ده المجننا ذاتو

ما أن دخل الأسطي (عباس الحلاق) إلى منزله في مساء ذلك اليوم عائداً من المحل حتي بادرته زوجته (عواطف) وعلى وجهها تبدو علامات الجدية :
– كاتل ليا حيلك كده ونائم بالدولارات دي براااكا !
– دولارات شنو يا وليه إنتي جنيتي؟ أنحنا الدولار ده بي عينا ما بنشوفو ! إنتي قايلانا بنحلق لي خواجات
– بتشوفو ما بتشوفو (الحكومة) ما بتكضب
– والحكومة دي بتعرفني من وين كمان؟
– هي من ناحية بتعرفك بتعرفك بس كدي بطل الحركات بتاعتك دي وأطلع لينا بي كم ألف دولار كده من القاعد تحوش فيهم !
للوهلة الأولي ظن (الأسطى عباس) أن الولية قد أصابتها ملاريا بعد المطرتين (البوظو الدنيا) وجابو الناموس .. وإنو (الكلام الما ياهو) ده لابد أن يكون (هترشة ملاريا) وكده لكنها سارعت بالجلوس على أقرب كرسي لتشرح له الموضوع :
– إنتا قايلني بتبلا عليك؟ هسع قبل شوية دى ناس (الجزيرة) ديل جابو ليهم زول من ناس الحكومة إسمو منو كده عبدالعاطي قال متوسط دخل الفرد ألف وتمنمية دولار في الشهر ! أها بس وريني القروش دي بتوديها وين؟
– يا حاجه ناس الحكومة ديل مزرورين وقاعدين يهضربوا ساااكت ما سمعتي الزول القال قبل كم يوم إنو 85% من المتظاهرين ديل أجانب !
– يهضربو ما يهضربو أجانب ما أجانب ورينا الدولارات الحوشتهم لي هسه كم؟
– يا حاجة دولارات شنو؟ أنا هسه كان حلقتا (للأمم المتحدة) كوووولها بعمل ليا مليون جنيه في الشهر؟
– ما دي لعبتا .. ما لازم تدس الثروة دي يعني مع الدولارات دي عاوز تتعامل معايا بى شفافية ؟ .
هنا دخلت إلى المنزل جارتهم نعيمة زوجة (حسن سواق الركشة) وبعد السلام خاطبت (عواطف) قائلة :
– عليكي الله ما بلاقي ليا عندكم طماطماية طماطميتين ؟ كيلو الطماطم الليلة بقى بي خمسطاشر جنية !
– ويعني شنو كان بقى ما يبقى .. هسه لو بقى بي مية جنيه يعني شنو؟ راجلك ده ما بقبض ليهو في الشهر عشرة مليون بنات حفرة !
– (في إندهاش) : عشرة شنو؟ إنتي جنيتي ؟ وحات الله البيت عدمان نفاخ النار
– والله كان جنيت ما عارفة .. يعني عاوزاني أكضب الحكومة وأصدقك إنتي ؟
– والحكومة قالت شنو؟
– الحكومة قالت أي مواطن سوداني متوسط دخلو في الشهر 1800 دولار يعني عشرة مليون ! أها حسن راجلك ده ما سوداني وللا كمان من ال85% الأجانب !
– (هنا تدخل حسن) : يا عواطف ياخي ما قلنا ليك الجماعة ديل فقدو البوصلة وبقو يهترشو ساكت !
– (نعيمة) : هسه لو دي ما هترشة هسه (حسن) ده أيرادو بتاع (الركشه) في اليوم يعني بالكلام ده يكون تلتمية وتلتين جنيه هو أصلو سائق ركشة وللا أيرباص !
– شوفي يا نعيمة .. ركشة أيرباص أيركوولر غايتو الشئ الأنا عارفاهو الرجال ديل بطنم غررررريقة والحكومة دي ما بتكضب نصيحتي ليكي قبل ما تقطعي ليهو (السلطة دي) وتعشيهو أسأليهو بيودى القروش دي وين !
– (الأسطى حسن) : إنتي شنو شابكانا الحكومة ما بتكضب .. الحكومة ما بتكضب القال ليكي كده منو؟ هسه سمعتي ليكي بي زول نزل المعاش بيدوهو عشرة مليون ؟ سمعتي ليكي بي دكتور بيدوهو عشرة مليون ؟ سمعتي ليكي بي عسكري بيدوهو عشرة مليون؟ سمعتي ليكي بى ست شاي بتطاع عشرة مليون ؟ سمعتي ليكي بي مكنيكي بيطلع في الشهر عشرة مليون ؟
– أجي يا أخواني .. ناس الحكومة ديل مش مسلمين؟ كمان شفتو ليكم (مسلم) بيكضب؟
– (حسن ونعيمة بصوت واااحد) : ما هو دة المجننا ذاااااتو

كسرة :
قال رسول الله صلى الله عليه وسلم (أيكون المؤمن جبانا؟ قال نعم ! قيل له: أيكون المؤمن بخيلا ؟ قال نعم ! قيل له: أيكون المؤمن كذابا ! قال لا ) .. رواه مالك .. ده كلام سيد الخلق يعني ما كلام (الفاتح جبرا) وبقية الأجانب !

كسرة ثابتة :
أخبار ملف خط هيثرو العند النائب العام شنو(ووو و ووو)؟
[/JUSTIFY]

الفاتح جبرا
ساخر سبيل
[email]gabra-media@hotmail.com[/email]