لو عاوز تخش في العمود ما في داعي ترمي اشارة
< في شارع الستين ..نزل زول لابس ليه جلابية وعمة ..وشايل ليه (جلاكسي) يبدو ان الطرف الثاني مازال يتحدث معه.
< الو ..الو ..في شنو يا عبدالسميع؟.
< وعبدالسميع دا ..الزول اللابس الجلابية والعمة ، وشايل الجلاكسي..الكلمتكم عنو في الفقرة السابقة.
< انتوا مالكم بتنسوا سريع كدا...زي علبة الزبادي القاعدة برة التلاجة.
< اول علبة الزبادة القاعدة برة التلاجة بتنسى.
< عبدالسميع نزل من عربية (برادو)...بعد ان دخل بيها في عمود كهرباء ..والعربية يا حسرة بقت زي (الجدادة) البتكون ليها (21) يوم في الفريزر.
< بل العربية اصبحت زي قطعة الفرخة التى تكون في صحن الكوكتيل.
< في ناس بختوا ليك قطعة الجدادة في صحن الكوكتيل ..براها ما معاها اي حاجة ..متل الميدان البكون فيه (عراضات) من جانب واحد.
< قاعدة في السهلة.
< نزل عبدالسميع من العربة وهو يرغي ويزبد ..ويتكلم براهو...دا كلام فارغ ..دا عدم تقدير ...عمود اعمى ما بشوف.
< زولكم طوالي اتجه نحو (عمود الكهرباء) وهو يطنطن...انت ما شايف الاشارة الرميتها ليك دي.
< انا قعدت اعاين زي صحن الشطة.
< اول صحن الشطة بعاين.
< يا زول انت بتتكلم مع منو؟...افتكرتو بتكلم في التلفون بالسماعات. تفلونات الايامات دي ..خلت ليك الناس زي مجانين السبعينات.
< إلا الاختلاف الوحيد ....هسع الناس البتكلموا براهم بقوا نضيفين ...جنس نضافة.
< عبدالسميع ، انتبه لي ..وعاوز يؤكد كلامو ..قال لي بتكلم مع (العمود) الاطرش دا ...اعمدة الكهرباء بقت متهورة ..وطرشة....انا العمود دا شايفو ..رميت ليه اشارة من اول الشارع.
< حالتك دي شايفو يا عبدالسميع ..طيب لو ما شايفو كنت عملت شنو؟...بعدين انت ما عارف الحكمة اليونانية (القطاعها من رأسي دا) بتقول لو عاوز تخش في العمود ..خش ساكت ..ما ترمي ليه اشارة.
< الاشارة ...ما في ليها اي داعي.
< انا بيني وبين نفسي قلت الزول دا يكون فوت ...عمود شنو بالتكلم معاه الزول دا ..اكيد الحادث اثر في قواه العقلية.
< افتكرتو زحلق.
< وعبدالسميع يكورك ..عليك الله في داعي (العمود) دا يختوا لينا في نص الشارع كدا ..زي رجل الخط.
< اكيد (العمود) دا ختتوا هنا (المعارضة).
< دا شغل معارضة ..نحن عارفين اي حاجة.
< وما بعيد (امريكا) ذاتها تكون متورطة في الحكاية دي ..بتكون (ضالعة).
< من قال لي (ضالعة)..عرفتو ليك طوالي ...من الجماعة ..بي شالو وعمتو المنقوشة دي.
< يا ود الناس عمود شنو؟...ان جيت للحق ..العمود في الشارع الرابع ..مع ذلك انت تلبت من شارعك دا ..وخشيت فيه.
< والله يا عبدالسميع ..العمود ما غلطان...العمود ما عندو اي ذنب ..ما تقيف لي كدا زي برنامج (عزيزي المشاهد).
< اول عزيزي المشاهد بقيف كدا.
< وعبدالسميع يكورك ...العمود دا ما فاضل لناس الحركة إلا يعملوا ليه (رخصة).
< او على الاقل يركبوا ليه (لوحات)...دا شاركنا في الشارع.
< يا اخوى لوحات شنو؟...هسع العمود دا لو لبسوه ليك (نضارة)..وشال ليه (موبايل) عديل كدا ..بعبرو وإلا بتكلم معاه.
