عطالة مقنعة .. (ساعاتهم) ما شغالة

> الحديث انتهى.

> أهم حاجة في الشيلة كانت (الساعة)..من يقولوا ليك (فلانة) جابوا ليها الشيلة…بنات الحلة كلهن بتكسرن في (بيت العرس)..ويسألن من (الساعة).

> جابوا ليك ساعة؟.

> يمكن فهم العريس وذوقو كان بعرفوه بالساعة البختارها.

> عشان كدا ..لمن الواحد يتقدم ليه لي بنت ..بقولوا ليه جيب ليها (ساعة)..وحلق وخاتم.

> أهم شيء في الموضوع كلو (الساعة).

> الساعة ذاتها ..زمان ما بلبسها زول ساكت…تلبس ليك ساعة وأنت ما دخلت الجامعة …الحلة كلها تشيل حالك.

> يقولوا ليك الزول دا فاكيها في نفسو …وعامل فيها مثقف ..(وما ارتحت ليه كدا من أول مرة )..زول مفلهم.

> ما عارف علاقة الكلام دا بالساعة شنو؟.

> علاقة الساعة بالثقافة والفلهمة ايه؟.

> يا اخي زمان (حجر) الساعة كان عندو قيمة ..الزول وقت يقول ليك ماشي اغيّر حجر الساعة ..كأنو ماشي يغيّر (نصر الدين الشغيل).

> أو الواحد كدا ..بدون مناسبة يقول ليك ..عاوز اغيّر (الكتينة)..المعنى عندي ساعة.

> اتذكر المغتربين زمان …كان الناس الكبار ..لمن يودعوهم وخلاص يكونوا عاوزين يسافروا ، ويطلعوا من البلد ..أي واحد من الناس الكبار ديل ..بقول للزول المغترب ..اسمع عليك لمن تجي في العيد السنة القادمة جيب لي معاك (ساعة).

> والزول يقعد كدا منتظر الساعة عام كامل.

> الساعة هسع انتهت ..وسمعتها ذاتها دقت الدلجة.

> يمكن الموبايلات كتلت الساعات ..ويمكن عشان (الزمن) ذاتو بقى ما عندو قيمة.

> زمان الساعات كانت ساعات بي جد …الساعة فيها (60) دقيقة …هسع لو كسرت رقبتك ما بتلقى ليك ساعة فيها (60) دقيقة.

> إن جاملوك بتلقى في الساعة (21) دقيقة.

> الزمن جاري.

> الناس دي لاحقة شنو؟.

> زمان وقت زول يقول لي زول ..انتظرتك (ساعة) ..يدل ذلك أن الزول دا انتظر لمن ريقو نشف.

> هسع تنتظر ليك زول خمس ساعات ..عشان تقول ليه اسمع الكورة انتهت كم؟.

> ما في أي موضوع.

> حاجات الزمن دا يمكن (بتلهط) الزمن.

> تدخل (فيس بوك)…تلقى نفسك كسرت ليك (4) ساعات بدون ما تشعر.

> تطلع من الفيس بوك تلقاها صبحت.

> تتواصل مع قرب في (الواتساب)…تلقى يومك كلو راح.

> تفتح التلفزيون تحضر ليك فيلم…تنسى نفسك ..والوقت يسرقك ..وتخلى المرقة ذاتها.

> حاجات الزمن دي ما فيها بركة ..بتأكل الزمن زي (البطيخ).

> تقيف تنتظر (بص الولاية) في المحطة …تمر ساعتين.

> حاجة بخيتها ان سلمت عليك ساكت عاوزة ليها (ساعة)..تحكي ليك عن أي حاجة حصلت ..الحصل امس في (ملكة جانسي) تروي ليك بالتفاصيل المملة.

> تطلع مشوار من صباح الرحمان …ترجع (انصاص) الليالي.

> زمان حاجات زي دي ما في …اليوم تعمل فيه الف حاجة ..تحوم الدنيا دي كلها يومك ما ينتهي.

> وقت تزهج ..تمشي البحر ..عشان تكسر الزمن..تلقى في الحوامة والكسير دا كلو فاتت (ساعة).

> عندنا عمنا زمان كان بطلع مع النباه الاول ..وبرجع الساعة اربعة عصرا.

