محمد عبد الماجد

باسكال دا كورتو زي (الاملاء الأعد)


باسكال دا كورتو زي (الاملاء الأعد)

< قبل ايام ..قال رئيس الاتحاد الدولي لكرة القدم سيب (جوزيف بلاتر) أمام مجموعة من طلاب جامعة أوكسفورد ان نجم ريال مدريد كريستيانو رونالدو ينفق الكثير من الاموال على تصفيف شعره مقارنة مع منافسه نجم برشلونة ليونيل ميسي. < غاب على بلاتر في هذا التصريح ان ميسي من امريكا الجنوبية ورونالدو من اوروبا ..والمسافة بعيدة بين الارجنتين والبرتغال..وان كانت نشأة الفنان ميسي في اسبانيا التى جاءها في عمر صغير وهو طفل. < بلاتر انتقد في رونالدو الكثير من الاشياء ..كان من ضمنها ما ينفقه رونالدو على تصفيف شعره كما اشرنا ..ونريد الحديث عنه الان. < رونالدو الذي فاز اكثر من مرة بالكرة الذهبية ..وهو المرشح الاول الان للفوز بالكرة الذهبية بعد اصابة ميسي..ينتقده بلاتر لأنه يهتم كثيرا بتصفيف شعره. < وكأن رونالدو مقصر في كورتو ..هو مع اهتمامه الزايد بشعره إلا انه يعتبر اكثر اللاعبين عطاءً وحركة في ميادين كرة القدم في العالم ..وهو الان الهداف الاول على مستوى العالم ..احرز كمية من الاهداف في الدوري الاسباني وبطولة الاندية الاوروبية ومع منتخب بلاده البرتغال لا يستطيع ان يسجلها (كتيبة) من المهاجمين المتميزين في دوريات اقل مستوى. < رونالدو هذا ..بلاتر قال انه شايف نفسو شوية ..وبهتم بي شعرو اكتر من اللازم. < انتوا استوعبتوا معاي الحكاية دي. < ممكن يكون تصريح بلاتر مقبول ..لو كان مستوى اللاعب منخفض ...او متراجع ...لكن رونالدو مع (تصفيف) شعره هذا ..وما ينفقه من اجل هذا (التصفيف) هو اللاعب الاول الان في العالم. < كما ان شعر رونالدو جزء اصيل من كورتو ..زي نيمار تماما. < يعني لو انفق رونالدو في شعره هذا ..بحكم ثقافته وتربيته (مليون دولار) في الشهر ..ما فارقة كتير ..مع رونالدو. < لا سيما وان شعر رونالدو هذا الذي انتقده بلاتر ..براهو كدا من غير كورة بدخل لي صاحبه اموال لا حصر لها ولا عدد. < ومعروف ومعلوم ان شركات انتاج الكريمات المتعاقدة مع رونالدو تدفع اموالا طائلة في (20) ثانية فقط يظهر فيها رونالدو بشعره (المصفصف) معلنا. < بل ان كبرى الشركات في العالم حتى بعيدا عن كريمات الشعر ..تعاقدت اعلانيا مع رونالدو من اجل اناقته واهتمامه بشعره وتسريحته. < يعني يا بلاتر ..يا استاذ يا كبير انت ...شعر رونالدو هذا بدخل اكثر مما يدخله الدوري المحلي في بلادك سويسرا. < رغم من ان سويسرا اغلى بلد في العالم ...ومستوى دخل الفرد فيها عاليا الى جانب النرويج. < نهايتو كدا ..تصريح بلاتر دا ..من (معتصم جعفر) ما بطلع...ناهيك عن رئيس الاتحاد الدولي لكرة القدم. < معتصم ما بعملها. < معتصم جعفر شنو ...الكلام دا معتصم المناقل ما بقولو. < كلام اشتر ساكت. < طيب اذا بلاتر قالو. < وقالو كمان في افضل لاعب في العالم ...يا ربي بلاتر بي حالتو دي وسخريته تلك لو شاف (باسكال) بقول شنو؟. < بلاتر طبعا ما بعاين لي حاجات زي دي ...لو شاف كورة باسكال وشعرو ..احتمال يحرمو من ممارسة الكورة ذاتها. < باسكال قالوا ليك بصرف تلات ارباع مرتبه في تصفيف شعره. < والله جنيه كتير في البتعمل فيه دا. < وباسكال يا حسرة ..لا عندو كورة ..عشان نقول يستاهل ..ولا عندو دخل ..ولا حصل عمل ليه (دعاية) لي صلصة او مكرونة ساكت او علبة تونة او مرقة دجاج (عشان افراح عصام ما تزعل). < بل ان باسكال ...المفروغ من حكاية ما عندو كورة دي ..(شعر) للصفصفة ذاتو ما عندو. < اها رأيك شنو يا بلاتر؟. < زولنا دا لا كورة ...ولا شعر ..ومرتب باسكال في (10) سنوات ..بدخلوا رونالدو في (ساعة) بي شعرة واحدة كدا. < انا غايتو ما بعرف. < ولا عاوز اعرف ...(موش انا حر). < كورة باسكال دا لو مشى بيها (الصومال)...صالون حلاقة ما بتفتحو ليه. < الزول دا كرهنا (الاحتراف)..كورتو كلها جري ..وشفقة وقزقزة كيعان ..تقول بتاع كاريكاتير. < اول بتاع الكاريكاتير بقزقز كعانو. < المضحك في الحكاية دي ..ان باسكال (فكاها) في نفسو ..