محمد عبد الماجد
كأس الممتاز زي (عنقريب الجنازة) شالوه بـ (8) كباتن
رغم من ان المباراة تجمع بين الهلال ولاهلي شندي افضل اندية الممتاز ..واكثرهما حيازة وامتلاك للمواهب والنجوم.
لكن مع ذلك ..فان المباراة كانت ..مملة ، وراتبة وكأنها في ميدان عقرب وليس ملعب الهلال …لدرجة انك تشعر ان المباراة (قديمة)..وهى ليس مباراة منقولة على الهواء مباشرة.
كأنها مباراة لعبت في الموسم الماضي …بل كأنها مباراة لعبت قبل (5) مواسم.
قد يكون فوز المريخ ببطولة الممتاز ..جعل المباراة تأتي (فاترة) على هذا النحو.
نتيجة المباراة لن تكون ستأثر في ترتيب الفرق …الهلال ثانيا في كل الاحوال وكذلك الاهلي شندي ثالثا في كل الظروف.
اضف الي ذلك ان الهلال يلعب هذه المباراة وتفكيره كليا اتجه نحو نهائي كأس السودان في يوم الاثنين القادم ، بعد ان فقد الممتاز بسبب كتلة المريخ في الاتحاد العام.
معتصم جعفر (رئيس الاتحاد العام) كما قال الهلالي اسامة جويلي ظهر في استاد المريخ بعد فوز المريخ بالممتاز في حالة هيسترية وكان (فرحان) اكتر من اكرم الهادي سليم.
ولولا الخجل ..لطلع معتصم جعفر في (العراضة) ليرقص مع اكرم وبلة وموسى وسعيد السعودي.
لكن شافها شينة.
معتصم جعفر كان يحتاج الي ان يقرص في اذنه زول كل (5) دقائق ..ويقول ليه (انت رئيس الاتحاد العام)..وليس رئيس رابطة المريخ في الكلاكلات.
انت …كلاكلة واحدة كتيرة عليك.
نعود الي مباراة الامس …ونقول:
وضح ان الهلال يعاني من (فراغ) اداري بسبب تخبطات وزير الشباب والرياضة بولاية الخرطوم الذي اختفى في ظروف غاضمة.
رغم من ان الوزير هذا كانت مطرة …(نقاطة) ساكت …تجعلها يظهر في الفضائيات السودانية ويعقد في المؤتمرات الوطني.
الان لمن بقينا على الوزير ..اختفى…وقالوا قفل التلفون كمان.
لكن كل هذه الاسباب ..لا تعطي مبررا لأن تظهر المباراة بهذه الرتابة…الهلال اعتاد على مثل هذه الظروف ..ونحن ننتظره في كل الحالات ، ومع كل الاحوال.
نقف في اخطاء مباراة الامس …ونغلظ فيها.
من اجل ان يفتح الهلال عينه ..وينتبه لنهائي الكأس …سنتحدث عن بعض الاخطاء التى ظهرت في الهلال في مباراة الامس.
نبدأ من حكم المباراة (وديدي الفاتح)..الذي كان بعيدا عن جو المباراة ..(انا ما عارفو سارح وين؟)..صرف ضربة جزاء للهلال واضحة ارتكبت مع محمد عبدالرحمن.
لكن مثل هذه الحالات اعتدنا عليها من حكام الهنا والسرور ديل.
حكام الرأية ..الاتنين كانوا في وادي اخر ..رفعوا راياتهم اعلانا عن حالات تسلل لا وجود لها.
ينوموا ويصحوا ويرفعوا رأياتهم بدون اي داعي.
وهذا امر لم يتضرر منه الهلال وحده ..وانما تضرر منه الاهلي ايضا.
ساعد هذا الامر في يضاعف من رتابة المباراة …ومن مللها المنقول على الهواء مباشرة.
من بعد ندخل على مدرب الهلال صلاح آدم ..الذي لا اعرف ماذا كان يفعل في مباراة الامس؟.
يا كوتش ..قلنا ليك قعدتك دي مدرب الشجرة ..ممكن يقعدها.
