مهند..نزار..بشه..خليفة..كاريكا..سيدي بيه.. (يا الفي العصر مرورو)
< قاعدين نشرب في الشاي ..ما عارفين اي حاجة ..زي (تلاتة في اتنين).
< اول (تلاتة في اتنين) بتعقد ساي.
< انا بريء.
< انا مظلوم.
< انا ما اتلتش حد.
< انا عطشان.
< انا عنديش (جيوب انفيه).
< جيوب انفية ..بتحلك.
< مباراة الهلال والاهلي مدني تجي وتفوت فينا زي (الباسطة)...الليلة السما دا شايل ما بنمرق منو؟.
< اول (الباسطة) بتفوت وتجي.
< باسطة هي وإلا كديس؟.
< مروحة تربيزة هي.
< ما عارف لكن قون مهند الطاهر الاول ..زي كأنك تمشي لمحل حلويات وتقول ليه عليك الله (لف) لي كيلو باسطة (سفري).
< وتكرر ليه كلمة (سفري)..في بياعين دغلين ...بعملوا ليك فيها ما سمعو حاجة.
< هدف مهند الطاهر دا النوع البتشيلو معاك البيت ...بلفو ليك وتتخارج.
< عليكم الله هسع في (كيبل) عاقل كدا ..بنتظر (القون) دا ..والله ليكم حق تقولوا (الكيبل) ضرب.
< دا الحارس (ضرب).
< والدفاع (ضرب).
< والوسط (ضرب).
< والهجوم (ضرب).
< والجهاز الفني (ضرب).
< ومجلس ادارة نادي الاهلي مدنى (ضرب).
< واتحاد مدني المحلي (ضرب).
< وناس المريخ ذاتهم (ضربوا).
< ناس المريخ ديل الدخلهم شنو؟.
< تفتكروا (الكيبل) دا بضرب منو وليه كدا ...بضرب من رأسو ..بضرب من فراغ...بضرب (صدفة).
< بقطع من رأسو يعني.
< ساكت عملتوها في (الكيبل).
< كيبل شنو البقعد ليكم لي ناس مهند الطاهر ...انتوا ما عارفين ..مهند الطاهر الايامات دي بلقط في (جوائز مباريات سوداني) زي النبق.
< باكات الاهلي مدنى في احدى كور مهند الطاهر ..عملوا (النبق ..النبق ..النبق).
< تقوم بينا العربية ..تودينا للسادة.
< السادة وابوشامة.
< مهند يقلب في (الهوبات) زي (الطير المهاجر) حقت الراحل محمد وردي.
< (وكان تعب منك جناح في السرعة زيد).
< ومهند بزيد.
< كل ما يتعب بيزيد.
< قون مهند الاول ..(عشان ما تلخبطو لينا ساكت انا الي الان بتكلم عن الهدف الاول).
< الهدف التاني ماشي عليه.
< اصبروا ما تضيقوا.
< تلخبطو الزول في (مصارينو).
< هسع (المصارين) دخلهن شنو؟.
< انت مالك بقيت (تتمصرن) لينا في الحتة دي.
< كيبل مدني دي اصلو قالوا عنده مشكلة مع (مهند الطاهر)..من يشوفو بضرب.
< بضرب كدا من غير سبب.
< لكن (كيبل) استاد مدني دا يتخيّل لي كدا ..ضربتو دي تخطيط بتاع (لوردات).
< دا شغل (لوردات).
< اللوردات ظهروا في مدني.
< نحن بنعرف (الكيبل) المحرش.
< الكيبل من تلقاه بضرب براهو كدا من غير سبب اعرف طوال انو (محرش).
< اصلو حاجة زي دي ما بتفوت علينا.
< لكن منطق (الكيبل) بقول :
< (ما في كهربتين بتلاقو في ستاد واحد).
< كيبلكم دا والله عاقل.
< الكهربة ومهند الطاهر ما بتلمو...(والحديث مازال عن الهدف الاول).
< 6 / صفر ...ليه ..لاعبين في ام درمان.
< انتوا جنيتو يا بشة.
< عمليتكم دي ما صاح.
< البلد متأزمة ..تفوزوا (سته).