صاحبكم فاكر الناس كلها (ضفر). < قال عاوز يقشر. < جاء في الاخبار قبل ايام ( : ، ، ، ، ، ، ، ). < باسكال دا جن. < هلال منو البفاوضك. < نحن ما عاوزين لينا جزار. < ولا طلبنا ركشة. < نحن لو اقتنعنا بي (شعرك)...عندنا الف رأي في (كورتك). < بعدين الامين البرير دا عشان (واوا) دي ممكن يصرف النظر عنك ..لو بتنقطها بي (واوا) دي ما بتنفع معانا. < واوا ...نحن عاوزين نعمل لينا مزرعة دواجن. < ولا بنجامل في الحتة دي. < صاحبكم عاوز يكبر كومو ..وباسكال دا للمعلومية المريخ ذاتو ما ح يعيد قيده. < تجي انت يا ابو شعر مصفصف تقول لي الهلال. < من بدري نحن قلنا كورة باسكال دي شوية ..وهو السبب الاول في كل الاهداف التى تسجل في المريخ. < شوف اي هدف دخل في شباك المريخ سوف تجد ان (الخطأ) من باسكال. < في الدفاع ثغرة ..وفي الوسط بلوة. < شوفوه في الدمازين. < ديل حولوه اي حتة ما نفع ..بعد كدا إلا يفتحوا ليه (محل غاز). < كورة باسكال دا ..(زي الاملاء الاعد). < ما فيها اي رجاء. < اعد يعني اعد. < والله (الصبغة) البتعملها في شعرك دا يا باسكال ..كتيرة على كورتك. < عليك الله يا سعيد السعودي وصل ليه الكلام دا ..ما يقعد يملانا فقر ساكت. < قال الهلال ..قال. < وانتوا يا ناس المريخ لو عاوزين تعيدوا قيدو (ان شاءالله يا رب)..ما تتمقلبوا وتدفعوا ليه كتير ..بسبب انه ادخل (الهلال) طرف في المفاوضات. < الهلال نوع (باسكال) دا ...في (مدرجاتنا) ما بنخلى يقعد. < باسكال دا ..عارفين كورتو كورة شنو؟. < باسكال دا كورة كورة (البخار). < المعني زي قطار البخار الزمان داك ..كورة قديمة كدا ..ما فيها اي تطور او تقدم. < زول بكمل لياقتو في الكلام مع ناس ضفر وبلة جابر ويعمل ليك فيها بعد نهاية المباراة انو تعبان. < ليك حق تتعب ..المباراة كلها تتكلم...وترفع في ايديك. < وعشان تكون عارف وناس (كروجر) ما يمقلوبك ...نكون واضحين معاك من الان. < صبغتك دي لو مشيت بيها الدمازين ..ما بتجي راجع. < سيدي بيه سأل منك. < قال الزول البصبغ شعرو دا منو؟. < قلنا ليه دا باسكال. < قال لينا بيلعب شنو؟. < قلنا ليه بيلعب حارس مرمى متقدم. < سيدي بيه قال ما عاوز يشوفك في (الدمازين). < كلام واضح ..وما فيه اي لف ودوران ..ما تقعد تتلفت لينا كدا زي (الدباسة) الما فيها (دبابيس). < اول الدباسة الما فيها دبابيس بتتلفت. < غايتو الفيها بتتلفت ..الما فيها دي والله ما عارف. < ما ألخبطكم ساكت. < بمناسبة اللخبطة دي. < قالوا ليك واحد دخلت فيه عربية. < شلنا وجري على الحوادث. < في الحوادث الدكتور قال لينا ...انا بقدر اطلع ليكم منو العربية..لكن حياتو في خطر. < قلنا ليه لو العربية طلعت سليمة ..هو ما مشكلة عندنا (140) واحد متلو في الحلة. < المهم العربية. < واتخارجنا على كدا. < ملحوظة : العاوز يقعد اليقعد ...نحن متخارجين. هوامش < محسن سيد قال انه يفقد (8) لاعبين من الاساسين في مباراته القادمة مع المريخ العاصمي. < شفتوا التبرير للخسارة. < اها يا محسن سيد ..الـ (8) ديل ..معاهم فانلتك البتتفأل بيها ..وإلا الكلام دا بدون فانلة. < الجماعة خسروا من الان. < دا شغل قنع عديل كدا. < المهم اهلي مدني ما يكون فاقد (8) لاعبين امام النيل الحصاحيصا برضو. < عشان الحكاية ما تكون ظاهرة. < اخشى ان يكون سرّح اهلي مدنى لاعبيه بعد الهبوط. < بقاء النيل في الدورى ..كارثة من الان للدورى القادم. < اذا لعب النيل سنترليق مع حي العرب..ح ينزل ..ح ينزل. < اذا (شباب) المريخ خسروا من (شباب) الهلال ...ناس الحضري وباسكال واولفيه (العجائز) ح يعملوا شنو مع (شباب) الهلال ناس سيدي بيه ونزار حامد ومحمد عبدالرحمن. < ناسكم ديل يا (سلك)...لمن يصلوا الدمازين الفيهم بتكون انتهت. < لياقتهم ما بتوصلهم ابعد من (الحصاحيصا). < حدهم (الحصاحيصا). < في الدمازين قلنا ليكم بنديهم بس (5) دقائق. < بعد الـ (5) دقائق ..ثانية ما بنزيدهم. < عينك ما تشوف إلا النور. < ..... < عاجل : قالوا ناس المريخ مشوا الاتحاد سألوا فيصل العجب ممكن يلعب في الدمازين.[/SIZE]وإن طال السفر - محمد عبد الماجد صحيفة قوون