الفاتح جبرا
من غير ملامح
أو ذلك المثل المدمر الذي يدعو إلى توسيع دائرة الإتلا ف لمجرد العجز عن الإصلاح وهو ذلك المثل الذي يقول (كان غلبك سدها وسع قدها) والذي لو قدر له أن يترجم لأي من اللغات العالمية لإحتارت كل شعوب العالم فينا فما من شعب عاقل بالغ رشيد يمكنه أن يفكر هذا التفكير المجنون
ومن الأمثلة التي لا تقل هدماً عن المثالين السابقيين ذلك المثل الذي يقول (الفي أيدو القلم ما بيكتب روحو شقي) والعبدلله يعتبر هذا المثل بلاء محض و أساس للفساد كالمحاباة والتزوير والمحسوبية و(اللغف) و (اللهط) كما إن العبد لله يتهم هذا المثل إتهاماً صربحاً بأنه وراء كل التدهور والمعاناة التي نعيشها لأنو معظم المسئولين فيما يبدو ما صدقو والأقلام كلها شغاله تكتب سعيد .. سعيد .. سعيد !
الأمثال الضارة والهدامة كثيرة ولكن هنالك بعض الأمثال ذات المعاني الكبيرة والمغازي التي تنم عن بعد نظر وأفق واسع وخبرة وخيال ومن تلك الأمثال ذلك الذي يقول (أسمع كلام الببكيك ما تسمع كلام البيضحكك) هذا المثل إن حاولنا تفكيكه لوجدنا أن هنالك شخص يواجه معضلة وشخص أو جماعة بيقولو ليهو كلام بيبكي (أي حديث قاس وصعب على عكس قناعاته) وآخرين بيقولو ليهو (كلام يضحكه) أي أقرب إلى قناعاته ويتماشى مع طريقه تفكيره لحل القضية او المعضله والتي ح يوديهو (ومن معه) في ستين الف داهية !
طيب الجماعة البقولو الكلام الببكي ديل منو ؟ وليه بيقولو كلام بيبكي؟
دائماً ما يكون ناس الكلام (البيبكي) والذي هو عكس ما يراهو صاحب المعضلة غالباً ما يكونو من الحادبين على مصلحة ذلك الشخص ويريدون منفعته وعدم وقوع ضرر عليه أو على من هم تحت رعايته وهم في ذلك غير آبهين لما سوف يجره عليهم هذا القول (البيبكي) من صاحب المعضلة لو رآهم كمن ينوون من قولهم القاسي ذلك له الشر مضحين بكل مصالحهم معه (إن وجدت) في سبيل إنتشاله من (الهو فيهو) !
طيب الجماعة البقولو الكلام البيضحك ديل منو ؟ وليه بيقولو كلام بيضحك؟
دائماً ما يكون ناس الكلام (البيضحك) والذي هو يتوافق مع ما يراهو صاحب المعضلة غالباً ما يكونوا أصحاب مصلحة ومنفعة من بقاء ذلك الشخص في معضلته أو مجاراته في إختيار ذلك الحل الذي يفكر فيه والذي يفاقم منها (ما منتفعين وكده) فمصلحة ذلك الشخص أو من (يرعاهم) لا تهمهم بقدر ما يهمهم بقائهم (في أماكنهم منه) لذلك يلقون على مسامعه (الكلام البيضحك) والذي يتماشى وتفكيره في حل المعضلة التي تواجهه وهم يزينون له الأمور ويحرقون له .
طيب نحنا جبنا المثل ده ليه؟
لأنو والبلاد تمر بهذه المنعطفات الخطيرة فقد ظللنا نسدي النصح و(الكلام الببكي) للقائمين على الأمر أن تنحوا (وبطلو الكنكشة) وأدوا الناس (فرصة معاكم) وذلك بتكوين حكومة قومية إنتقالية ثم إنتخابات نزيهة وذلك حتي لا تقع البلاد في مستنقع الفوضى والدمار .. ولكن لا حياة لمن تنادي فولاة الأمر ما بيعجبهم (الكلام الببكي ده) بيعجبهم (الكلام البيضحك ) من شاكلة (خليكم قاعدين الزارعكم غير الله يجي يقلعكم) .. مما يجعلنا نعيش في داخل هذا النفق المظلم ننتظر مستقبلاً (من غير ملامح) ! كسرة : تنبيه : لا يوجد ضوء في آخر النفق !! (طبعن بيكون في زول سرقو وكده) !! كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو)+(و)+(و)+(و) كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و) [/JUSTIFY] الفاتح جبرا
ساخر سبيل
[email]gabra-media@hotmail.com[/email]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
صدقت استاذنا القامة تسلم إيدك بس شكلك حتبكى انت وتقول الروووووووووووووووب ده طبعن كلام الببكيك عشان الواوات دى براااااااااااااااها تبكى غير مضمون المقال
الاستاذ الرائع جبرا الله يديك العافيه (حقيقة)بتمتعنا وتنفسنا
والبلد تقول : ضاعت ملامح وجهي القديم
وقبل يومين قال أحدهم بعد مائة عام! يعني قرن من الزمان ! أها رايك شنو؟
بس كدي يا جبرا خلينا نتكلم بعقل ومنطق وفقا لكسرة المقال .
ظلام في آخر النفق …طيب يعني نقول :
تمشي إنقاذ وتجي إنقاذ
ووين يا أخواننا نلقا ملاذ
تمشي أحزاب وتجي أحزاب
وعمرنا كله ألم وعذاب
والقال ليك بلدنا خراب
أداك واقع ملامحه ضباب
وقلنا نجرب الثورة
لقينا أملنا كله سراب
كسرة ألم :
منظومتي([B]عز الشعوب أوطان[/B] ) في مقال من مقالات جبرا تلخيص لحال السودان منذ الاستقلال