< تقول لاعبين في (قاردن سيتي)....كأنهم لاعبين في (بيت الامين البرير).
< اظنهم لاعبين في (حوش) بيت الامين البرير.
< دا شنو البتعملوا فيه دا ...(انتوا ما عارفين الخريف انتهي).
< ما عارفين (البرد) نزل.
< ناس الاهلي... مدني ذاتها بقت (غريبة) عليهم.
< بقت ليهم كتر ..كتر.
< الشوط الاول انتهى بتقدم الهلال بهدف مهند الطاهر الذي جاء في اواخر الشوط الاول.
< عشان ندي (الكيبل) فرصة.
< كملنا لي ناس الاهلي مدنى فهمهم ..من الدقيقة الخامسة ...يشيلوا ويضيعوا في الزمن ..تقول لاعبين ضد برشلونة.
< ويضربوا في ناس الهلال ...زي كأن المباراة في (ابوكرشولا).
< خبط شديد...وتقفيل.
< الفيكم اتعرفت..قال (كيبل) قال.
< جاء الشوط التاني ..في فترة الراحة ..ناس المريخ كان عندهم امل (الاهلي مدني) يتعادل مع الهلال.
< كان في امل بي الشكل دا.
< كان في حلم على هذا النحو.
< في احساس غريب كدا حايم في المريخ بعد (الكيبل).
< خاصة مع شوية (البرد) الدافر مع المغارب الايامات دي.
< قالوا ليك الكوتش صلاح محمد آدم قال لي نزار الصاقعة ..(البرد) نزل.
< فهمتوا حاجة.
< هدف مهند الطاهر دا ..شوفوا ليه (بطانية).
< عاوز ليه (غطا)..بدرالدين عبدالقادر ..ما مضمون ..الارضية كعبة ..والكيبل يمكن في (العصر) يضرب.
< الصاقعة قال لي صلاح محمد آدم ..ما في مشكلة ..(البطانية) نحن بنجيبها.
< خليفة الايامات دي بقى مركب ليه ماكينة (ميسي).
< الزول دا كورتو بقت سمحة عديل كدا.
< مهند الطاهر لعب كورة لي خليفة من (الكورنر)..خليفة شاف ليك (الكيبل) ضارب..لعب الكورة لي (نزار الصاقعة) الطويل.
< اطول زول في الملعب.
< الشغيل قاعد برة.
< نزار الصاقعة عمل دوران (انتهارشي) في الجو ...ولعب ليك الكورة في القون.
< زي كأنو الشباك فاتح ...والمفتاح تحت الوسادة ...وافصل التلاجة ...(متلجة شديد).
< الهدف الثاني..(قبل البرد ما ينزل سمح).
< دورنا ليك الشاي.
< الكبابي تطاقش.
< هدف نزار الصاقعة دا ..ممكن يطبق بي نفس الطريقة في (الدمازين).
< الهدف فيه تخطيط ..وتدبير..وتكنيك عالي.
< فيه (كيبل) ضارب.
< مهند الطاهر شال باسطة (سفري)...نزار الصاقعة ..ضرب باسطتو قبلو.
< باسطة محلي.
< نزار حامد بحب يخلص الحكاية قبلها ..بحب يحسم الموضوع طوالي ...(اللفلفة) حقت مهند الطاهر دي ما بتنفع معاه.
< المريخاب هدف نزار حامد طمم ليهم بطنهم اكتر من ناس الاهلي مدني نفسهم.
< اهلي مدنى (الكيبله) ضارب...شكلو كدا ح ينزل من الممتاز بي (كيبله).
< صلحوا (الكيبل) وارجعوا.
< الهدف الثالث ...كان هدف (بشه) ذاتو.
< بشه (النفض) ليك رمزي صالح ..وعصام الحضري.
< بشه تخصص (حراس اجانب).
< قال جيبوا لي ورقة وقلم.
< وقعد ينظر فينا.
< بشه لقى مدثر كاريكا بضيّع في الاقوان زي (الرغيف) ..قال احسن يطبق نظريتو براهو.
< اول (الرغيف) بضيّع الاقوان.
< يمكن بشه يكون افتكر حارس الاهلي مدني (ليبي).
< او احتمال يكون افتكرو (تونسي).
< المهم افتكرو (اجنبي).
