افتحوا قوس كبير وكرّموا فيصل العجب
< عندما تتحدث الصحف عن شيء ..وتكثر الاخبار فيه والتصريحات ..اقنع من هذا الشيء ..واتعوض الله ساكت وابقى متخارج.
< التاجر من يقول ليك (الصلصة) دي جديدة..اقنع من جدتها...(وحبوبتها) ذاتها.
< انت سألوك من (جدتها).
< ابقى مارق....تمرق زي الزول (التلحة) الذي يدخل الدارة وما يطلع إلا وقت الفنان ينزل (الساوند).
< يطلع مع الساوند.
< قالوا ليك ..(والكلام دا ما يطلع من العمود دا)..واحد (اشتر) النوع البتلقى في اغنية (عجبوني الليلة جوا) شغال بي ايقاع (يا ضلنا).
< زول فارق ..فرقة شديد..قميصو اللابسو (اشتر)...الكم في حتة واللياقة في حتة ..وكل (زرارة) من بلد.
< عيونو كل عين فاتحة في شارع براها.
< موش مرات بتلقى ليك (دكتور) لو لقى عندك (نزلة) بكتب ليك (17) دواء.
< يشكك في نزلتك.
< يدخلك مدرسة.
< قدر ما تحاول ان تقنعو ان (النزلة) دي ما محتاجة للادوية دي كلها ما بقتنع.
< يقول ليك بي كل برود ..(النزلة) دي لو وصلت القلب خطيرة عليك.
< تصل القلب كيف يا دكتور؟...نزلة هي وإلا قصة حب.
< هسه علاقة النزلة بالزول (الاشتر) شنو؟.
< ساكت عاوز تجيب لينا الجبايات.
< والكلام دا كلو كدا على بعض ..علاقتو شنو بي (تكريم العجب)؟.
< المهم الفنان اضايق ضيّق شديد من الزول (الاشتر) دا ...لخبط ليه (ورقو).
< بقى لمن يكون عاوز يغني ليك (اسمعنا مرة) بجيها ليك بـ (الحزن النبيل).
< (الشال قلبي وسلاه)...يدخل ليها بـ (المستحيل).
< الناس في الحفلة قالوا الفنان دا ..زي لمن تكون في زحمة مواصلات ...تدخل الحافلة بالباب ..تلقى النسوان حجزن بالشنط بالشباك.
< الفنان عمل الحاجات دي كلها ليه؟.
< عشان (شترة) الزول الواقف قدامو دا تتوزن.
< يعني دي عاوزة ليها سؤال...قاعد كدا زي التربيزة الفيها كباية شاي واحدة وحولها (7) انفار.
< زي مهند ونور.
< اول مهند ونور بقعدوا كدا.
< الحفلة وقت انتهت الفنان المسكين نفسو قام ..مشى طوالي على الزول (الاشتر) الواقف قدامو عدل ..وقال ليه ...والله انت عاوز ليك (استوبر) عشان يقفلك ...ما فنان..بالله رقيصك زي عكسيات موسى الزومة ..يعاين للمرمى وكورتو تمشي الكشافات.
< متل الزول البعاين غلط...تلقى عينو في (العدس) ..وبيأكل في (الضلعة).
< او شنو؟.
< زي بتاع الحافلة ..يصلح (المرايا)...ويطلع حقة التمباك.
< تعاين ليه بصلح في (المرايا) ..انت تقول عاوز (يلف)...هو يا حسرة عاوز (يسف).
< شغل شنو يعني؟.
< شغل حرفاء.
< يفتح ليك موضوع عن (مي عزالدين)..يقوم فجأة يسألك عن (ايجار البيت) ، بدون مقدمات.
< طبعا انت بتتلخبط في الظروف الزي دي ..وتقول الكلام بدون ترتيب وتنظيم.
< والكلام لمن يكون ما مرتب ...وما منظم بكون كلام صادق ..طالع من القلب.
< نحن هسع النظريات دي ما بتهمنا فى حاجة ..ما تقعدوا لي زي الزول الفى الحلاق..تكون قاعد منتظر دورك ..يقوم يدخل قبالك ويقول ليك عاوز تحلق.
< يعني ح اكون في (صالون حلاقة) بصوّر في (غدا تتفتح الزهور).