منذ نهاية الشوط الاول ..وضح ان الهلال يحتاج الي تبديلات ..لأن اداء معظم لاعبي الهلال لم يكن جيدا ..وكان اغلبهم يستحق الاستبدال..لكن مدرب الهلال لم يتحرك إلا في اخر (20) دقيقة.
وكأن صلاح آدم هذا …قايل نفسو بدرب في فريق اخر …وليس الهلال الذي يلعب امامه.
فاكر نفسو بتاع في المباراة في البيت ..وسوف يحللها في اليوم التاني مع عثمان حسن مكي في (المجال الرياضي).
اما اسوأ ما في مباراة الامس …هى الاخطاء (الشنعية) التى وقع فيها لاعبو الهلال …وكان اي خطأ من هذه الاخطاء يمكن ان يكون (هدفا).
ولولا تعامل الاهلي شندي مع هذه الاخطاء برعونة لكان لنا ان نشاهد اكثر من هدف في شباك الهلال.
الاخطاء التى يقع فيها لاعبو الاطراف في الهلال تشكل اكبر خطر على الهلال وهى ظلت نقطة ضعف الهلال الدائمة ..وبسببها خسرنا الكثير من المباريات.
ورغم ان خليفة امس كان نجم المباراة حسب رأي اللجنة المشرفة على جائزة سوداني إلا انه مع ذلك لم يسلم من هذه الاخطاء ..وشاركه كالمعتاد معاوية فداسي.
لا اعرف لماذا يكرر لاعبو الاطراف اخطاءهم في كل مباريات الهلال.
اذا لم يتخلص الهلال من هذه الاخطاء الساذجة ..فان فوز الهلال ببطولات قارية يصبح غير ممكن.
داخليا يمكن ان نحقق الكثير من البطولات ..لأن الاندية التى نلعب معها ..تبادلنا نفس الاخطاء.
في مباراة الامس ..لم تستثن الاخطاء حتى المعز محجوب الذي نفذ ضربة المرمي بصورة اقرب لصناعة الاهداف.
قد تكون ارضية الملعب سببا في ذلك ..لكن حتى ذلك ليس مبررا ..لأن المعز يلعب في هذا الملعب منذ اكثر من عشر سنوات ..وهو ليس قادما من (الكامب نو).
استاد الهلال وارضيته ..عنوانا اخر لما يحدث في الهلال ..وللفراغ الاداري الذي يعاني منه الهلال.
ارضية الملعب ..تأكد لنا وتوضح لنا تخبطات السيد الوزير ..الذي جعل حتى (نجيلة) الارضية تشكي مما يحدث في الهلال.
نصرالدين الشغيل وقع في العديد من الاخطاء في مباراة الامس ..ولو كان الهلال يمتلك مدربا لاستبدله من اول ربع ساعة في المباراة ..حتى لو كانت حجت المدرب في اشراكه واستمراره حتى النهاية من اجل تجهيزه لمباراة القمة.
اعتقد ان تجهيّز الشغيل كان يكون افضل بابعاده من تشكيلة المباراة ..ليكون ذلك جزاء له على هذه الاخطاء التى وقع فيها.
ومن خلال هذه الاخطاء وضح ان الشغيل سيكون بعيدا عن مباراة القمة ان كانت هذه هي كورته.
سيف الدين مساوي …اعتاد على ان يقع في اخطاء الثقة الزائدة التى يلعب بها..رغم من ان ثقته تلك دفعنا تمنها كثيرا.
لا اعرف لماذا يبعد المدرب مدافع الهلال (مالك)..كان يحتاج للمشاركة من اجل الفورمة لمباراة القمة.
لكن مدرب الهلال يرى بعين واحدة.
عمر بخيت كان لاعب على الواقف ..ومدثر كاريكا منذ اكثر من (40) يوم خرج ولم يعد.
مهند الطاهر …لا دا مهند ولا حاجة…مهند الطاهر كان بعيدا عن مستواه.
بل ان مهند الطاهر كان بعيدا حتى من مستوى (بلة جابر).
بكري المدينة …مجهوده الذي يبذله لو رشده كان يمكن ان يسجل اكثر من (3) اهداف.
محمد عبدالرحمن ..كان الافضل مع انه شارك في اخر ربع ساعة ..اما نزار حامد فقد وضح انه كان يحتاج للمشاركة من بداية المباراة.