< والله عمود الكهربة دا لو وقف قدامي الان وقعد يغني في (سلم بي عيونك لو عز الكلام) ما بشتغل بيه.
< انت ساكت عاوز ليك سبب.
< والزول الفى الموبايل الشايلو عبدالسميع ..صوتو واضح ..يا عبدالسميع ..يا عبدالسميع ..في شنو؟.
< يا عبدالسميع ..اوعى يكون حصلت ليك حاجة.
< عبدالسميع انتبه ان تلفونو فاتح ....رجع للمكالمة ..ايوا معاك ...والله يا عبدالعزيز في (عمود كهربة) اطرش كدا دخل ليك في العربية.
< والعمود دا مرخص يا عبدالسميع؟.
< مرخص شنو ..دا فرامل ما عندو ..تصور ما رابط الحزام.
< اثناء الجوطة ..طبعا الشارع قفل ..واي زول سايق ليه (ركشة)..وقف في شنو يا جماعة؟.
< العربية دي.
< مالها العربية دي؟.
< قعدنا نحكي للعالم كلو.
< العربية دي دخلت في العمود داااااك.
< العربية الجابها شنو للعمود ...العمود في الشارع الرابع....دا العمود في (الطائف) والعربية في (الرياض).
< بتاع الحركة جا..قال لينا في شنو يا جماعة؟.
< قلنا ليه في (عقد)...انت ما شايف الحاصل ..وانت ذاتك وين من الصباح ..عشان تجي تسألنا هسع دي.
< عبدالسميع قال ليه : والله يا جانبو (العمود) دا رميت ليه اشارة من بداية الشارع.
< بتاع الحركة قال ليه ترمي ليه اشارة ..ترمي ليه رسالة...ترمي ليه (فرخة).. ترمي ليه (رصيد) انت غلطان.
< عبدالسميع قال ليه : انا غلطان ..طيب كلم ..ومد ليه الموبايل.
< بتاع الحركة اتكلم في الموبايل ...وعمل مخالفة على العمود ..واثبت في تدوين المخالفة ان العمود كان في حالة سكر واضحة.
< يا ابن الكلب.
< ابن الكلب طبعا العمود.
< طلعت بتشرب كمان.
< ومشينا على كدا.
< نسيت اقول ليكم عربية عبدالسميع (البرادو) مكتوب في ضهريتها (عيون النيل).
< ما تعاينوا لي بي استغراب ..نعمل شنو نحن ما في ايدنا نعمل حاجة.
< الحاجة البنقدر عليها ..عملناها ..اتفرجنا (سمح)...واتخارجنا ..وطلعنا بي معلومة جديدة ..ان اعمدة الكهربة (بتشرب).
< بتشرب عديل كدا ..(المعني بتسكر).
< عشان كدا الجماعة ديل دمجوا ليك فاتورة الكهربة مع الموية.
< عارفين ليه؟.
< عشان اعمدة الكهربة (بتشرب).
< نظام الحالة واحدة يعني.
< الحاجة الغريبة بعد (3) ايام من الكلام دا ...قام حصل لي حادث بسيط كدا.
< بتاع الركشة الراكب معاه دخل ليه في (عمود كهربة).
< قلت لي بتاع الركشة ..ما تشيل هم ..انا بطلعك من المشكلة دا...انت ما غلطان ..غلطان العمود.
< موش الجماعة ديل قالوا (اعمدة الكهربة) بتشرب ..وبتلفها كمان ...الليلة ح نوريهم حاجة.
< اصبروا انتوا بس ..ما تضيقوا.
< بتاع الحركة جانا طاير ..قال لينا في شنو؟.
< قلنا ليه تفتكر في (نفير) هنا ..يا ابوالشباب ..العمود داااك دخل في (الركشة) المسكينة دي.
< ولي معلوميتك العمود داااك رمينا ليه (اشارة) من بداية الشارع.
< بتاع الحركة ..قال لينا ايوا ...كمان بتستهتروا ..وبتلعبوا بي زمنا...عمود شنو البترموا ليه (اشارة)..انتوا بتستهبلوا.
< رفعونا ليك كلنا في بوكسي ..ماشي بي تلاتة عجلات ..وسواق ما فيه.
< ورمونا ليك في الحبس.
< بتاع الركشة بعد (5) ايام في الحبس ...قال لي انت ما قلت ح تمرقنا من المشكلة دي.
