تهاني عوض: خالد.. حجز شنو يا نرجس.. المسالة بسيطة عندنا واحد في الحلة بصير خطير
أمشي يا (سعاد) بسراع بسراع.. أملي لي (الطشت) موية خليني أبرد كرعيّ.. وتحضر (سعاد) الموية والطشت وتضع (الحاجة) أرجلها في الماء.. وتصرخ مرة تانية .. دي موية شنو حاااارة نار بس.. أمشي جيبي لي موية من الزير البارد..
وتعترض (سعاد) على الموية الباردة ..يا نينا الموية الباردة مع السخانة ما كويسة وحتعمل ليك التهاب مفاصل.. يا بتي خليني من الفلهمة والفلسفة حقتك دي..أنا كرعي موقدات نار وأنتي قاعدة تنضمي.. أمشي مشت بطنك..دي شنو البت المفعوصة دي!! يا (نينا) أنا خائفة عليك تمرضي وتتعبي..أنتي هسع أرتاحي شوية وبردي كرعيك بالموية دي.. وأبلعي حبة (البندول) دي.. وبعد شوية حتبقي كويسة..
وتقتنع حبوبة بكلام سعاد وتدعو ليها: الله يطول عمرك ويديك العافية..حنينة زي أمك ..لكن وجع الكرعين ما حاااار ..الله لا وراكي ليهو يا بت حشاي..!
—-
مشهد آخر:
حاج (الطاهر) يلعلع بطووول حسو من باب الحوش : يا ولد.. يا (علي).. يا (عليّ) ..(يا زفت)..!! ويرد (علي): ايوا يا ابوووووي..انت وين انا بكورك ليك لي ساعة انت كنت غاطس وين؟ ما سامعني؟ تسمع الطرش! جبتا القش للحمار ولا ما جبتو؟ آآآي جبتو يا ابوووي..
اها ان شاء الله تكون مشيت للترزي وجبتا لي منو العراريق حقاتي؟ آآي مشيت.. اها سوى ليهن الرقع كويس ولا كرفسن و أداك ليهن؟ لالا يابا سواهن كويسات بالحيل.. خلاص امشي املأ لي (الابريق) داك من الزير بدور ابرد كرعي ديل من النار الموقدة فيهن دي..!!!
—-
مشهد تالت:
الباشمهندس (خالد) والمهندسة (نرجس) مهندسي كمبيوتر ونظم معلومات وشغالين في شركة zain في مكتب خدمات العملاء.. فجأة كدا خالد وقف على حيلو و قال لي نرجس..
عارفة يا ( نرجس) انا تعباااان تعب رهيب وما قادر اقعد في الكمبيوتر..شكلي حأستأذن واطلع بدري الليلة..
نرجس: مالك ياخالد في شنو ؟ حاسس بي شنو؟
خالد: والله ألم فظييييع في ضهري في الــ (لاور باك) lower back
نرجس: الله اوعى يكون عندك ديسك؟ تصور بابا كان عندو ديسك وكان متعبو شديد..الم فزيييييع وما كان بيقدر يمشي او يقعد او يرقد.. ماما تعبت معاهو شديد لحدي ما عمل عملية في مستشفى الاطباء وبقى all right بس واووو كان ألم يااااي فزيييع فزيييع!
تحب أكلم ليك بابا اخد تلفون المستشفى عشان تعمل حجز؟
خالد: حجز شنو يا نرجس.. المسالة بسيطة عندنا واحد في الحلة بصيييير خطير بمشي ليهو بعدين يعمل لي تدليك ويطقطق لي ضهري وبديهو الفيها النصيب!!!
نرجس: بصيير!! يعني شنو بصييير ؟
خالد: بصيير يعني اخصائي كسور وعظام بلدي..
نرجس: واووو بلدي اصلو ما بصدق.. لازم امشي معاك عشان اتفرج!!!!
عدم ممارسة (الرياضة) مشكلة كبيرة..فنحن شعب كسول..لا يحب الرياضة إلا في تشجيع (هلال-مريخ) ونعتبر ان ممارسة الرياضة (عيب) وقلة ادب و(لعب عيال) وأنها تذهب (الهيبة) وتتعارض مع (الوقار) وإنو مافي زول (عاقل) وود ناس (بيجري) زي (الشفع) !! او ينطط زي شفع الروضة !!
ولذلك نعاني من مختلف الامراض: رطوبة ، روماتيزم، وجع كرعين، وجع ضهر، (ملخة كتف) ، انزلاق غضروفي ، عرق النسا ، عكننة المزاج ، سرعة الانفعال!! دا غير امراض الضغط والزبحة الصدرية والجلطة ….إلخ ..
ممارسة (الرياضة ) بانتظام تساعد على السيطرة على (ارتفاع ضغط الدم) ، و تخفض خطر الإصابة بالسكري ، وتحرق الدهون وتخفيض الوزن ، و تعزز توازن مستوى الكوليسترول في الدم ، وتقلل احتمال الاصابة بأمراض القلب والمخ (كالجلطة) ، و تساعد على النوم ، وتقلل من أعراض (الاكتئاب) ،
وتساعد على زيادة العضلات والكتلة العضلية في الجسم ، وأيضا زيادة مقاومة الجسم لمحاربة الالتهابات والأمراض ، لكن أكبر فائدة لممارسة (الرياضة ) أنها تساهم في المحافظة على (خلايا المخ) وتجعل الإنسان يفكر بشكل جيد، وتخفف من التوتر العصبي ، وتحسن المزااااج .
تهاني عوض
ما عارف دي ظهرت لينا من وين
كلام الطير في الباقير …وماعرفتا القصص الفوق دي كلها والاقواس الكتار ديل كلهم الفهم منهم شنو؟؟
ايه حكاية الاقواس دى فى كتابة البنت اللى ماقادرين نفهم قصدها.
انا بعتير اى زول انتقد المقال ده ده زول ما عندو علاقه بالقراءه ولا فن الانتقاد.. سرد متسلسل ووصلت الفكره باسهل ما يكون وبنوع من التشويق القصصى دون خلل بالموضوع الاساسى ومن وقعنا مع اصطحاب كل النمازج..قريه- مدينه
لم أفهم شيئاً ولم أفهم المطلوب شنو
[COLOR=#F1082C][SIZE=3][I]كتابة السيناريو فن لا يتقنه إلا القلة وهي هبة ربانية .. أهنيك على هذه اللوحة التي جسدت لثلاث مشاهد كلها كانت تصب في دلتا واحدة .. والفكرة البسيطة كانت مدرسة للواقعية .. التي تحكي عن مظهر حياتي .. تهدف إلى لفت المتلقي إلى ضرورة اتخاذ رد فعل لتفادي ما سيؤل إليه حاله اذا استمر على ما هو عليه .
أكرر اعجابي لما ورد من مشاهد قصيرة معبرة .. وادعوا القراء إلى التمعن أكثر وعدم التسرع في توجيه النقد اللازع .. حتى لا نكون مقصا لللرقيب في مساحة حبانا إياها رب العزة لنعبر من خلالها إلى سماء الحرية التي ننشدها باحترامنا لمنتوجات الآخرين .[/I][/SIZE][/COLOR]