكتر شعب على وجه الأرض رجالو يحلفو طلاق في الفارغة والمليانة.. سيد الخرفان يحلف طلاق الجزار كل ما يقطع حتة لحمة يوزنها ليك يمهرها بحليفة طلاق.. سيد البتيخ يحلف طلاق.. الوزير البيزنقوهو في شغلة يحلف طلاق.. ومن أهم ميزات الزواج عندنا تزوج عشان أنك تبقى زي الرجال وتحلف طلاق.. مشيت على البنية دي.. وقلت استغل ملكتها في أن تدعي لي وتقول لي ربنا يديك الخروف السمح ورخيص.. أخدتها بالجنبة واديتها خمسين قرش (حديدة أم خمسمائة بالقديم).. وقلت ليها “يا بنيتي أنا عارف أني لا عسولة ولا حاجة.. بس دايرك تدعي لي بالخروف السمح ورخيص” عاينت للخمسمائة في يدها وعاينت لي وقالت “يا أمو.. واللهي قروشك الاديتني ليها دي.. أتوت ما تجيبو ليك.. سله (صلح) المودوؤع أشان نهنا نسله الدأوه.. وبعدين انا أندي شرت” قلت يا ربي شرط شنو الجديد الح يضاف الي شروط خروف الضحية ومن شحادة ..قلت ليها موافق بدون ما اعرف الشرط.. “أول حاجة توصف لي بيتكم وين؟.. عشان لما تشتري الخروف وتضبحو.. أجيك وتديني لحمة والجلد والراس والكوارع” وافقت مضطر واديتها جنيه وحلفت ما اشيل الخمسمائة منها فنجرة سااااكت قبضت الجنيه وقالت لي “إن شاء الله يا عمو.. يا ما عسولة.. ربنا يديك خروف ضحية سمح ورخيص”!
[/JUSTIFY]
