رمضان أحمد السيد
على طريقة ان في الصمت كلاما الأرباب يقول ليس كل ما يعرف يقال!!
مهما كان حالك حبيبنا ❊❊ انت شأنك سامي المقام
لو صغرت أو كبرت ❊❊ لايغير في قلوبنا الغرام
ارفع رأسك يا هلالنا عالي ❊❊ وسير في درب العظام
يعني ايه لو انهزمنا ❊❊ هل مكانك وصلوه الخصام
يشهد التاريخ شموخ امجادك ❊❊ والممتاز يؤكد الكلام
حاول ركز اصرارك للبطولة ❊❊ بنظرة جادة الى الامام
وكيف نتعلم من اخطائنا ❊❊ ونهزم في جوانا روح الانهزام
ونلعب الكورة باعلي همة ❊❊ بروح الجندي البطل الهمام
ان شاء الله بكرة الكاس نجيبو ❊❊ ونكسر النحس والبخت الشئام
المكتوب لازم نصبر عليه ❊❊ مايوم فرح ويوم سئام
ما كل انسان الهم يصيبو ❊❊ ومن ضربة و احدة يفقدنا المهام
انت ما الهم يجيرك ❊❊ وتنصدم في لحظة وتفك اللجام
انت الاسد في البراري ❊❊ وتنقذ المفزوع المفجوع حطام
والقمر في ليل اللجج ❊❊ تزيح عن عيوننا الظلام
الصادق احمد محمد بخيت
موبايل: ٣٦٢٧١٠٥١٩٠
❊❊
ظلام الشروق
يا هلال اصلك عظيم رغم عدم الانتصار
يكفي بس مثلت بلدك ويكفي بس اسمك هلال
والامل معقود عليك ومافي شئ عندك محال
والظلام في الدنيا رحمة وبيهو تظهر يا هلال
مابتهم ابدا هزيمة ونحن في درب النضال
والقتال طبع الاشاوس والهلال مصنع رجال
والامل سلم حياتنا ونحن رافعين الشعار
بكرة يا سودانا تفخر وتفتخر بيهو الهلال
مابنشوفة عليهو صعبة لانو طبعو الانتصار
وكل جماهيرك بتهتف عظمة والله يا هلال
ويوم تهل بس في سماك يختفي النجم الصغار
ونحن راجين انتصارك ومافي شئ اسمو المحال
يا هلال شمر سواعدك بكرة بتخوض النزال
النزال البيهو تفرح كل جماهير الهلال
الشاعر: حسن العالم- عطبرة
❊❊
عتاب
ليه يا اولادنا الجميع زعلان ❊❊ كل هلالي يذرف الدمعات
كتيرة علينا خمسة اقوان ❊❊ قربنا نحصل الوحدات
خليتو الحسود فرحان ❊❊ حتي الدلاقين طلعوا مسيرات
لو خصمنا كان المان ❊❊ ما اظن تحصل الخمسات
يا حليل داريوكان ❊❊ ويوسف البقفل الثغرات
هلالنا عظيم مهما كان ❊❊ املنا سابع المستحيلات
هل تصدق يا رمضان ❊❊ يرفعوا لينا الكفة الوصيفات
الامل الاخير يا اخوان ❊❊ تقلبوا الطاولة عليكم لزم اربعات
عبد العظيم عبد القادر (رملي)
مستشفي النيل الازرق
❊❊
* رأيت ان استهل زاوية اليوم وعلى غير العادة بنبض الشارع الهلالي، وكيف ان مثل هذه الخسارة غير الطبيعية لايمكن ان تؤثر فيه وتجعله يتخلى عن فريقه.
* يتحدثون من خلال اروع الكلمات عن كيفية العودة وكيفية التماسك . وكيفية تحقيق الانجازات والنجاحات والتأكيد ان سبب الحقد على الهلال ان الاخرين لم يصلوا لمستواه.
* لذلك يحاربونه ويخشون منه في تحقيق انجاز في ابطال افريقيا ، لذلك كانت سعادة البعض غامرة وكان لابد من كلمات قوية من عاشق قوي بالهلال يفضح الكثير من المخططات والكثير من الظواهر السالبة وما ادراك ما الاحتفاء بالخسارة الهلالية والطوفان حول العاصمة ومدن الولايات الاخرى.
