اشتياق خضر: امركم عجيب يا ناس الفيس وحيرتونى معاكم .. أها اعمل ليكم شنو .. اقع اكسر رقبتى ولا اخلى لييكم الفيس .. ؟!!

اتوالت مُجريات الكتابات والتجاوب لحدى ما جات مرحلة اتحولت فيها لمجريات احداث , لما ساهمت مع تانين فى كشف زيف شخصية مُحددة كان عندها تأثير فى عالمنا الاسفيرى دة .. ولانو الصدمة كانت كبيرة وفى ناس ما قدرو يصدقوها ولا يستوعبوها فى وقتها , ولانو الناس التانين الساهمت معاهم فى كشف الزييف كانو ناس معروفين فى الواقع , ولانو انا ما كنت معروفة للناس فى الواقع الا للناس الاصلاً بعرفونى من زمان قبل ما اهاجر من السودان والهم طبعاً ح يكونو بمثلو نسبة بسيطة اذا قورنت مع عدد الاكثر من 4 ألف صديق المُضافين معاى .. بدأو الناس الما بعرفونى يتساءلو .. وانتى زآآآآتك منو يا اشتياق .. ؟!!
اتجاهلت السؤال واتجاهلت الاستفزاز الحسيتو من طرحو , وطنشت وما جاوبت عليهو .. !!

انتهت الضجة العملها الحدث , ورجعت لى كتاباتى زى زمان ورجع الحال زى ما كان زمان .. مر شهرين بس , وعملت حوار مع جريدة كان ليها دور فى بعض الاتثار ايام ضجة كشف الزيف .. اتواجهت بى هجوم عنيف من اصدقائى القاعدين معاى فى نفس المُعسكر ونفس الخندق اكتر من اعدائى واعداء اصدقائى نفسهم , حتى من غير ما يكلفو نفسهم ويقرو الحوار ويعرفو انا قلت فيهو شنو , ويعرفو انو ممكن يخدم شنو .. دة غير الاساءات والاتهامات بى انى نرجسية ومغرورة وبحب الظهور .. وما فهمت انى نرجسية ومغرورة كيف وانا ما عندى اى علاقة شخصية مع الناس القالو عنى كدة وما بينى وبينهم عشرة او مواقف حياتية عشان تخليهم يعرفو غرورى ونرجسيتى ولا حتى عندى تواصل بالشات مع الناس هنا الا مع الناس الاصلاً بعرفهم وبعرفونى , عشان تكون اتخلقت بينى وبينهم اى نوع من نوع العلاقات الانسانية عشان انا أمارس فيها غرورى ونرجسيتى , وكل البعملو فى المساحة البتجمعنى وتجمعهم دى انى بكتب زيهم وبس , وتجاوب الناس مع صفحتى , دى خياراتهم هم , انا ما عندى فيها يد ولا شايلة لى سوط لى زول ولا بدفع لى زول قروش عشان يجى صفحتى بى لايك او مشاركة بالتعليق .. قبلت هجومهم واتعاملت معاهو بكل مرونة باعتبار انو , لو انا ما كنت بهمهم وانى عندى تأثير وانهم بيأملو فينى الكثير وانهم عندهم عشم فينى , ما كانو اهتمو كل الاهتمام دة واتوافدو على صفحتى بالميات عشان ينتقدونى بغض النظر اذا كان النقد موضوعى ولا هدام , مع انو قرار انى اقبل حوار مع جريدة او اى جهة اعلامية واياً كان تصنيفها , دة قرار بخصنى انا بس وانا البقدر قبولى او رفضى .. ومع انو الاعلام وسيلة من الوسائل البوصل بيها الناشط صوتو وقضيتو وما غاية ليهو زى ما ممكن تكون غاية لى باحثين الشهرة .. والغريبة انو برغم كل الهجوم الحصل هنا .. العدد الاتنشر فيهو الحوار من الجريدة كان اتباع كلو فى كل المدن البتتوزع فيها الجريدة او فى معظم المدن من غير راجع والمدن الما اتباع فيها كلو , كان الراجع قليل .. اخوى فى مدنى , مشى عشان يشترى العدد , ما لقى منو نسخة فى السوق ولما مشى المكتبة ما لقى راجع .. يعنى حوارى مع الجريدة كان عندو ردود فعل ايجابية اكتر من الحصل هنا , وكان عزائى انو الرسالة الحبيت اوصلها لى اهلى الهناك والما عندهم علاقة بالنت وصلت وهم استقبلوها بكل فرح وترحاب ..

المهم انو معسكر الاعداء انتهز الضجة دى وبدا يصطاد فى الماء العكر ومع ظهور تساؤل , انتى زآآآتك منو يا اشتياق ؟! تانى على السطح , بدا عدوى وعدوكم فى حملة تشكيك بتستهدفنى .. حاولت اتجاهل الحملة وحاولت اتجاهل سؤال , انتى منو الكان بنطرح بى الحاح ؟! لكنى ما قدرت اصمد قدام تصاعد حملة الاعداء والحاح واصرار تساؤل الاصدقاء لما بقيت بين مطرقة العدو وسندان الصديق .. وطبعاً , فى دة كلو الناس البعرفونى معرفة شخصية والبعرفونى كويس سواء من الواقع او من هنا وبينى وبيناتم بتتوفر ثقة ما محسوبين .. قلت لى نفسى .. اوكى يا اشتياق .. اقطعى عرق وسيحى دمو وقولى للناس انتى منو ووقفى الجدل دة .. وبرضو من حق الناس الما بعرفوك يعرفو انتى منو .. ومن حق الناس البجو صفحتك وبتابعو كتاباتك ويتجاوبو معاها وحريصين على متابعتك وحريصين عليك , يعرفو انتى منو .. وقلت انا منو وتاريخى , وانتمائى شنو , واهلى منو , وتاريخهم ودورهم عشان اقطع الشك باليقين والما بعرفنى يمشى يسأل منى .. وبرضو ما عجبكم وانتقدتونى تانى .. لييه تورينا هى منو ..؟! المناضل الصحى , ما بقول هو منو ولا بقول هو عمل شنو .. وتورينا اهلك منو لييه ؟! ليس الفتى من يقول كان ابى , ان الفتى من يقول ها انا ذا !! ويعنى شنو كان ابوك كان عندو تاريخ مشرف ومعروف ويعنى شنو انو اولاد وبنات اخواتك نشطاء ؟! ويعنى شنو لو اهلك وطنيين ؟! موريانا لييه ؟! المناضل الصحى , ما بقول هو منو ولا اهلو منو ولا عمل شنو ولا اهلو عملو شنو .. انتى زولة عاوزة تظهرى وبتحبى الشو .. !! ويمر شهر واحد بس ويتكرر مسلسل كشف الزيف ويرجع تانى التشكيك ويرجععو تانى يطالبوك بالاجابة عن السؤال الانتقدو اجابتك ليهو قبيل .. انتى منو زآآآآتك يا اشتياق خضر ؟!
أمركم عجيب يا ناس الفيس وحيرتوووونى معاكم .. أها اعمل ليكم شنو .. اقع اكسر رقبتى ولا اخلى لييكم الفيييييس .. ؟!!
Eshtiag Khidir