< نرجع لتكريم العجب ...خلوا الكلام الكتير ...وادخلوا في الموضوع طوالي.
< صحف المريخ واعلامه هذه الايام تتحدث (تجملا) عن تكريم كابتن فريق المريخ السابق فيصل العجب ..الذي اصبح (تكريمه) مرتع لاعضاء المريخ واقطابه للحديث عنه ..وتأكيد قيامه.
< الظاهر الجماعة ديل منتظرين (سعيد السعودي) يعتزل ..عشان يكرموه مع العجب.
< المريخاب مفتحين ..ما عاوزين يعملوا ليهم تكريمين في وقت واحد ..عاوزين يختزلوا الحكاية ..ويكرموا عصفورين بي تكريم واحد.
< الحديث عن تكريم فيصل العجب (المكرر) ..يؤكد الاحساس بالتقصير اتجاه لاعب قدم للمريخ الكثير..واجبر على كتابة خطاب اعتزاله مقبال التكريم.
< والحديث المستمر عن تكريم العجب ..يدل على ان التكريم لن يتم ..إلا في اعمدة كتاب المريخ.
< يا جماعة انتوا في زول سألكم ...لو ما عاوزين تكرموه (ألبدو)..واعملوا (رايحين) ما في داعي لكل هذه الاعتذارات، والمبررات الفطيرة التى تعرضوه لجماهير المريخ.
< شخصيا لم استغرب من هذا الاهمال والتجاهل الذي يتعرض له كابتن المريخ.
< يا العجب اقنع من (التكريم)..فاعلام المريخ ومجلسه كان يتحدث بنفس الطريقة عن تكريم حامد بريمة الذي اوشك من ان يصل للخمسين ..لا شفنا ليه (تكريم)..ولا وشاح.
< والمريخ لم يكرم حامد بريمة الذي جلب لهم (خدمة ضراع) كأس مانديلا ، وتجاهلوه ..تفتكر ح يكرموا فيصل العجب.
< الشيء البغيظ ..ان المريخاب نسوا تكريم العجب هذا ..وعملوا فيها زعلانين من اللجنة عندما منحت نجومية احدى المباريات لرمضان عجب ..تجاوزا لهيثم مصطفى.
< انتوا وقت بتعرفوا تزعلوا ..ما تزعلوا من (المجلس).
< جمال الوالي (استقال) ساكت ...كرموه واحضروا فريق اهلي القرن عشان استقالة عاد بعدها جمال الوالي رئيسا للمريخ بالتعيين ..ثم اصبح رئيسا للمريخ بالتزكية.
< من هو احق بالتكريم ...فيصل العجب الذي اعتزل ام جمال الوالي الذي استقال في اجازة مفتوحة ثم عاد للمريخ.
< يا مريخاب ..من الافضل لكم ..ان تكرموا فيصل العجب الان قبل التسجيلات القادمة.
< كرموه قبل ديسمبر.
< الزول دا زعلان ..وبي طريقتو دي ممكن يلعب ليكم في (النسور).
< ألحقوه بـ (تكريم) سريع كدا ..وكونوا على قدر الكلمة والوعد الذي كان بتكريم فيصل العجب.
< ان الذي كان يرفضه المريخاب على هيثم مصطفى عندما كان في الهلال يفعلونه الان مع فيصل العجب.
< لأن المريخاب عقدتهم الهلال ...كرموا واوفوا هيثم مصطفى الذي لعب معهم (10) شهور اكثر من تكريهم ووفاهم لفيصل العجب الذي لعب معهم (15) سنة.
< يعني يا مريخاب (180) شهر ...لعبها معكم فيصل العجب..اي ضعف الفترة التى لعبها هيثم مصطفى في المريخ (18) مرة.
< وبرضو بتحدثوا عن الوفاء والاخلاص.
< بلة جابر مهدد بالشطب وكذلك موسى الزومة وسعيد السعودي.
< واحمد الباشا ..ما عارف مصيرو شنو؟.
< اما ضفر ..فمن الواضح كدا ان اخر رحلة له مع المريخ سوف تكون الي (الدمازين).
< الدمازين المحطة الاخيرة لضفر في المريخ.
< يا ناس المريخ نهايتو كدا افتحوا قوس كبير ..وكرموا فيصل العجب.
