سنة حلوة يا جميل
والعالم يستقبل عامه الجديد .. أبت (أمنا الحكومة) إلا أن تهدي المواطن (ميزانيتها) لهذا العام المقبل 2013 وهي تغني له كعادتها سنة حلوة يا جميل !
بالفعل هو مواطن (جميل) بل هو أجمل مواطن عرفته (الأوطان) منذ أن خلق الله الأرض وما عليها فهو أى المواطن من (جمالو) فهو لا يتعب نفسه بمعرفة أن كانت هنالك (ميزانية) من أصلو .. بل ويعتقد جازما (من شدة سذاجته) أن الحكومة شغالة بدون (ميزانية) بل بدون (أقلام ودفاتر) وإنو المسالة ماشة ساااااكت .. فالمواطن (الجميل) يسأل نفسه في غباء يحسد عليه .. كيف يمكن لدولة أن تضع ميزانية وكل مسئول فيها (مجنب) ليهو (كوم قروش) وقاعد عليهو ؟ شئ بالعملات المحلية وشئ بالعملات الأجنبية وشئ بالما عارف شنو؟ كبف يتم وضع ميزانية وهذه الأموال (الما معروفه) خارج الميزانية؟
بالطبع سؤال (المواطن الجميل ده) لا يمكن أن يرد عليه مسئول (أياً كان) كما لا يمكن أن يرد عليه أي من نواب البرلمان الذين (صفقوا) من قبل عند زيادة أسعار (السكر والوقود) ! بالمناسبة من باب التغيير وكده المرة الجاية عاوزين نواب (يزغردوا) !
سنة حلوة يا جميل سنه حلوة يا مواطن .. فالموازنة العامة (أم تجنيب) يا مواطن تشير إلى أن معدلات (النمو الإقتصادى) فى إزدياد .. ليس بالضرورة أن يظهر لك ذلك على تفاصيل حياتك المعيشية .. وإن كنت تظن أن معدلات النمو الإقتصادى من الضرورة أن تظهر على مستوى حياتك المعيشية فأنت لا محالة جاهل (وعاوز ليك درس عصر) ولا تفقه في قوانين الإقتصاد فمعدلات النمو الإقتصادى (يا جميل) حسب قوانين (مندل) لا تظهر إلا بعد الجيل السادس على أقل تقدير ، ومسألة إنو المسئولين ديل (يوروك) إزدياد معدلات النمو المسألة دي الغرض منها إنك تكون فى الصورة وتطمئن على أنو المسألة (ماشة كويس) وأنو (حفيدك) السادس عشر سوف تظهر عليه علامات الثراء (غير المفاجئ) إذا مد الله في ايامك و(قرونك) .
سنة حلوة يا جميل .. فقد فاقت المصروفات (كالعادة) إجمالى الإيرادات مما جعل هنالك عجزاً مليارياً سوف تقوم الحكومة (يا عينى) بسد هذا العجز .. طبعاً شئ إستدانه وشئ قروض وشئ شنو ما عارف وأنت يا (جميل) قاعد متهنى ومستريح ولا عليك والحكومة مشلهته تستدين من هنا وتخش فى (صناديق) من هناك وتتعب تعب السنين وترهق روحا علشان تسد عجزك وعجز اللى خلفوك !!
سنة حلوة ياجميل فقد ركزت الميزانية (كعادتها) فى الصرف على الأمن والدفاع (بالنظر) على حساب الصحة والتعليم .. تعليم بتاع أيه؟ وصحة بتاعت أيه؟ أفرض إنك بقيت (عالم ذرات) وصحتك ذى (الحصان) شنو يعني لو ما كنتا (آمن) ؟ ما لازم (أمنا الحكومة) تضمن ليك وتضمن (ليها) إستتباب الأمن وتوفر ليك (آليات) الدفاع عنك يا جميل ضد أى (غزو خارجى) حتى لو يتطلب منا (إسبوعين) لمعرفة أن كان (بالطيارات) الطافية لمبة وللا (بالصواريخ) ماركة (أبولمعة) !
