بدل دواليب



شارك الموضوع :

بدل دواليب


الكثير من القراء والأصدقاء طلبوا من العبدلله أن يكتب عن (عقد المسئول) الذى أحدث ضجة في كافة الأوساط وبعد إطلاعي على صورة العقد وجدته عقد أقل من عادى فى دولة (بترولية) تشهد نهضة إقتصادية كبري وتحسناً واضحاً فى كافة أوجه الحياة المختلفة من صحة وتعليم وخدمات وإرتفاعاً ملحوظاً في دخل الفرد فأيه يعنى لمن مرتب (الزول ده) يكون 18 مليون فى الشهر
؟ يعني 600 ألف فى اليوم .. يعنى أيراد 6 روزات 30 راكب (الكلاكلة السوق الشعبي) أيراد صافي لا فيهو حق (السواق) ولا (الكمسارى ولا (الجاز) ذاااتو ! ولو الروزات دى ما عاجباك ممكن نقول ليك إيراد 30 (ركشة) بس في اليوم يعنى إنتا تكون قاعد كل يوم المغربية خاتي ليك كرسي قدام باب البيت وتجى الركشات (التلاتين) تجي تقيف تترصا قدامك وكل سواق يقوم يغمت ليك 20 ألف !!
أما (البدلات) فما شايف فيها حاجه (فايته الحد) فـ 90 مليون جنية بدل (عيد ضحية) أعتقد إنو مبلغ معقول خاصة مع إرتفاع أسعار (الضباحين) شوفو بس الضباحين ح ياخدوا كم لمن (سعادتو) يضبح ليهو 220 خروف مدوعل في العيد؟ أما 90 مليون (عيد الفطر) فأعتقد إنها (شوية) وأن سعادتو سوف يضطر (يتدين ليهو) شوية قريشات عشان المسألة تظبط معاهو لأنو الـ90 مليون دي يا دوبك تجيب ليها 500 كيلو حلاوة من النوع الفاخر و600 كيلو (خبيز) و800 كيلو (منين) و900 كيلو (بيتى فور) و750 كيلو (مشكل) و2500 صندوق حاجة بااااردة ..أما ما يتبقى فهو يخصص لصواني الفطور الما خمج والغداء (الضلع) والتحلية والعشاء !!
أما بدل الإجازة المقدر بـ 90 مليون فأنا شايفو معقول وبما إنو (صاحبنا) لابس تمام فما محتاج يشترى هدوم للسفر وبما إنو التذاكر مجانية لأبعد حته تمشيها الخطوط السودانية فهو أيضا ما محتاج يصرف من التسعين مليون دى عشان يقطع تذاكر ! طيب يعمل بيها شينوووو !! يتعالج بيها هو وأفراد أسرتو ؟ أكيد لا لأنو العقد بيقول إنو العلاج ليهو ولأفراد أسرتو مجانن !! خلاس نقول إنو ح يشترى بيها هدايا لأقاربه وأصدقائه وكده .. يعنى شوية قمصان على شوية مقاطع جلاليب وعمم على كم فتيل ريحة على كم ساعة يد على كم توب نسائى وكم بلوزة وإسكيرت والبفضل أكيد ح يدفعوا (وزن زائد) عشان الشنط وزنها ح يكون سته طن وشوية !
حكايت (البونص) يكون مرتب 18 شهر (يعنى 324 مليون) في السنة فما شايف إنو فيها مشكلة ما الموظفين الفي البلد ديل كوووولهم قاعدين ياخدو بونص آآآى نعم بيمشوا يشتروا بيهو بنطلونين تلاته أو يسددوا بيهو حساب (سيد البقالة) لكن برضو أهو إسمو (بونص) برضو !!
أما حكاية بدل اللبس دى فالعبدلله ما شايف إنو 76 مليون جنيه في السنة كتيرة فهى يادوووبك ممكن تشتري ليها 60 عمة توتال أصلي وارد اليابان و60 ملفحة (مطرزة) و120طاقية (منسج) و 84 سروال طويل وعراقى و 30 بدلة (ماركة) ما خمج و 160 فانيلة داخلية 160و 160شورت و140 بشكير و30 جوز (سفنجات) و75 بنطلون صوف إنجليزي (مع الخياطة) و75 قميص أفرنجى (كم قصير) و75 قميص أفرنجي (كم طويل ) و 75 كارافتة (إيطالي) و30 ساعة يد (سويسرية) و75 جوز (شرابات) معتبر و65 دستة (مناديل) و75 جوز أحذية إيطالي (جلد طبيعى) و 120 جلابية تترون ياباني (زبدة) جاااهزة (العمود باليد) وعدد30 جوز مركوب نمر (فاشري) وعدد 60 عصاية أبنوس فاخرة مذهبة (يتم رفعها في المناسبات عند ترديد هي لله هي لله )
كسرة :
أكيد (العقد بتاع السنة الجاية) ح يكون فيهو مرتب سته شهور … (بدل دواليب) !

الفاتح جبرا
ساخر سبيل
[email]gabra-media@hotmail.com[/email]

شارك الموضوع :

1 التعليقات

      1. 1

        جاءت بنات سيدنا عمر بن عبد العزيز في خلافته يطلبن من ابيهن نقودا لشرا ملابس للعيد فقال لهن أبيهن لاملك لي نقود لأعطيكنة إياه فقال له وزير ماليته لو شيئت لاستندك من بيت مال المسلمين علي ان ترده لي في اخر الشهر فما كان من سيدنا عمر الا وامسك بعنق وزير ماليته وقال له سكلتكة امك ياهذا وهل تضمن لي ان اعيش حتي اخر الشهر

        مهدا الي جميع شيوخنا الحرامية واقول تذكرا اليوم الاخر يوم تحشرون الي جهنم

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.