< ومعروف من قديم الزمان ان (بشه) ما بحب الحراس الاجانب (زي كمال شداد).
< بشه جنو ..وجن الحراس الاجانب والكيبل الضارب.
< إلا الكيبل الضارب.
< بشه جاب هدف الهلال الثالث...(الشاي تاني دور).
< فترنا من (الشاي).
< البرد دا عاوز ليه (شاي).
< ما في احسن من القهوة ..والشاي وهوبة مهند الطاهر.
< بعد هدف بشه الثالث ..خليفة قال اشمعنا.
< اشمعنا شنو يا خليفة؟.
< اشمعنا نلعب في العصر.
< ديل ناس عووضة وجزيرة الفيل بلعبوا في المساء ...الهلال يلعب في العصر.
< تتخيلوا عووضة وجزيرة الفيل تلعب في المساء.
< والهلال سيد البلد يلعب في العصر.
< عليكم الله (الكيبل) دا ما حقار.
< دا حقارة بس ..يا معتصم جعفر...وحسن ود الكرتونة.
< معتصم جعفر ..رئيس الاتحاد العام ...وحسن ود الكرتونة طبعا معروف للجميع.
< خليفة الموضوع دا ما عجبو.
< استفزاه ليك.
< قال شنو؟.
< قال جيبوا لي (الكيبل).
< عاوز بيه شنو يا خليفة؟.
< انت جنيت يا خليفة.
< خليفة قال عاوز افرتك ليكم (الكيبل) سلك ..سلك ..ومعاوية الجاك ..معاوية الجاك.
< قلنا ليه يا خليفة (سلك) عرفناه ..معاوية الجاك ذنبو شنو؟.
< معاوية الجاك ذنبو شنو كيف؟.
< معاوية الجاك بستمع لي محمد النصري كتير.
< والنصري دخلو شنو؟.
< يا جماعة تسألوني انا...اسألو خليفة.
< انا والله الموضوع دا ما عارف فيه حاجة.
< خليفة براهو قال لي جيبو لي (الكيبل).
< قلنا ليه با خليفة ..انت قريت هندسة متين؟ ..عشان تفك (الكييل).
< تقوم تضربك (كهربة) ساكت.
< الكيبل دا ابعد لينا منو لو سمحت.
< خليفة اصر يجيبوا ليه (الكيبل).
< جبنا الكيبل ...قشط ليك كورة في سقف المرمي زي الحمام المشوي.
< حاجة ما تخلص..هدف (كيبلي) كدا.
< هدف (غضب الصحراء) ذاتها.
< تذكروا مسلسل (غضب الصحراء)..الما بتذكرها يشوف هدف خليفة الرابع.
< هدف خالي (بامية مفروكة).
< ولا بامييا واحدة ما فيه.
< بعد الهدف الرابع ..قلنا نطلع ..الكورة انتهت ...خلاص ..نعمل شنو تاني.
< ما في داعي للبشتنة.
< خلاص ارفعوا الفراش.
< نحن ما كنا عارفين ..(سيدي بيه) عندو فهم تاني.
< الزول نزل ليكم الملعب ..اعاد ليك تخطيط الميدان من اول وجديد.
< شاف ليك الخلل وين في الكشافات؟.
< وين في (الكيبل)؟.
< تصوروا صلح (الكيبل).
< كيبل الهلال ..شفنا لينا كورة عندها طعم ..واستمتعنا بيها.
< تتخيلوا سيدي بيه دا ح يكون كيف في الدمازين.
< الشيء دا ناس باسكال ..ما بفهمو ليه حاجة.
< اتخارجوا من هسع يا باسكال ....واعتذروا من السفر للدمازين.
< الدمازين كمان فيها (برد).
< برد دفاعكم دا ما بقدر عليه.
< سيدي نخلي هسع.
< نخش على الهدف الخامس ...هدف مدثر كاريكا.
< بشه قعد مع كاريكا...ومهند الطاهر ..قال لي كاريكا ...لازم تجيب ليك هدف عشان (اللقب).
< جيب ليك هدف ..وخلى الباقى علينا في الخرطوم.
< كاريكا قال يا جماعة انا ما عندي مشكلة ...لقب الهداف ..ما عندو فيه كبير غرض.