سنة حلوة يا جميل .. فقد ضمنت لك الموازنة الجديدة بأن راتبك سوف ينفذ من يوم خمسة فى الشهر بعد أن جاء فيها عدم وجود أى زياده فى مرتبات العاملين بالمؤسسات الحكومية .. يعني كل يوم الأسعار زايده (وربع البصل حصل 30 ألف) ومرتبك في (محلو) .. نصيحتي ليكا (أربط الحزام) .. معليش مفيش حته يربطوهو فيها بس (إنتا أربط) !
سنة حلوة يا جميل .. والميزانية لا توجد فيها فرص (وظيفية) .. معليش (أمنا الحكومة) عملت ليها ستمية ألف جامعة لكن (ما ختت بالا) من حكاية (التوظيف دي) .. إحتمال كانت مفتكرة المسألة (تثقيف) ساااكت .. معليش يا (جميل) صرفتا دم قلبك في تعليم الأولاد و(بعتا) الوراك والقدامك لحدت ما إتخرجو لكن ما مشكلة إشتري لكل واحد منهم (درداقة) وخليهو يخش السوق .. وللا أقول ليك بلاش عشان مافي ليهم طريقة .. (المحليات إستولت على الدرداقات وكده) !
سنة حلوة يا جميل .. عموما يا (جميل) .. خليك متفائل .. أمنا الحكومة دي عارفه ربنا كويس .. وما بتعمل إلا بما يمليه عليها ضميرها ، والناس العملو الميزانية دى أكيد عارفين أكتر منى ومنك إنو المسألة دى ح تصب فى النهايه فى مسألة إزدياد (معدلات النمو) والتى سوف (تصب) فى النهاية فى مصلحتك ومصلحة أحفاد أهل الخلفوك يا جميل !!
يا جميل حقو تحمد الله وتبوس إيدك وش وضهر علشان (حكومتك) حكومة (إسلامية) وبنعمل بما يرضي الله ورسوله .. هسه لو كانت (حاجة تانية) كان موقفك يكون شنووووووو؟ ياخ إستهدي بالله وخليك متفائل .. وسنة حلوة يا جميل !!
كسرة :
لا بصحيح .. أموال التجنيب دي بره (الميزانية) وللا جوه (البنوك) وللا وضعها كيف؟
كسرة ثابتة :
أخبار ملف خط هيثرو العند النائب العام شنــ(12+1)ــــو؟
[/JUSTIFY]
الفاتح جبرا
ساخر سبيل
[email]gabra-media@hotmail.com[/email]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
[B]عز الشـــــــــــــــــــعوب أوطان[/B]
اسمحوا لي يا أحباب
اسمعوني يا الأصحاب
الزول نصيح
والله ما مجنون
لا مسحور ولا معيون
بس زولاً
علي حال البلد مغبووووون
داير أقول وأقول وأقول
لما يغلبني القول
السودان …
مما اتولد معلول
ليه يا ناس مرضو يطول ؟!
وفيه فساد
بالعرض والطــــــــول
والرجال في البلد أبطال
الحرب لما يدقو ليها طبول
رجال بلدنا
بنزلوا الميدان
زي الأسود تصول وتجول
ويا عجبي !!
كيفن لي هسه مالقولو حلول ؟؟
بلدي
عمرو يوم ماشاف العافية
يلف ويدور زي الســــــاقية
عشنا … ولسه نعيش
فيهو المر ..
فيهو السنين القاســـــــية
و إيه راح يحصل في أيامو الباقية؟
ربك وحده عليم
بسنيناً جـــــــــــــــــــاية
والعجيب فوق ده وده !!
فيهو ناساً فاااضـــــــــــية !!
زي بوم الخراب
عملوها لينا أحزاب !!