< ملحوظة : انتوا وقت ما قادرين على التكريم بتتفاصحوا مالكم.
هوامش
< محزن ان تكون مغادرة الموردة للممتاز على يد الهلال اليوم ...الموردة في موقع صعب...وخسارتها اليوم يعني مغادرتها للممتاز.
< عودة الرابطة كوستى للممتاز ...عودة سوف تضيف للممتاز..كوستى مدينة تستحق ان تكون في الممتاز.
< نتمنى هلال الفاشر او هلال بورتسودان ..وننتظر ان يلعب حي العرب سنترليق الصعود للممتاز ان شاءالله.
< مباراة اليوم مباراة (سيداوي بياوي) خالصة.
< ان شاءالله حكاية (سيداوي بياوي) دي ...نعود ليها غدا ..بعد مباراة اليوم التى نسأل الله ان ينتصر فيها باهداف كثيرة.
< حسم المباراة مكبرا ..وبعدد كبير من الاهداف ..امر يجعل النشوة حاضرة في مباراة اليوم.
< الاستهتار والهدف الذي تستقبله شباك الهلال امر مرفوض.
< الخرطوم اصبحت في كل موسم تفقد فريق ...دون ان يصعد منها فريق للممتاز.
< هذا الموسم قريبة الموردة من الهبوط ..مقابل صعود الرابطة وهلال الفاشر او الساحل او حي العرب.
< الشيء الغريب ان الاندية الخمسة المتنافسة الان في التأهيلي من الولايات.
< كوستي فريقين ..وبورتسودان فريقين ..وفريق من الفاشر.
< مدرب الهلال صلاح محمد آدم قال في المؤتمر الصحفي ان الهلال لا يحتاج الي مهاجم اجنبي.
< كيف الكلام دا.
< الهلال يحتاج الي مهاجم هداف ...مهاجم صريح يلعب في الصندوق.
< كاريكا وبكري المدينة ومحمد عبدالرحمن ثلاثتهم لا يحسنوا اللعب في الصندوق.
< كلهم لاعبو مساحات ..ومسافات.
< مهاجم قناص ..مهاجم صندوق ..امر لا بد منه في التسجيلات القادمة.
< امر مجلس الهلال يجب ان يحسم الان ...حتى يرتب المجلس اموره للتسجيلات.
< لا يعقل ان يعلن عن لجنة تسيير الهلال في 27 نوفمبر اي قبل (4) ايام من انطلاقة التسجيلات.
< علما ان التسجيلات اصبحت مدتها (15) يوم فقط.
< التسجيلات تحتاج الي ترتيبات مبكرة ..واتصالات قبل انطلاقتها.
< نريد لجنة تسيير قادرة ماليا ..وتمتلك للقدرة والخبرة الكافية في التسجيلات.
< المريخ سوف يتخلص من الحرص القديم كله ..بلة جابر وموسى الزومة وسعيد السعودي.
< قبل ذلك كان المريخ قد تخلص من بدرالدين قلق وفيصل العجب.
< الحضري بفتكر ان تعاقده في المريخ فقط من اجل مباريات الهلال.
< لذلك هو عاد في هذا التوقيت من اجل نهائي الكاس.
< رغم الفشل الكبير الذي احدثه عصام الحضري امام الهلال.
< شخصيا اتمنى الحضري في الدمازين.
< والله كمان الدمازين دي فيها حلاة (جيوب انفيه).
< سيدي بيه لا بد من ان يكون اليوم في تشكيلة الهلال من بداية المباراة.
< جمهور الهلال عليه ان يشكل حضورا كبيرا ...من اجل المتعة.
< تعالوا الي هلالكم.
< ارجعوا تاني.
< بطولة الاندية الافريقية تعب ساكت ...تجروا جرى الوحوش وفي النهاية الكأس للاهلي المصري.
< من دور الـ (64) اعطوا الاهلي المصري الكأس...هو احق به.
< الاهلي المصري حقق البطولة هذا العام بدون دوري وبدون محترفين كمان.
< (نظرية) صلاح محمد آدم في الحتة دي صاح.
< .......
< عاجل : سيدي بيه زي (طبيب الاسرة الخاص) يجيك في حتتك وينزل في اي وقت...(قالوا ما شاءالله).[/SIZE]وإن طال السفر - محمد عبد الماجد
صحيفة قوون
