أموت وأعرف

أعرف كثيراً من الأسر بناتهن تجاوزن الأربعين ولم يتزوجوا؟ أموت وأعرف النسبة الحقيقية التى بلغتها العنوسة؟ (عشان نعرف مدى إستطاعتنا لمباهاة الأمم وكده) ؟
كل ما تسأل عن مسئول يقولو ليك مشي (ألمانيا يتعالج) أموت وأعرف المسئولين ديل بيمشوا يتعالجوا في ألمانيا بالذات ليه؟ (سويسرا مالها؟)
أموت وأعرف اللعيبة بتاعين الكورة بيحتجوا على قرار الحكم عندما يقرر ضربه جزاء؟ (شفتوا ليكم حكم غير رأيو )؟
كلف خزينة الدولة حوالى ستة ملايين (دولار) .. أموت وأعرف هل تحرك (اليخت الرئاسى) وللا قاعد في بكانو؟
العلماء بيتكلموا طوالي عن حشمة وزي المرأة أموت وأعرف ليه ما بيتكلموا عن حشمة زي الرجل؟ (يلبس على كيفو يعني؟)
الختان الفرعوني ، ايقاف بث برنامج اغاني واغاني ، سحب صور النساء من الشوارع الرئيسة ، نصح الشباب بالتعدد في الزيجات، منع دخول المغنية المصرية شيرين للبلاد ، شورت لعيبة الكورة ، شفط الأجنة وأخيراً الكوندوم هذه بعض القضايا التي أثارها النائب البرلماني دفع الله حسب الرسول والذي علمت أنه (أستاذ جامعي) .. أموت وأعرف (تخصصو) شنو؟
أولادنا الفنانين بيهتموا بالشكل بتاعهم .. يوم مشاط .. يوم سلاسل .. يوم شنو ما بعرف أموت وأعرف دخل الحاجات دي في الغناء شنو؟
لا توجد كراسي للإنتظار في مكاتب بلاغات كل أقسام الشرطة السودانية ؟ أموت وأعرف الحكمة من القصة دي شنو؟ (أفرضوا جات عشرة بلاغات في وكت واحد مثلاً)
الكهرباء بتاعتنا ما عاوزة تستقر ليها أربعين سنة؟ أموت وأعرف الخلل وين؟
مويتنا تقطع وكان جات تجي مغبشة وعكرانة؟ أموت وأعرف الدول الما عندها أنهار دي بتعمل شنو؟
المواطن بيتعالج بقروشو .. يعلم أولادو بقروشو .. يسكن بقروشو .. ياكل بقروشو .. يلبس بقروشو .. يشيل نفاياتو بقروشو .. يشرب بقروشو .. يتنقل بقروشو .. يتقاضى بقروشو .. أموت وأعرف الحكومة دي بتعمل في شنو؟ تنظم في الحركة؟
أصغر (حلة ملاح) بقت عاوزه ليها 50 ألف .. أموت وأعرف مع الغلاء ده الناس المعرسين ليهم أربعة نسوان وفاتحين ليهم أربعة بيوت ديل قاعدين يصرفو عليهم كيف؟
تفتح أي صحيفة تلاقي صفحة لأخبار الحوادث والجرائم .. وهنالك صحف متخصصة (في الحاجة دى) أموت وأعرف ما فوائد ومغزى نشر الصحف للجرائم .. يعني شنو (القبض على لص تسور حائط منزل؟)
ذهبت لتجديد (لاحظ تجديد) رخصة قيادتي منتهية الصلاحية فوجدت أن الرسوم 150 ألف أموت وأعرف إرتفاع قيمة الرسوم دي سببها شنو؟ (المواد غالية مثلاً) !!
مذيعاتنا الفضائيات بالذات غير مقنعات على الإطلاق (شاهد الجزيرة وإنتا تعرف) .. أموت وأعرف على أى أساس يتم إختيارهن (طبعن لو في أساس من أساسو)
سائقو (الحافلات بالذات) لمن يشوفوك عاوز تدخل الشارع بيزيدو من سرعتهم .. أموت وأعرف القصة دي بتحصل ليه؟ وهل كووولهم متفقين مثلاً السلوك (الردئ ده؟)
شوارعنا تعاني كثيراً من الحفر ورداءة الأسفلت .. أموت وأعرف بترولنا ده (الزفت بتاعو) بيروح فين؟
الـ 50 ألف دولار الذي منحها ديوان الزكاة (تبرعاً) قبل أكثر من ست سنوات (لقناة الضحي) الفضائية (الما قامت) .. أموت وأعرف الحصل فيها شنو؟ هل تمت إستعادتها وللا خلاس (نحتسبها) وكده ؟ !!
ما أن تظهر فضيحة فساد (بالصدفة طبعن) حتى يبادر المسئولون بحظر النشر عن ملابساتها .. أموت وأعرف شنو الحصل في كل (الفضائح) التي تم حظر النشر فيها؟ لا أعتقد أنه لا توجد في كل (الأقطان) أقصد الأقطارحاجة زى دي !
الخريف تقريباً إنتهى .. أموت أعرف هل الخريف الجاي ح يجي برضو (فجأتن) !
الحد الأدني للأجور الآن حوالي (ستة كيلو لحمة) .. أموت وأعرف ح يحصل (نص كيلو) متين؟
لا يوجد إبن مسئول واحد غير ناجح أو عاطل .. أموت وأعرف الذكاء (الجماعي) و(التوفيق) ده بيحصل كيف؟
جاء في قانون مكافحة التبغ الذي نشر مؤخراً أنه قد تم رصد حافز مالي لكل من يبلغ عن المخالفين .. أموت وأعرف الحافز ده (كم) عشان دي (شغلانه) مش بطالة !

كسرة :
أموت وأعرف ما هو شعور النائب العام وهو يطالع كسرتنا الثابتة و (واواتها) تقترب من الرقم (عشرة) !!

كسرة ثابتة :
أخبار ملف خط هيثرو العند النائب العام شنو(ووو ووو ووو)؟
[/JUSTIFY]

الفاتح جبرا
ساخر سبيل
[email]gabra-media@hotmail.com[/email]