اللي لسعته (الشّوربة) ينفخ في (الزبادي)



شارك الموضوع :

اللي لسعته (الشّوربة) ينفخ في (الزبادي)

< زمان وهسع ..والي ما نهاية ، عندما يجلس الطلاب للامتحان ..بجدوا اعلى ورقة الامتحان عبارة (لا تكتب داخل هذا المستطيل). < نموت نحن ونعرف ليه قالوا ما تكتبوا في (المستطيل) دي. < يا ربي المستطيل دا فيه شنو؟. < نقعد نشرع ...ونتخيل. < يكون فيه (دهب) وإلا (نفط) ؟..عشان كدا قالوا ما تكتبوا فيه. < وإلا يكون فيه حاجة اخطر من كدا؟. < احتمال ...الزمن دا ما في حاجة بعيدة. < يمكن (مجلس الصحافة) يكون هو المنع (الكتابة) في (المتسطيل) دا. < غايتو الحكاية دي ما طالعة من فراغ. < نحن كان يستفزنا هذا (التحذير) والممنوع من غير شك مرغوب ..لذلك كنا نكتب في هذا المستطيل عمدا. < هسع نحن بنفس الفهم نقول للكوتش صلاح محمد آدم ...(لا تكتب داخل هذا المستطيل). < والمستطيل هنا يمكن ان يكون (المستطيل الاخضر)...وهو الملعب الذي تلعب فيه مباريات كرة القدم. < اي يا صلاح ما تقعد (تنظر) لينا ...البلد ما ناقصة (تنظير). < اذ نشعر في كثير من المباريات ان (التنظير) يعلو عند مدرب الهلال صلاح محمد آدم ...مما يعرض الهلال للفقدان والخسران. < أمس استضافت قناة الشروق عبر برنامج (ساعة رياضة) في حضرة طلال مدثر المدير الفني للهلال صلاح محمد آدم الذي كان في اول ظهور (اعلامي) له بعد المهمة الكبيرة التى اوكلت له للاشراف فنيا على نادي الهلال. < صلاح محمد آدم لم يكن بعيدا عن (التنظير) الذي عرف به..لكن للحقيقة نقول انه كان (مقنعا) في اجاباته ...وكان على الاقل مقتنع بالشيء الذي يفعله ويقوله ...وان اختلفنا معه في الكثير من الاراء التى ذهب بها. < نحن هنا نراجعه من وجهة نظرنا لما قاله في الحلقة ..ونحفظ له التقدير...وقد يكون على (صواب) فيما ذهب اليه ...ولكن هذا لا يمنعنا من ان نصدّر ملاحظاتنا ...عسى ولعل تنفع. < هناك اخطاء وقع فيها صلاح محمد آدم وهو مديرا فنيا للهلال ..عليه ان يتعامل معها بفقه (التوبة) وليس بهذا الترفع والاصرار على صحتها. < يعني يا صلاح ما تحاول تظهر في اي منبر على انك (صاح)...حتى لو كنت في (السليم) هذا الترفع الذي تظهر فيه ..سوف يخصم من رصيدك ...ونخشى ان يخصم من رصيد الهلال ايضا. < الهلال في المباريات الاخيرة لم يكن مقنعا (فنيا)...وبدأ تظهر عليه الكثير من الاشكاليات. < بل ان هناك ملامح (شيخوخة) بدأت تبدو في خطوط الهلال او في بعض اجزاء من مباريات الهلال. < الفلسفة في التعامل مع مثل هذه الاشياء لا تجدي ...ولا تنفع بي شيء او بتعريفة كما يقول الحكماء. < والمثل يقول في بعض الحكمة مرض...لعل المدير الفني للهلال يعتبر بهذا. < اول تلك المساوي التى بدأت تشكل (ورم خبيث) هي ان طريقة الهلال وشكله ...وتشكليته وحتى تغييراته اصبحت (ثابتة)...ولو ان شكل الهلال هذا كان (جميلا) ورائعا لقبلنا ثبوته وديمومته ...ولكن شكل الهلال غير مقنع حتى للهلالاب وان تحققت انتصارات وتقلص الفارق بين الهلال والمريخ الي نقطتين. < والثابت والطبيعي هو ان يكون الهلال هو المتصدر والمتفوق ..لذا فان (الوصافة) تلك لا تعجبنا وان حاول صلاح محمد آدم تجميلها او (فلسفتها) بما ليس فيها. < مباراة الهلال امام النسور كان نموذجا للشاي بالبلح. < الله يقطع سنين الشاي بالبلح ...والمباريات التى تكون على ذلك النحو. < صلاح محمد آدم في قناة الشروق امس قال انه يريد ان ينقل تجربته مع هلال كادوقلي الي (الهلال)...وهذا شيء ان فعله صلاح يكون عمل لينا (كارثة). < يمكن ان نقبل العكس ...ان تنقل تجربة الهلال (الاب) الي الهلال (الابن). < لكن ان يحدث العكس ..تبقى مصيبة ...