* وقد دللت جماهير الهلال على هذا الحديث وهذا الصدق في التناول وهي تقدم بكثافة على اول مران بعد الخسارة بهذا المستوي الكبير لتعيد الثقة للاعبين. ولتؤكد بانها حتما وفي اقرب وقت على موعد والانتصارات.
* يبدو ان الارباب احس في لحظة انفعال انه قسى على المدرب كامبوس فعاد بالامس ومن خلال قناة النيل الازرق ليقول بانه اخطأ..!! مخففاً تحميل الهزيمة له بتلك الصورة القاسية.
* ولايزال الارباب عند موقفه مؤكدا بان اللاعبين اعطوا فريق مازيمبي حق قدره ولايمكن ان نقول بانهم تخاذلوا ومن الواضح انهم لم يوفقوا.
* لكن الاخطر الذي قاله الارباب برغم انه جاء على طريقة ان في الصمت كلاما وهو يقول ليس كل مايعرف يقال!!
* وفعلاً هناك الكثير من الكلام الدائر ومن الاسباب غير العادية أو الطبيعية التي قادت لهذه الخسارة الكبيرة..
* ولكن في النهاية درجة الاهتمام بالهلال لهذا الحد وحتى الحديث عنه وهو مهزوم بهذه الطريقة يؤكد عظمته ويؤكد سيادته ويؤكد تفوقه.. ويكفي انه مجندل المريخ في دوري الأبطال وما اعظمه من انتصار بالثلاثية!!
❊ لحن الختام
* مايؤكد بان هناك شيئا غير طبيعي في المباراة، الهدف الخامس الذي ولج شباك الهلال.
* الكرة لا تنتهي بهزيمة حتي ولو كانت ثقيلة.
* الارجنتين خسرت بالستة وهي تضم افضل لاعب في العالم ميسي واشهر مدرب مارادونا ملأ الدنيا وشغل الناس .
* لا نبرر الخسائر فحسب، بل المطلوب ايضا تلمس الاخطاء والقصور والمعالجة المطلوبة واجبة.
* .. حتي ولو فاز الهلال بدستة اهداف علي اهلي شندي لا يمكن ان نقول بانه اعاد البسمة لجماهيره.
* البعض حمل اسباب الهزيمة للحمل الزائد من جراء التمارين العنيفة والتي سبقت المباراة بـ ٤٢ ساعة.
* هل نفهم من حديث رئيس المريخ في اللقاء الاعلامي انهم بعد اليوم لن يجروا وراء مشاطيب الهلال؟.
* وماذا عن الموجودين في الكشوفات الان؟.
* لعنة الهلال هل اصابت طمبل ليتجمد نشاطه حتي نهاية الموسم مع المريخ. وماذا عن الموسم الجديد؟.
* تفكير جماهير الهلال في بهاء الدين والبلدوزر أثار ضجة.
* تصريحات الارباب لرواد النادي وجدت صدى لدى نفوس عشاق الازرق وحقق موقع قوون الالكتروني ارقاما قياسية في المشاهدة.
* بالمناسبة في البحث عن هدف للزميلة ميرفت حسين انصف الارباب اعلام الهلال خاصة المقروء واشاد بدور الاذاعة القومية والتلفزيون وكذلك قناة النيل الازرق.
* غياب التجارب الودية الافريقية الكبيرة قبل لقاء مازيمبي هو الذي اضر بالهلال ، لان مثل هذه اللقاءات تكشف الاخطاء والسلبيات قبل وقوع الفاس علي الراس.
* نعم ويظل الهلال ملكا للسماء ولو اطلت مليون نجمة ونجيمة!!!!
لقاء كل يوم – قوون – عدد رقم 6500
ramadan9910@yahoo.com
يارمضان مالك زهجان وفى بطنك خمسة اقوان لازم تمشى امدرمان عشان الهلال خلاص بقى تعبان وكمان عيان
ياأبوياسين مالك شمتان وفى بطنك سبعة اقوان لازم تمشى امدرمان عشان المريخ خلاص بقى خرمان وكمان سكران