< قلنا ليه كيف تقول الكلام دا.
< نحن الجماعة بتاعين (الكيبل) لازم نسكتهم.
< لازم نحددها معاهم.
< كاريكا قال شنو؟.
< قال جيبوا لي (الكيبل).
< قلنا ليه انتوا شنو (الكيبل) الشبكتوا لينا فيه دا.
< الكيبل دا نحن ندي منو وإلا منو ..وإلا منو؟.
< خليفة قال عاوزو.
< كاريكا قال انا اقدم من خليفة في الهلال ...عشان كدا تجيبوا لي (الكيبل).
< جبنا ليه (الكيبل).
< كاريكا قال مع (الكيبل) عاوز ليه (حمام محشي).
< قلنا ليه نحشي ليك شنو في البرد دا.
< الكيبل عرفناه ...الحمام المحشي عاوز بيه شنو؟.
< بعدين يا كاريكا ...نحن هنا ما عندنا حمام محشي...الحمام المحشي في الدمازين.
< ليك علي ..نجيب (الحمام المحشي) في الدمازين.
< الهدف السادس ...كان ختماه (سيدي).
< هدف ...حق سيدي بيه براهو ...طلع ليك زي البرق من منتصف الملعب ..الحارس طلع ليه (اتبشتن) ساكت ..لعب الكورة من زاوية صعبة ..مدافع الاهلي دخل معاها المرمى.
< على كدا ..سيدي بيه وزن ليك النتيجة ..طلعت (6) صفر.
< وفي مدني كمان.
< وبدون (كيبل) كمان.
< حالتها دي بدون (كيبل).
< طيب لو كان فيها (كيبل) يا لورد ..كان انتهت كم؟.
< عندي فكرة خطيرة.
< بس ما طلعوها من العمود دا.
< اوعكم الفكرة دي القاها في السوق الشعبي او سوق ليبيا.
< فكرتي دي ..بتتلخص في ان تشيلوا (الكيبل) في مباراة الهلال القادمة مع الخرطوم الوطني.
< الظاهر كدا ..سيدي بيه دا بفتح بعد ما يضرب (الكيبل).
< عشان كدا يا ابوشامة شيلوا لينا (الكيبل) برة من الاستاد.
< ألعبوا لينا في العصر ..عشان نغني كلنا مع عائشة الفلاتية (الفي عصر مرورو).
< ما شفتوا مهند.
< ما شفتوا الصاقعة نزار.
< ما شفتوا بشه.
< ما شفتوا خليفة.
< ما شفتوا كاريكا.
< ما شفتوا سيدي بيه ..بمروا كيف في العصر ...(والله تقول دكاترة).
< مرور دكاترة.
< شغلهم دا ..شغل دكاترة عديل كدا.
< بس يا جماعة الكلام دا ما يطلع من العمود دا.
< كلام شنو؟.
< هسع انا جبت سيرة لرفع الدعم من المحروقات وإلا قلت بالغلط كدا (3) رغيفات بي جنيه.
< انتوا (رغيفكم) دا محترف؟.
< دا (رغيف) ما اعتيادي.
< غايتو تاني الفول والعدس والبامية المفروكة إلا ناكلهن بي (البطيخ).
< ما في زول بمشي ليه على (رغيفة).
< تاني بنقبل على (البطيخ).
< رغيف شنو في (البرد) دا.
< ملحوظة : طبعا الرغيف ما عندو اي علاقة بي قون سيدي بيه السادس.
هوامش
< الفنان الرائع صلاح بن البادية ...عندو اغنية ترتثية اسمها (غنيّت للستات).
غنيت انا للستات
انا قصدي الانبساط دائما
يا اخوانا مع البنات
سافرت اجيب فلوس
واختار منهن عروس عاجلا
سافرت اجيب المال
من جبال تقلي البعاد لازما
ما حد جاب لي خبر
ده حب البنات يا خال
سبب لنا استخلال دائما
يا اخوانا في البنات
حلمان حلمة الخير
في الجمعة اخر الليل نائما
قالولي ان شاء الله خير
وان شاء الله خير في خير
< وان شاءالله خير ..في خير.
< قالوا يا رب ..وخلوا الباقى علينا.