> عمنا دا كان وقت يطلع يقولوا ليك ..مشيت لي عثمان في المستشفى ..بعد داك نزلت البحر..حصدت البصل ..الضهر جابوا لينا خبر الطيب ..مشينا دفنا ..ادليت البحر تاني ..حلبت البقر…نزلت البندر بعد كدا ..استلمت حصة (السماد) من البنك….واستقليت الحكاية غشيت (اخلاص) في الجامعة سلمتها مصاريف الدراسة ..ورجعت لحقت صلاة العصر في البيت.

> الزول دا عمل الحاجات دي كلها في اليوم دا.

> هسع يا كافي البلا …لو عاوز ترسل ليك رصيد ساي..يومك بنتهى ..عشان الشبكة بتكون واقعة.

> اقول ليكم حاجة.

> زمان ما كان في اطول من (الليل).

> نحن ذاتو كنا فاكرين الليل دا حاجة طويلة وما عندها ناهية …ولو ما الناس ناموا (الواطة) ذاتها ما بتصبح.

> كنا فاكرين كدا.

> شعراء الحقيبة ديل ..كرّسوا لهذا المفهوم ..يحبوا بالصباح ..وفي الليل يجوا يشكوا من عدم النوم.

> صوروا لينا (الليل) دا طويل جنس طول.

> الزول وقت يقول ليك والله أنا امس كان عندي ضرس ..للساعة اتناشر ما نمت.

> تحن عليه ..وتلقى اثر السهر ظاهر في عيونو…لمن ضعف عديل كدا ..وبقى ما قادر يقيف على حيله.

> هسع الساعة اتناشر ..تكون طالع من البيت ..بتفتش ليك في فول…الموضوع عادي ..ما عاوز ليه (شكية) شعراء الحقيبة ديل.

> طيب أنا عشان ما تقولوا بتكلم ليكم ساكت..زمان كان في الدنيا دي كلها في طالب بذاكر للساعة عشرة.

> أول السودان ذاتو ما بذاكر للساعة عشرة ..ولا في طالب بجازف بالحاجات دي.

> وابوك ذاتو لو لقاك قاعد مساهر للساعة عشرة …بقول ليك يا ولد خلاص نوم واطفي النور دا…القراية دي كفاك منها ..عيونك ديل بتقددن.

> لو كنت بتذاكر في (الحكم الانجليزي المصري)..ابوك ما بخليك…الساعة عشرة جات ..طوالي تمشي تنوم.

> هسع اولاد الزمن دا ..الساعة عشرة ..بكونوا قاعدين في (اللستك)..لسه ما رجعوا البيت.

> غايتو نحن في زمنا شبعنا نوم.

> ليل الزمن دا ..لو قعدت في ام بي سي تو تحضر ليك فيلم ساكت ..تسمع النباه.

> الواطة صبحت.

> ما عارف الحصل شنو؟ ..وليه الناس دخلت فيها (شفقة) كدا؟.

> مرة من غير ترتيب كدا ..مشيت لي واحد صاحبنا.

> لقيتو قاعد زي (سلة المهملات).

> عشرة سنوات ما قابلتو.

> قلت ليه يا عباس اها إن شاءالله عرست.

> قال لي اعرس شنو؟..أنا شغل ما اشتغلت اعرس.

> يا زول ما معقول…مالك ما اشتغلت ..انت والله كنت شاطر في الجامعة..رأسك بقى فاتح من الجنبتين…بقيت زي القلم المبريء من الجهتين…شعرة ما فيك.

> قال لي اشتغل وين ..أي وظيفة اتقدمت ليها ما شالوني.

> قلت اغيّر الموضوع ..شعرت بيه (اتحسس) شوية ..واتأزم كمان.

> قلت ليه يا عباس الساعة كم؟.

> قال لي : ما شغالة.

> قلت ليه برضو..طيب انت عارفناك زول معارض ..ساعتك مالها؟.

> دخلنا الصالون ..قلت ليه يا عباس عليك الله افتح لينا (المروحة).

> قال لي المروحة ياتها؟.

> قلت ليه المروحة الفوق لينا دي..يعني ح تفتح لينا مروحة في صالون تاني.