(منيلة ستين نيلة) كمان. < نحن نحلم وننتظر نقل تجارب برشلونة وريال مدريد ومانشيستر يوناتيد الي (الهلال). < تجي يا صلاح عاوز (تنقل) لينا تجربتك في هلال كادوقلي. < قالوا ليك التجربة دي (موقف)...عشان تنقلها. < هى البلد ناقصة (نقل). < لن نقبل بي اي حال من الاحوال ان ينقل لنا صلاح محمد آدم تجربته في هلال كادوقلي الي الهلال وان كان فخورا بها...ولو كان مميزا فيها. < صلاح محمد آدم عليه ان يتعامل مع الهلال على انه (سقف) ...وان التجارب المحلية الناجحة لا تعني نجاحها في الهلال لأن الطموحات والامكانيات تختلف بين الهلال وهلال كادوقلي. < تجربتك في هلال كادوقلي يا صلاح لم تصنع منه (بطلا) للممتاز ...ولم تجعل منه فريقا بتلك الهيبة والروعة حتى يشفع لك ذلك ان تنقل لنا التجربة في ام درمان. < هذا شيء لا يحتاج الي (تنظير) او فلسفة عزيزي صلاح محمد آدم ...وما عاوز ليه كمان (مؤتمر صحفي) او صحفي يمسكك من يدك ويقول عاوز يتصور معاك. < خلاص يا مورنيهو. < والله بقيت خطير. < كمان في دي عاوز (تنظر). < هى البلد ناقصة (تنظير). < من الاشياء المخيفة التى ذكرها صلاح محمد آدم امس في برنامج (ساعة رياضة) مع طلال مدثر قوله انه عندما اشرف على الهلال كان همه الاساسي هو (الخرطوم الوطني) الذي كان يحتل المركز الثاني في روليت الدوري. < صلاح محمد آدم يا جدعان (طموحه) يفوّت الخرطوم الوطني ويشارك في بطولة الاندية الافريقية. < والله كلام. < اهلي شندي كيف يا كوتش؟. < انا يا دوب عرفت ليه الهلال اتعادل مع اهلي عطبرة في عطبرة. < اذا كان هذا هو طموح المدير الفني للهلال ...فان الجميع عليه ان يقنع من الصدارة. < قلت ليكم الزول دا عاوز ينقل لينا تجربته في هلال كادوقلي...منتظرين منو شنو تاني؟. < وعاوز ينافس لينا الخرطوم الوطني. < الخرطوم الوطني شنو؟. < الخرطوم الوطني دي نحن لو بقى الفارق بيننا وبينها اقل من عشر نقاط في الدوري بنكون زعلانين. < عاوزين نموت من الزعل. < هى البلد ناقصة (موت). < عشان تجي انت وتموت لينا من (الزعل). < انت عاوز يا صلاح محمد آدم بعد العمر دا كلو ...ننافس (الخرطوم الوطني). < يا جدعان قولو حاجة. < خلوني انا. < حلوها لي انتوا. < انت يا اخوي قايل نفسك مدير فني لنيل الحصاحيصا. < كلامك دا تاني ما تقولو. < اوعي زول يسمعك بتقول كدا. < لو ناس (سلك) سمعوك ...ما بريحونا. < اسوأ من هذا ...ان صلاح محمد آدم قال (ساخرا) ان الظروف ما معروفة ويمكن ينتهي عقده في (كادوقلي) في اشارة الي مباراة الهلال وهلال كادوقلي الاربعاء القادم. < شفتوا الزول دا (مخيّف) كيف؟. < انت يا كوتش اصلو ما بتطمئن ليك زول. < تنظيرك الشابكنا بيه ...وفلسفتك البتتكلم بيها وينها؟. < غايتو الله يستر لو كان مدربكم بفكر بهذه الطريقة. < شيء اخر يؤكد تواضع هذا المدرب الذي كان واضحا انه ما مصدق يكون (مدير فني) للهلال. < بدأ ذاك واضحا من (كسير التلج) الذي قام به صلاح محمد آدم لمجلس الهلال ولرئيس مجلس الهلال الامين البرير الذي وفر لهم كما قال كل الاحتياجات اللازمة. ومنحهم الثقة الكافية. < ح تقعد تشكر لينا في (البرير) كدا ...لمن الموسم ينتهي. < شفتوا (التنظير) الوقعنا فيه دا كيف؟. < آدم لم يكن مقنعا بابعاد محترف الهلال الخطير وهداف الممتاز رغم عدم المشاركة في مباريات الدورة الثانية المالي (تراوري). < تراوري هذا مكانه ان يكون (اساسيا) في تشكيلة الهلال واظن ان الهلال لو لم يستفد منه في هذه المباريات سوف يستفد منه في المباريات القادمة. < مباراة كادوقلي تحتاج الي (تراوري) ولا بد من وجوده في تشكيلة الهلال ...لكن المشكلة ان صلاح محمد آدم لم يعده فنيا ولا نفسيا لهذه المباراة بسبب تعامل المدرب معه...