يااخوي الحاصل شنو !! .. إنت مش كنت مصور بتاع أفراح ؟
صحت .. الواثق ..! معقول .. شنو الوجاهة والنضافة دي !؟
رد : قول ما شاء الله ياخي .. إتفضل .
وبعد العناق والمجاملة حضر الفطور وتعطر المكتب برائحة السمك والجكن بروست والبارد .. والتحلية باسطة عدييل كدا ، وشاي منعنع .
وبعد ان إرتحت على الكرسي الوثير وجغمت من موية الصحة ، سألت الواثق . يااخوي الحاصل شنو !!.. إنت مش كنت مصور بتاع أفراح ؟
رد الواثق : أيوا لكن هسع فتحت شركة الواثق للإعلان والتوثيق .. قلت يا سلام شغال في الإنتاج الفني والدراما ولا الفيديو كليب ؟
رد : دراما شنو انت عاوزنا نبقى شحادين ولا شنو ؟ بعدين وينو الغنا البسوو ليه كليبات ؟ أنا يا سيدي شغال بوثق للمسؤولين الكبار ..
قلت : والمسؤولين بيوثقو شنو ..!!؟
الله .. كيف ؟ شوف اي مسوؤل اهم شئ عندو في البلد دي الكاميرا يعني لو مارق اي حته اول شيئ يتأكد من الكاميرا عشان يعرفوهو شغال لازم يتصور وهو حايم ويقص الشريط ولازم الشريط يعرض في القنوات عشان الناس يعرفوهو شغال ، وبنصورهم فتوغرافي ونوزع للصحف عشان كده علاقاتنا مع ناس القنوات والصحف سمن على عسل وبنمسح ليهم شنباتهم .
ونحنا شركتنا شغلها كلو مع المسؤولين وهسي إتوسعنا برضو ، لأنو أخوانا بتاعين البرلمان برضوا بحتاجوا يتصوروا في الجلسه ويظهروا في التلفزيون عشان ناس الدايرة يعرفوهو شغال ويرشحوه للمرة الجاية ، وده طبعاً عبر السفريات .
قلت ليهو : يسافروا داخل وخارج السودان .. يعني المسؤول لو ماشي اي حته لو الكاميرا إتأخرت ما بمشي عشان الناس لازم يشوفوه ويعرفوه شغال ، وطبعا الزحمة الجد لمن يكون في تغيير بتاع مسؤولين قريب ، والمسؤول سمع انو ح يغيروه ، طوالي يعمل ليك كم مؤتمر صحفي كدا عن منهجية العلم والعلماء في المصلحة بتاعتو وورشة عمل رفع قدرات العاملين بالمؤسسة وإجتماع لمسؤولي المؤسسة بالولايات ، وهنا شغلنا بكتر .. بنقوم بتوثيق كل كل النشاط ده وبنبثه في القنوات ، يقوموا الجماعة يقولوا الزول ده شغال ويخلوه في محلو . . ده طبعا غير زيارات الأجانب بناخد فيها بالدولار عديل كدا .
اقول ليك حاجة يازول هسع انا بحمد الله منتشر في كم مصلحة كده ، والله ما قادرين نحك راسنا ، اسمع انت مش عندك علاقة بالشغلة دي ؟ ما تجي تشتغل مصور معانا ، الشغل راقد والمسؤولين بقوا أكتر من المواطنين ، يازول اخير ليك من شغلتك الفارغة دي .
سألته : أها والجنس اللطيف كيف ؟!
ضحك الواثق وقال تقصد النسوان المسؤولات ؟.. ديل عسل بحبن التوثيق موت ، بس بتعبونا لانهم بهتموا بمكياجهم .
قلته : مكياج شنو ياخ ديل محجبات ؟
رد علي : الله ! الوش ده لازماه بودرة وحاجات تانية ، والكعكة … ما تنطط عيونك يازول ، الكعكة دي دردمة الشعر وراء الرأس لازم تكون مجيهة ولون الخمار مع التوب والفستان والحذاء ، عشان كدا انا عملت قسم بتاع مكياج تابع للشركة ، وبرضوا المسؤولين الرجال بهتموا بصبغة الشعر وحفحفة الشنب والدقن ..
قلت : حاجة غريبة ..
صحيفة حكايات
غدير ميرغني
[SIZE=3]ما جابوا من بعيد ,, قبل سنة علي عثمان جاء افتتح سوق نموزجي في شرق النيل على طريق القزافي والسوق لسا ما اكتمل لكن تشوف الافتتاح والصيوان والذبايح والبارد والساخن طبعا القنوات والصحف والمصورين ما يدوك الدرب تقول دا اكبر سوق في الشرق الاوسط ,, اليوم السوق تم بيعه وسوف يتم تحويله الى موقف مواصلات اتخيلوا وعلي عثمان اكون مفتكر السوق شغال والناس بتشتري وتبيع [/SIZE]
وهذاوجه آخر من أوجه السفه والبذخ الحكومي ولا حول ولا قوة الا بالله – اللهم ان الكيزان قد طغو في البلاد واكثرو فيها الفساد فصب عليهم صوت عذاب وكن لهم بالمرصاد
سلام عليكم
إنت ياجكايات صحيفة اجتماعية وما خايفة من وزيرة الرعاية الإجتماعية… ومش عارفة الزمن ده الفيل هو نفس ضله… ههههههههههه