معجون مبروك

[ALIGN=CENTER]معجون مبروك !! [/ALIGN] * تتناقل منتديات الانترنت الكثير من القصص والحكايات والتعليقات والتعريفات الطريفة وهى تعبر بشكل عبقرى عن كثير من احوالنا التى تعجزعن التعبير عنها آلاف المقالات وملايين الكلمات، وقد خصتنى احدى الصديقات بإحداها، فأحببت أن اشرككم معى فى الاستمتاع بها بعد قليل من التعديل حتى تصلح للنشر، أرجوأن تكون خفيفة عليكم وانتم تستقبلون العطلة الاسبوعية، علما بأننى لا أتفق مع بعض ما جاء فيها .
*عندك شهادات وواسطة: حبابك ألف.
ماعندك شهادات وعندك واسطة: برضو حبابك ألف.
عندك شهادات وخبرة وماعندك واسطة: سيب رقم تلفونك في الاستقبال.
ماعندك شهادات ولا واسطة: اتكل على الله واشتغل رعاشة.
* صوتك حلو: تبقى فنان.
صوتك شين: برضو فنان.
سمج( بالجيم) و دمك يلطش و تجيد فن مصمصة الشلاليف و غرويد العيون والآآآآآآآآآآآآت: انت مذيع.
* سمحة ومسطحة: مذيعة.
بطيئة ومسيخة: مضيفة جوية.
عدم احساس وجلد تمساح: ايه كده اير.
قنعان من الدنيا و عايز تدعم المنتج المحلي: تركب الطيارة الواقعة فوق دى!!
* سبعة صنايع و البخت ضايع: موظف حكومة.
سبعة صنايع و البخت رائع: موظف فى شركة اتصالات.
امك داعية ليك: موظف في دال.
رجل المستحيل: موظف رب أسرة
المستحيل بي عينو: ان تعول أسرة وانت موظف.
عزيز قوم ذل: طبيب.
مصاص دماء: مسؤول محلية.
*مدمن هزائم: لاعب كرة
يا خسارة قروشى فيك: محترف
مغفل نافع: مجنون دخول مباريات
غنى حرب: أنطون
لا علاقة له بالرياضة: رئيس نادى رياضى كبير
* خالى مسؤولية ومستجد نعمة: مسؤول.
عمرك فوق المية (ديناصور) ولسة شغال: سياسى.
كترتا ومسختا: مستشار.
عايز تشتهر: تشتغل رئيس حركة لتحرير السودان.
حمار شغل: الفئة دي ما عندنا.
* مضغوط ومعجون ومعفوص وممغوس وموجوع ومرقع وجيعان وقرفان ورمدان وفلسان و كهربتك خاشة بى خرم الابرة ومويتك مطينة بى طين وموبايلك قاطع وغالبك التسوي: مبروك انت مواطن صالح.

drzoheirali@yahoo.com
جريدة السودانى ، 23 أكتوبر، 2009