رأيت الرئيس في الحلم ..!

فلقد رأيت فيما يرى السرحان، الذي اهتمّ حتى اغتمّ حتى أسلم عقله وعقاله لفسحة الخيال..

أن الرئيس عمر البشير، كان في حشد جماهيري، لافتتاح مستشفى، أحسب أن اسمه مستشفى إبراهيم مالك، أو شيء من هذا القبيل..

الوقت كان رابعة نهار أو نحو ذلك، وقف الريس خطيباً مفوّها يطرب الجماهير وتطربه حماستهم المعتادة، فعمر محبوب الشعب، تحدث عن كلّ رأي موزون، ومما قاله، بعفويته المحببة تلك:

.. يا جماعة، البلد دي حقتنا كلللللنا، ما حقت فئة واحدة، عشان كدا ماعونا وقدحنا الكبير، أخير نمرقو بره، يكفي الناس كللللهم، الجوة والبرة إن شاء الله.

الليلة دايرين نعزم الكل، يقعدوا معانا، يكملوا حلقة القدح الواحد الوسيع دا، أولاد دارفور الشايلين السلاح، وناس مالك عقاروالحلو وغيرهم، ما دايرين ليهم المزازا دي، دايرنهم يجو يشاركونا بكرامة وشرف، دا ما قدحنا برانا، والبياكل براو بيخنق، نحن حقّ زول ما دايرنو، ربنا بسألنا منو، مش كدا يا خوانا؟.

(الله أكبر، تهليل، لا إله الا الله، وكأن البعض يمتعض ويستغرب من الكلام المفاجئ…)

عشان كدا بنقول لناس مالك عقار والحلو ومناوي وغيرم، انتو ما محتاجين لواسطات ومبعوثين ودول أجنبية، القدح دا انتو عندكم فيو نصيب، تعالوا اخدو نصيبكم بالعدل، وبما يرضي الله ورسوله، قلنا بما يرضي الله يا خوانا مش كدا؟ لأنو ربنا عندو حقّ أهم من حقوقنا.
الله أكبر، تهليل، لا إله إلا الله..

الليلة دي كان ناس كمبالا ديل دايرين يجونا حبابم، والله نرسل ليهم طيارة رئاسية تجيبم هنا، نفاوضم ونحسن إليهم ونكرمم، وما بنردهم خائبين إن شاء الله، كان دايرين الحق والعدل، وما عايزين يفرضوا رأيهم وتوجهاتم على غالبية الشعب.

لو دايرين نصيبم وبس.. بيأخدوهو كامل إن شاء الله، ومبادئ نيفاشا قاعدة إطار، ولو دايرين نصيب غيرهم، بنرجعهم تاني للخارج ما بتعتر ليهم قشة، وبنضمن ليهم سلامتهم تحت مسؤوليتنا، نحن ما ناس غدارين ولا خونة، وهم جربونا قبل كدا، وكانوا معانا هنا، عقار دا ما فاز في النيل الأزرق؟ غالطناو ولا منعناو؟، ورغم الأذى والخروج على العرف والكلام الما ياهو، صبرنا واديناو حقو كامل، لغاية ما براو اختار طريق العوجة، بركة الجات منو، حاول يخون، لكن شعبنا وجيشنا وأجهزتنا كانوا بالمرصاد.

هسع يا جماعة من واجبنا أننا ندعو الناس كلّهم للشراكة، بالعدل، ندعوهم لصياغة دستور مستدام شامل وجامع ومانع، ندعوهم للتنمية، وبناء المستشفيات والمدارس والطرق والمصانع، ندعوهم للانتخابات الحرة والنزيهة، وللخير والعمار، وترك الدمار، دا واجبنا ياخوانا، مسؤوليتنا أمام الله تعالى أولا وأخيراً، وكمان مسؤوليتنا أمام الشعب الاختارنا للواجب، دا حقهم وحقنا كلّنا.

الجماهير التي كانت تستظلّ بأكفها وبالتكبيرات، غمرتها الحماسة، والانفعال للكلام البسيط والمليء ( بالهمبريب) والتواضع الجم، والمفعم بالأمل وبالغد الأجمل.

وفجأة انتبه السرحان على صوت الأذان، الله أكبر، الله أكبر.

سيدي الرئيس، هلا أكرمت مواطناً له حقّ عليك، يريده منك في الدنيا قبل الآخرة، هلا بررت له حلم يقظته، بلا ضرر أو ضرار؟.

المشهد الآن
محمد عبد القادر سبيل[/JUSTIFY]