أحزاب …احزاب
يارب تطير في داااااااهية
آآآآآآآآآآآآآآآآآآه
ده السودان الشقي بأولادو
الماااقعدوا في يوم اتهادو
ما حصل اتفقو
لا حلو مشاكل
لا قالو كدي
خلي نسوي مــــــــــرادو
زمانهم كلووو للفرقة ينادو
القصة بدوها
من جد أجدادو
شـــــــالوها منو ولادو
ولامن وصلت لي أحفادو
واتمادو واتمادو اتمادو
خربوهو… حرقوهو
مابقى لينا حتى رمادو!
ومن يوم قمنا
لقينا الحال ياهو ذاتو الحال
زمنن قصّر وزمنن طـــــــــال
راحت أجيال وهلت أجيــــــال
والحال ياهو ذاااتو الحـــال
لا لقينا سعادة
لا ذقنا نعيم
لا شفنا هناء
لا راحة بـــــــــــــال
بالله عليك …..
من وين تجي راحة البال ؟
بلدنا يبــــــــــــــاب
متقسمين أحـــــــــــزاب
ثغرات ونوافذ ومية باب
يمينك بــــــــــــاب
يسارك بــــــــــــــاب
قدامك وخلفك أبواب أبواب
من وين تدخل ؟
تختار اي باب ؟
لو شفت الموية
لاتجري وراها
بعدين …
تلقاها ســـــــــــراب
نحن الشعب
ياها بلد نا
بقينا فيها أغـــــــراب
مغلوبين !
حيرانين!
للحيلة عدمانين !
وبس قاعدين
نضرب ونقسم ونطرح
قاعدين قدام مسـرح
ناس بتمثل فيهو
هاااايصة وتسرح
ونحن نصفق ونضحك ونفرح
فصول وراها فصول تتفتح
ما هماهم مين ينداس
ماهم الأبطال !
ونحن الكومبارس !
معقول يا ناس ؟
ونسمع أصوات الجوقة
وهم ياهم آآآآخر روقة
آآآخ يا أنتو
ماهي حياتنا المسروقة !!
نشوف المشهد الأول …
نسمع جماعة تقول :
نحن ال…..ية !!
وبعد شوية الصوت يتحول
ونحن الوارثين تاريخ ال…..ية
ولوناً أحمر زي لون الدم
شايفنو هناك في الخلفية
يقولو ليك : نحن أتباع….
بنقولها وما خايفين
أيوة : نحن ال….ية
وفجأة …
يظهر مشهد في التمثيلية
قدامنا اتملت الخشبة !!
اتمدت عين وطالت رقبة !!
كل الجمهور واقف خلا الكنبة
قام على حيلو
والجوقة تغني
وهم بيشيلو
بقولو شنو ؟
وأصلا ديل كمان يا منو ؟
قالو
وبالصوت العااالي :
نحن ال…..ن !!
والناس سمونا ال…..ن
وهو في حد سائل
مين راضي ومين زعلان
تتعدد اشكال وتتبهرج ألوان
والمسرح مليااان
اسمع يا أخوي
حا أقول ليك
نصيحة مني إليك
أوعاك تنساق …
أوعة يغشوك
بالمال يرشوك
تصدق يا مبروك
كلو محصل بعضـــــــو!
مافيهم زول مهتم لأرضو
طلاب سلطة
أوعاك من غلطة
ترميك في ورطة
وتجيب ليك جلطة
نبه عقلك
ماتكون سهيان
فتح عينيك
لا تكون عميان
لا يغرك عنوان
مافي مبادي
باعوها زمااان
بي قوة عين
مافي زول خجلان
لفرعون اتباعت جملة
في سوق السلطان
وكان الوسيط هامان
والسوق حكمه الشيطان
وياحليييلك يا أخوي
وأنت قاعد تحلم بالأوطان؟
و مالو ? أحلم …أحلم
خلينا كلنا نحلم
الأحلام راس مال عشمان
والعيش حلم الجيعان
وقالوا زمان
خشم البقرة
يكوس فيهو الضهبان !
