بنحب من بلدنا

ما تزال ترانيمك وألحانك- وردي- لا تبارح دواخلنا الندية بالحزن واللوعة.. وها هي عاطفة غنيوة «بنحب من بلدنا» للشاعر الفذ «أبو آمنة حامد» وتردادنا لها:

بنحب من بلدنا ما من بره البلد

سودانية تهوى عاشق ود بلد

في عيونها المفاتن شيء ماليه حد

التوب المهفهف فوق أم الضفائر

والخد المعطر زي أحلى الأزاهر

والخطوة الأنيقة ترنيمة مشاعر

أنا بي كلو عمري بمشيلها وبسافر

مين في الدنيا أجمل من بناتنا

الليهن قلوبنا.. والفيهن صفاتنا

الكامنات في روحنا والعايشات في ذاتنا

في حلفا البداية.. أحلامي وهنايا

أنا عايش لحبي برايا

النافرة الأليفة ست روحي وهنايا

أنا لي في كريمة شايقية في شلوخها

نعتزَّ بي صفاتها ما بنجهل تاريخها

ماها المابية ريدتي ومو ياها المسيخة

في شندي العظيمة تلقى بنات جعل

واحدات في المتمة في لون العسل

النايرات خدودهن زي فجراً أطل

في سنكات بنعشق بت سمرا وأبيَّة

ترتاح في الضفيرة خصلاتها الغنيَّة

الوارثات جدودن في الجود والشجاعة

البظهر جمالهن من زمن الرضاعة

سودانية مية المية في ذوقها وطباعها

يا ناس أرحموني أنا قلبي في رفاعة

لوزة القطن اليانعة السمحة ونضيرة

تتنى الحليوة في مشية أميرة

أجمل حب عندي في قلب الجزيرة

لي في الغرب أغيد في دار حمر والبقارة

نحميها بسيوفنا تفاحها ونضارها

تسكرنا الليالي وتطربنا النقارة

آخر الكلام:

لي في جوبا ساحر تسلم لي خدوده

يمرح في غاباته ويسرح في مروده

حبي الغالي ليه ما بعرف حدوده
مع محبتي للجميع..[/JUSTIFY]

سياج – آخر لحظة
[email]fadwamusa8@hotmail.com[/email]