يوميات سائق مركبة

مازال في جيبي ثمن الوقود الذي سأمسح به الطريق لعلي أجد «زبوناً» في مشوار مجزٍ فيكون بذلك «زبوناً مليحاً».. اترصد الواقفين على جنبات الطريق لعل أحدهم يتحرك ويرفع يده أو يومئ بحركة تفيد بطلب الأجرة والمشوار.. كثيرون أحس بعبوس وجوههم وضيقهم، وكثيراً ما كنت «أخفف دمي شويتين» فإن رفعت أحدهن يدها لتسوية وضع طرحتها أو الشال الذي تضعه على كتفها أدعي أنها رفعت يدها لإيقافه أوقف أمامها وتترأى لي في ذلك مواقف.. فمنهن من تخجل وتطلب المشوار، ومنهن من تهب في وجهي «هبة الأسد» وتسمعني من الكلمات ما يحمل كل البذاءة واللوم ولأني في داخلي «أعرف خطأي امتص الكلام الجارح بلا جراءة الرد.. )وأحياناً يكون الرد لطيفاً) سوري حصل مس اندرستاند، أنا بصلح في طرحتي ما قاصدة أوقفك)..مع كل ذلك الدفق الكلامي فإنني اتحاشى الرجال في مثل هذه «الحركات) فأنا أخاف أن أصادف «فورة» أحدهم فيجد فيني فرصة العمر.. من قبل تلاقت «شلاقتي» مع حالة رجل «زهجان جداً» فصب علي جام غضبه، بل كاد أن يضربني لولا تدخل المارة.. لكن لا بأس من قليل من «الرشاقة التي لا تقتل إشراقة».. هذه الأيام اترصد النسوة الذاهبات للأسواق لأنها فرصة طيبة لتأجير المركبة، فالجو رمضان والواحدة منهن تخاف من «الجرجرة» في المركبات العامة.. أعرف أنهن يحببن السوق كحبهن لأولادهن وبناتهن، أنتظر في طرف السوق، وامتنع عن مشوار «العشرة والطاشرات.. » أما عشرين فما فوق، وحجتي قوية فلا أعطي الواحدة فرصة.. البنزين نار.. الدولار نار.. سعر الصرف مرتفع رغم أنني لا أعرف ما هو سعر الصرف، لكني أعتدت أن أقحمه في المفاصلة أو المفاوضة المشوارية.. وأمازج ذلك بشيء من حكمات الاستحسان والغزل اللطيف «ياستهم اها على وين .. يا أميرة الشباب المشوار دا ماجامد شديد.. والله يا أستاذة انتي ست العارفين.. والله عصرتي علي شديد لكن عشان هيبتك دي باكلوها في اللبادة.. والله الزيك دا مفروض عربيتو في سنتر السوق، لكن نقول شنو مابتدي حريف.. تمام السعر البتقدريه إنتي أنا برضى بيهو.. يا سلام لولا الملامة والأولاد المنتظرين في البيت أوصلك مجان.. أنا لاقي ست البنات تشرف عربيتي بركوبها)..وفيض من العبارات التي أصبحت بارع فيها، مداخل للمؤانسة خلال المشوار أصبحت اتقنها تماماً.. «والله البلاد مولعة نار… الأسواق بقت ما بتنبهش.. هسه زي كيسك دا كان زمان يكلف حاجة بسيطة.. هسي تلقيهو بالشيء الفلاني».. فتتكرم «الزبونة» بالمداخلة «والله بالجد.. شفت فستان وطرحة وثوب كلفوني بالميت كده خمسمائة، حاجات قبل شهر كان ممكن تشتريها بربع التمن لكن نقول شنو.. يازولة ربنا يلهم الناس الصبر.. شوفي حالنا وقف كيف مع الأسعار دي.. بالجلالة حتين الله يكرمنا بذبون يقدر الوضع زيكم كدا…» (أهاهاها) ..(وهي هي هي) و(أها ها ها) وآخر جرجرة وفضفضة تنتهي أحياناً بأنني جاهز لأي مشوار ود تلفوني دقي علي طوالي تلقيني جنب بيتكم ياستهم»..

آخر الكلام: واختم مشواري بعبارتي الشهيرة «ياستهم دي ما شغلتنا لكن الظروف جبرتنا».. يازولة أنا خريج وحاصل على الامتياز لكن نعمل شنو زي ما قلت ليك ما بتدي حريف..
(مع محبتي للجميع)
[/JUSTIFY]

سياج – آخر لحظة
[email]fadwamusa8@hotmail.com[/email]