< قلت ليه امرقك كيف ..عمود الكهربة الدخلت فيه طلع عندو (ضهر).
< طلع عمود ود الناس ...(ما بشرب)..اعمل ليه شنو يعني.
< لو خشيت ليك في عمود كهربة ..هويّن كدا..كنت هسع تكون قاعد مجكس في حدايق السلام.
< شكلك كدا ..الخميس كلو بتعدي في (حدايق السلام).
< لكن انت بتشوبر ..داخل ليك في عمود (مسنود).
< عمود (ضهرو) قوى.
< اتخارجنا على كدا.
< نسيت اقول ليكم ركشة الزول المسكين دا ..كان مكتوب في خلفيتها (الموردة).
< ملحوظة : نخش على العمود ..اقصد على الكورة...ابقوا معنا وتابعوا (الهوامش).
هوامش
< مذكرة بعض الاندية من اجل استثناء الموردة من قبل رئاسة الجمهورية ..طبعا ما ليها اي قيمة.
< وان كانت فقط ..تؤكد العلاقة القوية والجميلة التى تربط بين الهلال والموردة.
< المنافسات ..والكورة ما فيها (رئاسة جمهورية).
< كفاية تدخل الرئاسة في تسجيل عصام الحضري.
< كمان عاوزين تدخلوهم لينا في عملية الهبوط والبقاء.
< لو اشتغلتوا بالنظرية دي ..بكرة ناس المريخ بي علاقاتهم القوية ..زي علاقة (عبدالسميع)..بقوم يطالبوا بهبوط الهلال من الممتاز.
< ممكن ناس المريخ يطلعوا ليهم مذكرة للرئاسة فيها توقيع الاهلي الخرطوم والنيل الحصاحيصا واهلي عطبرة.
< اوعكم يا ناس الهلال تعملوا حاجة زي دي.
< الموردة ..هبطت بشرف ..ولن تعود بقرار من رئاسة الجمهورية.
< اخير ليها (هبوطها) من الحاجات البتعملوا فيها دي.
< الفيفا طبعا لو سمعت الكلام دا ..ممكن تقفل النشاط الرياضي عديل.
< والله الكلام دا لو سمعوا بيه ساكت ..يحاسبوكم.
< من اجل عدالة المنافسة ..اتمنى هبوط النيل.
< ان شاءالله يلعب سنترليق ..ويهبط.
< النيل شوه البطولة ..وخربها.
< لذلك على فريق الاهلي مدني ان يلعب من اجل الانتصار والفوز على النيل في المباراة القادمة ..لأن النيل كان السبب الاول في هبوط الموردة والاهلي مدني (الما عندهم ضهر).
< الموردة والاهلي مدني زي بتاع الركشة الفوق.
< يا جماعة انتوا إلا يفصلوها ليكم كدا.
< عبدالسميع دا فريق النيل الحصاحيصا.
< عشان ارتاح في عضمي دا ..وما تقولوا لي انت قاصد شنو؟.
< احسن الواحد يجيكم دغري.
< الاتحاد العام ..برمج بعض مباريات الاسبوع الاخير ..في توقيت واحد.
< واظن ان هذا الامر فقط من اجل المريخ.
< لو كانت مباراة الهلال والاهلي شندي مبرمجة قبل مباراة المريخ ولمريخ الفاشر ...كان الموضوع مشى عادي.
< شفتوا الاتحاد العام ابو ثلاث مساعدين دا ..بريح ليكم في المريخ كيف.
< خدمة حتى الاسبوع الاخير.
< لكن نحن حقنا ما بنخلي.
< بلوا راسكم يا مجدي واسامة ..ومعتصم ..واثبتوا بس.
< الاستئناف رفض شكوى الاهلي.
< ديل بجتعموا عشان موية الصحة والبارد.
< والله في وجود هذا الاتحاد ..خطوة ما تمشوا لي قدام.
< ليكم يوم.
< ......
< عاجل : قالوا الحضري ضرب لي صديق علي صالح قال ليه عندي (شراب) في غرفة اللاعبين رسلوا لي ..شراب ما عاوز تخليه يا حضري ارقص.[/SIZE]وإن طال السفر - محمد عبد الماجد
صحيفة قوون