وابعاده من مباريات سهلة كانت يمكن ان تجهزه بصورة افضل واكثر عملية. < ما فعله صلاح محمد آدم مع (تراوري) فعله مع (سيدي بيه) الجوهرة الافريقية السمراء ...الذي يتعامل معه صلاح محمد آدم على انه لاعب لفريق (النيل الحصاحيصا) ، وليس الهلال وكأن الهلال لا يصرف على هذا اللاعب بالعملة الصعبة. < اضف الي ذلك ان امكانيات اللاعب تؤهله للمشاركة مع الهلال ...لكن صلاح محمد آدم عنده (تنظير) في هذه الحتة دي. < سنكارا ايضا غاب عن تشكيلة الهلال ...رغم مشاركاته المستمرة مع غارزيتو وآحمد ادم. < وغاب كذلك الصلد و(المر) سامي عبدالله والمدافع الجسور مالك ولم نعد نشاهد محمد احمد حتى في التمارين. < صلاح محمد آدم قال انه اول مدير فني في القمة السودانية منذ عام 2005م. < يا صلاح محمد آدم ...هل كان الفاتح النقر عندما كان مديرا فنيا للهلال بدرب بالوكالة. < ام كان فاتح ليه وكالة سفر في استاد الهلال. < ونسى صلاح المخضرم ابراهومة الذي اشرف فنيا على المريخ قبل كروجر. < صلاح محمد آدم من شطحاته ايضا قوله انه فخور بلقب (المنظر) او المنظراتي التى يطلقها عليه اعلام الهلال. < وقد تجاهل صلاح محمد آدم مفهوم الناس للمنظراتي في السودان ...وعلى هذا الاساس يطلق عليه اللقب. < يعني التنظير بمعني التفكير الذي قصده صلاح ما عندو اي علاقة بمفهوم الناس في السودان. < والمنظراتي دي يا صلاح في السودان حاجة ما سمحة ...ما تقعد تفرح بيها ساكت ...وتنظر لينا في الفاضي. < اسوق هذا النقد لصلاح محمد آدم تخوفا على الهلال من مباراته القادمة امام هلال كادوقلي ...خاصة وان صلاح لم يبدو واثقا من الانتصار فى كادوقلي. < والمثل المصري يقول : (اللي لسعته الشّوربة ينفخ في الزبادي)..والمثل يعني بالدارجي كدا ان الزول البتحرقو (الشوربة) الساخنة ..بقعد ينفخ في (الزبادي) البارد. < وقد جربنا نحن لسعة الشّوربة كثيرا ..حتى اضحينا ننفخ في (الزبادي). < رغم اني اعرف ان هلال كادوقلي ليس (زبادي)...وانما شوربة مولعة نار كمان. < وهذا بلاغنا منذ الان للناس ...وتحذير مبكر للمدير الفني للهلال صلاح محمد آدم الذي اعتبره المسؤول الاول عن مباراة الهلال في كادوقلي. < اذا ذهب صلاح محمد آدم الي كادوقلي بهذا (التنظير) فان عودة الهلال بنقطة واحدة من هناك امر سوف يصبح واقعا لا قدر الله يوم الاربعاء القادم. < ملحوظة : وقد اعذر ما انذر. هوامش < على العموم الحلقة كانت ممتازة في قناة الشروق...وفتحت (اكواخ) الكثير من الاسئلة والملفات. < يا صلاح انت (تنظيرك) دا لو صلحتو شوية بتبقى (رئيس حزب). < كدا حاول طوّر تنظيرك دا ...وتعال تاني الشروق. < يمين ننافسك بيك (الصادق المهدي). < الصادق المهدي كمان الدخلو شنو في (الكورة)؟. < انت ما تقول صلاح الدخلو شنو في السياسة. < بالله البسمع (التنظير) يفتكر نفسو بتابع في الدوري الانجليزي. < يا زول شوية علينا. < ما بالطرية دي. < خلي ليك حبة (تنظير) للصحفيين ديل. < الزول دا بقى يا جماعة يشاركنا في (التنظير) حقنا. < انتقادي هذا لصلاح كله تحذير والله من مباراة كادوقلي. < الزول دا عاوزنو يعمل حسابو ساكت يا شجرابي. < هسع شجرابي الدخلو هنا شنو؟. < انا عارف. < تلخبطو الزول. < مباراة كادوقلي تحتاج الي مسؤولية اكبر ...واعداد اعظم. < مباراة لا تقبل شيء غير الانتصار. < يا جماعة. < يا جماعة الله. < نسيت احكي ليكم القصة. < وإلا سيبك. < خلوها لي يوم تاني. < ...... < عاجل : انتوا (التنظير) ممكن يعمل تسمم.[/SIZE]وإن طال السفر - محمد عبد الماجد صحيفة قوون

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.