سيدي بيه ..انعكس عليه العك الذي كان في المباراة ..لذا كان اكثر المتضررين من هذا العك …باعتبار ان سيدي بيه تحتاج موهبته للظهور والتوهج لمباراة منظمة.
الاهلي شندي لعب ..قدر قدرته ..وقد كان جيدا …امتلك الكرة وتناقل لاعبوه الكورة اكثر من الهلال وبصورة افضل من الهلال الذي يلعب في ارضه ووسط جمهوره.
المباراة بصورة عامة لم تكن جيدة …وغاب عنها (الامتاع) الذي كان ينتظر منها.
لو كانت المباراة في نفس توقيت مباراة المريخ ومريخ الفاشر كانت سوف تكون اكثر سخونة ..واكثر حضور جماهيري.
لكن الاتحاد العام ..اي شيء طرفه الهلال يريد ان (يكتله) وان يخرجه بصورة رتيبة.
قصدنا ان نكتب عن هذه الاخطاء تحاشيا لتكراره في مباراة القمة …التى لا تقبل غير انتصار الهلال والعودة بكأس السودان من الدمازين.
ملحوظة : ناس المريخ طبعا بصدقوا كلامنا دا …خليكم في فرحكم هذا الي الاثنين القادمة.
هوامش
في واحد شايل ليه تلفون …قال مفتاح مدينة الدمازين كم؟.
قلت ليه مفتاح الدمازين (سيدي بيه).
واصل سيدي بيه ..اهدافه بكل الطرق والسبل.
اها المرة دي سجل ليكم بالرأس.
تاني عاوزين شنو؟.
سيدي بيه سجّل للمرة الرابعة على التوالي.
يا سيدي بيه …كملت كل الطرق …في الدمازين ح تحرز بي ياتو طريقة.
والله سيدي بيه في (الدمازين) مع ارباب معاشتكم ديل يا مريخاب لا بتمسك ليكم ولا حاجة.
ابدأوا يا مريخاب من سالب واحد.
يعني هدف سيدي بيه مفروغ منو.
انتوا قبل ما تبدأ المباراة مغلوبين واحد.
شوفوا بعد كدا ح تعملوا شنو؟.
هل تعلم ان المريخ الي الان ما عندو كابتن.
مرة يجيبوا موسى الزومة ومرة الباشا ..ومرة سعيد السعودي ..ومرة اكرم الهادي سليم ومرة هيثم مصطفى.
ومرة يستعينوا بي فيصل العجب الذي اعتزل.
الناس ديل ما عندهم كلمة.
اقصد ما عندهم قايد.
عشان كدا …الكأس وقت رفعوه ..شالوه بي (8) لاعبين ..زي عنقريب الجنازة.
والله ديل ما فاضل ليهم إلا يجيبوا صلاح الامير من الخرطوم الوطني ومجدى ام بدة من الامل عطبرة …ومنتصر فرج الله من النيل الحصاحيصا ..عشان يشاركوا في رفع الكأس.
الوعد بيننا نلتقى قريبا ان شاءالله في (من الغلاف للغلاف)…عشان نشوف الفضائح دي.
على الهلال ان يرتب منذ الان …لالحاق اكبر خسارة للمريخ.
المريخ بي حالتو دي ..ممكن تغلبوه خمسة.
معظم لاعبي المريخ يعانوا من (تقدم السن)..والشيخوخة المبكرة.
سيدي بيه ..ونزار حامد وبشة ومحمد عبدالرحمن ومحمد احمد واطهر الطاهر …ممكن يجعلوا المريخ يخسر بسداسية.
ألعبوا بي الاولاد الصغار ديل يا صلاح ..تلحقوا بالمريخ اكبر خسارة في تاريخه.
نتمنى ان تأتي لجنة تسيير الهلال قبل مباراة القمة.
ونسأل الله ان يكون ضمن اللجنة ميرغني ادريس.
التسجيلات دورت.
ونحن في انتظار لجنة التسيير.
…..
عاجل : يا معتصم جعفر …اخجلوا.
وإن طال السفر – محمد عبد الماجد
صحيفة قوون