احلم احلم ياعثمان
وأنتي كمان يا بت عدلان
[B]هي الأحلام بقروش؟ [/B]
السراب موية المغشوش
حلات الحلم في عيون نعسان
وصدقني …
أحلامنا فيها أمان
بس أوعك نصحا
.لونحن صحينا !
يااااااااااااه
راح تلقى هموم بالكوم قدامنا
أحسن لينا نواصل نومنا
ونغرق جوة منـــــــامنا
النوم بدينا أحــــــلامنا
وأوعة من التفكير
خلينا نتابع أوهـــــامنا
نلقى عمرنا بيمشي
وتجري سريع أيـــــــامنا
أسلم لينا
بدل نقعد نجتر آلامـــــنا
وتشيل حمولاً فوق روسينا
تزيدنا غبن
و دربنا يطول
وتحفى وراهو أقـــــدامنا
وما ظنيت نصل لي شئ
ساااكت تروح أعمارنا
تضيع من إيدنا أعوامنا
وأخويا … ولد وطني
أملو كبير وراجي الخير..
قول ليا يا أنت ؟
[B]حصل ذقت لبن الطير؟![/B]
رضعتو أنت صغير؟
لاقاك وأنت كبير؟
قول ليا بالله
وين هن دلايل الخير؟
من الماضي ؟
ماضينا كلو مرير
من الحاضر ؟
حاضرنا رهين
في أيد الغير
ومستقبلاً مجهوووول
ما باين ليهو مصير
و ليه التشاؤم دة ؟
أنت براك عاين وشوف
البلد حاكماها ظروف
تلف وتلف وعليها تطوف
زي ليلاً ظلامو كثيف
وعشعش فوقا ضل الخوف
نقول بلوعة الملهوف
الصبح يجيها متين ؟
والله حقيقي ما معــــروف
وبرضو عاين شوف !!
قادتنا لسه متحــــــاربين
مرو سنين وجايانا سنين
وبرضو القادة متناحرين
كل واحد…..
شايف أنو ياهو الحق !
والباقي غلطانيييييين !!
ويمر العام بعد العام ( للأمانة مقتبس من الشاعر المصري فاروق جويدة)
تباعد بيننا الأيام
وتدمى جراحنا بالآلام
وتشقى نفوسنا بالأوهام
ودايماً هنااااك واقفين
ما في خطوة لي قدام
خطواتنا ….
ديمة عليها مرتدة
بعييييدة …
مد البصر ممتدة
وااسفاي ثم وااسفاي وااسفاي
كل يوم لي ورا … وراجعييين
ومختلفين
ومتكاتلين
سنين وسنين
ساخطين وقرفانبن
بس لمتين ؟ وبس لمتين ؟
خلااااص ما بقى عندي كلام
كل واحدن حر …
راضي أو غضبان
مؤمل أو قنـــعان
صاحي أو حلمان
يحلم متل مايريد…
[B]هي الأحلام بقروش ؟ [/B]!
أحلم كمان وكمان
ياااأخويا …. يا العشمان
يرجع لك متل ماكان
بلدن رفيع الشان
بس بذكرك يا أخوي
لو صابك النسيان
المثل بيقول :
عز البحر تمساح
وعز الخيل لجم
وعز الحريم وليان
أزيد عليهو وأقول :
عز الشعوب أوطان
وماتنسوا ياأخوان
عز الشعوب أوطان
عز الشعوب أوطان
وطني ياهو يا السودان
نفسي مسكونة بالسودان
وروحي تعشق السودان
عز الشعوب أوطان [B]
وعزي فيك يا سودان
قبري في تراب بلدي [/B]
وبلدي ياهو ده السودان
ههههههههههههههه الله يجازي محنك ياجبرة
والله يجبر كسرنا جميعا