< نحن ما زلنا نقول الممتاز حق الهلال.
< حق الهلال بدون شكوى اهلي شندي كمان.
< اصبروا انتوا ما تضيقوا.
< ناس المريخ عايشين في حالة ضغط عجيب ..اخير منها الوصافة.
< انتوا الحاجات دي يا ناس المريخ ما بتقدروا عليها.
< مالكم ومال البطولة.
< دا شعر ما ليكم ليه رقبة.
< عليك الله يا صلاح محمد آدم سيدي بيه ..دا ما لاعب بقعد في الاحتياطي.
< دا لاعب مدرجات.
< لاعب بحرك الملعب كله.
< ناس الاهلي عطبرة ...من توابع المريخ.
< يعني ما تعشموا كتير.
< لكن ..الليلة ..بكرة ..بعد بكرة ..المريخ ح يخسر.
< المريخ سبق ان خسر من فريقو الخاص الاهلي الخرطوم.
< ويبقى الامل.
< نزار الصاقعة عندما يكون في وسط الهلال ...ببقى وسط الهلال ما فيه اي مشكلة.
< ومهند الطاهر عندما يكون في يومه ما في فريق بقيف قدام الهلال.
< وبشه لاعب مهمام..وحركة ..وتكتيك عالي.
< مالك عندما يكون في الدفاع ...يبقى ما في اي ثغرة في الدفاع.
< مالك يقطع كل شاردة ..وواردة.
< اتمنى ان يمنح صلاح الفرصة لسامي عبدالله ايضا.
< خليفة كان من نجوم المباراة ..ولعب مباراة كبيرة.
< وشارك في نجومية المباراة سيدي بيه ..رغم من انه شارك في اخر (15) دقيقة.
< بكري المدينة ايضا شكل اضافة كبيرة للهلال بعد دخوله في الشوط التاني.
< اتخيلوا سيدي بيه في الدمازين.
< الزول دا في مدني (خطير)..في الدمازين يكون كيف؟.
< الحضري عرفها.
< الحضري مرقتو (الجيوب الانفية).
< شكلو كدا اكرم الهادي سليم ح يقول انا ذاتي عندي (جيوب انفيه).
< قلبي مع الموردة.
< الدوري الممتاز بدون الموردة ..لا بكون ممتاز ولا حاجة.
< الموردة دفعت تمن بيعها لنجومها للمريخ ...الطاهر سادومبا ورمضان عجب.
< اصلو اي فريق يتعاون مع المريخ بدفع التمن غاليا.
< النيل الحصاحيصا بقى يلقطها نقطة ..نقطة.
< مباراة النيل الحصاحيصا القادمة مع المريخ مباراة مفصلية للنيل.
< وهي التى سوف تحدد مصير النيل.
< نشوف ناس النيل في الحتة دي بتصرفوا كيف؟.
< كدا وب ..وكدا وبين.
< موقف لا يحسدوا عليه.
< خسارة النيل ..برضو ما كعبة معانا ..لأنها سوف تعني مغادرة النيل للممتاز.
< اما خسارة المريخ ..فهو الشيء المطلوب.
< اقولكم حاجة ..اطبخوها ..وطلعوها تعادل.
< نقطة للنيل ..ونقطة للمريخ ..ونقطة للهلال.
< الليلة برضو عاوزين نقطتنا.
< يا برهان ما تقعد تتلفت ساكت.
< اعمل ليك حاجة.
< الموردة طالما فشلت في الانتصار على النسور ..تبقى هنالك مشكلة حقيقية في الموردة.
< النسور خصم منه (3) نقاط ...عشان يستفيد فريق النيل الحصاحيصا.
< احسن حاجة يغادر النيل.
< او يعطل المريخ ويبقى في الممتاز.
< الموردة في انتظارها مباراة مستحيلة امام الهلال.
< الموردة يعني بتنافس حول (6) نقاط.
< غايتو الموردة في موقف صعب للغاية.
< نتيجة النسور امس امام الموردة قد تبعده من الهبوط.
< .....
< عاجل : انتوا (الكيبل) حاجة غير (الجيوب الانفية).[/SIZE]وإن طال السفر - محمد عبد الماجد
صحيفة قوون