> قال لي للاسف …المروحة دي ما شغالة.

> قلت ليه : والله انت حالتكم صعبة عديل كدا …(مروحتكم) برضو ما شغالة.

> سكت مسافة.

> شفت لي (شاحن) مجدوع في الكرسي ..مشيت عليه عشان اشحن الموبايل.

> عباس لحقني ليك ..قال لي (الشاحن) دا ما (شغال).

> يا ود الناس انتوا حكايتكم شنو؟.

> عطلتكم دي وصلت (شاحن الموبايل).

> ملحوظة : غايتو الزول وقت يكون عاوز يصعب الحكاية ..بصعبها ..عامل كدا زي التلاجة الما فيها تلج.

هوامش

> السنة دي الهلال أي مريخ قابلو ضربو ليك.

> في الممتاز ضربنا ليك الكبار ..بي حضريهم.

> في الصغار ..ضربنا ليك شباب المريخ.

> في أم درمان ضرب.

> وفي الدمازين ضرب.

> ضرب في أي حتة.

> مريخ كوستي ذاتو انضرب يا رجالة.

> باقى نحن عندنا حملة …من أم درمان لى الدمازين.

> أي مريخ بلاقينا بنضربو.

> في الممتاز ..في الدوري الشباب ..في التأهيلي في أم درمان في الدمازين.

> المريخاب ديل في (قطر) ضربناهم.

> اضرب يا اطهر.

> يا جماعة ..يا ناس الله …المريخ الشايفنو دا (5) دقائق ما بنستر في الدمازين.

> انهيار شامل في الدمازين.

> نحن هناك ما بنرحمكم.

> لا بنعرف (3) مساعدين للرئيس ..لا بنعرف (17) لورد سابقاً.

> الوزير …عاوز يجهجهنا في الدمازين.

> عشان كدا خلى الامور كلها معلقة.

> التسجيلات تبقى لها (13) يوماً ..وفي (5) لاعبين من اعمدة الفريق عقدهم انتهى اجلهم.

> والوزير ..ضارب طناش.

> اضاعوا الموردة …وحطموا اجمل الرمزيات الرياضية ..واكثرها ترابطاً اجتماعياً.

> وما فعلوه في الموردة ..فعلوه في الهلال …لكن الهلال لحمو مر.

> نخشي على الامل عطبرة …الذي تكالبوا عليه …وارادوا أن يغادر الممتاز بهذه الطريقة السخيفة.

> صوت (البيع) اصبح عالياً وواضحاً في الاسبوع الاخير للدوري الممتاز.

> واذا كان رب البيت للطبل (بائع)..فشيمة اهل البيت كلهم (البيع).

> البيع من فوق.

> نتمنى ألا يكون (الامل) ضحية اخرى ..من ضحايا الاتحاد العام.

> بقاء النيل الحصاحيصا في الممتاز …يعني الحكاية بايظة من كبارها.

> الاهلي مدني (هبط) لكن هو سوف يحدد الفريق الذي سوف يلعب سنترليق.

> هلال كادوقلي كان متساهلاً ومتسامحاً في مبارياته الاخيرة ..ولعب بدون دوافع.

> هلال كادوقلي لا في منطقة خطيرة ..لا عندو فرصة يمثل السودان ..عشان كدا لعب بمستوى ضعيف في مبارياته الاخيرة.

> الاندية التى ليس عندها صالح خاص في الاسبوع الاخير…نرجو أن تلعب بأمانة ومسؤولية.

> في اندية بسبب هذا الاستهتار ..ح تروح في الرجلين.

> مبروك لهلال الفاشر ..تأهله للممتاز.

> هلال الفاشر سوف يكون اضافة حقيقية للممتاز.

> وهاردلك لهلال الساحل.

> نتمنى التوفيق لفريق حي العرب في السنترليق حتى تعود (بورتسودان) للممتاز.

> بورتسودان المدينة الثانية في الخرطوم …لا يعقل أن تكون بعيدة عن الممتاز.

> حكومة ولاية البحر الاحمر …اهملت انديتها فكان هذا الابتعاد.

> …..

> عاجل : يا أكرم في الدمازين إلا تشوف ليك (نضارة) شمس مع ناس سيدي بيه ديل.