جوز الحمام في الدمازين بعرف (7) لغات غير دبلوم صيانة الحاسوب
< الدمازين لسه بي خيرها ...اتغيرت حاجات كتيرة ..لكن الدمازين مازالت تحتفظ بسمات الزمن الجميل.
< المدن في السودان (ذاكرة) حية للكثير من الاحداث والذكريات.
< اي مدينة فيها شارع المدرسة ..وميدان الكورة ...وكشك الباسطة..وشجرة نبق.
< الدمازين لها خاصية وحدها ..مسكونة هي بـ (صعيد) مدني جميل.
< مازالت الدمازين تحتفظ بي (جكسا في خط ستة)...(وحمد والديبة حاجة عجيبة)...(او تنقا ..تنقا ..تنقا)... (وسا سا سا سادومبا) ..(واسأل العنبة الرامية فوق بيتنا).
< هسع سا سا سا سادومبا ...بقت سا سا سا سيدي بيه.
< انتوا ناس الهلال ديل قصتهم شنو مع (السينات) دي.
< كل الاشياء في الدمازين ..هلالية خالصة...من تصبح لمن تشرق ما بتلاقى ليك مريخابي.
< قالوا ليك المريخابي الوحيد في الدمازين ..من (ولاد الحصاحيصا) .. والايامات دي قالوا (طفش) من البلد...بعد ما لعب النيل (سنترليق).
< دمازين الزمن الجميل ، والقون من برة الخط يا مهند الطاهر.
< سيدي بيه في الدمازين ...(سيناتو) برة.
< بمناسبة (علبة الساردين) الفوق للتلاجة ديك.
< هي وينها (علبة الساردين) هسع؟.
< قالوا ليك اي واحد في البلد دي يقول ليك عن الماضي (الزمن الجميل) ، ونحن زمان كنا وكنا وكنا..واي زول يقعد يحكي ليك عن الكورة او الفن او السياسة زمان ..بقول ليك عهدنا دا كان (العهد الذهبي) للسودان.
< زمان (البنت) ما بتشوفها إلا في (الكوتشينة).
< في الكوتشينة ذاتها لو لقوها في ورقك ...بدكوا ليك ورقك.
< السودان دا اصلا ما كان فيه عهد (فضي)..او نحاسي كدا...كلو كان عهود (ذهبية).
< طبعا هسع عهدنا دا عهد (صفيحي).
< ناس الخمسينات ..يقولوا ليك ..الخمسينات كانت (العهد الذهبي) للسودان ..الانجليز يا دوب طلعوا من البلد ، السودان كان مفتح زي الزهرة ...والبلد كانت بي خيرها ، اصلو ما في زول بقول ليك ما عندي.
< في الخمسينات ما في زول كان بديّن ليه (قروش) من زول ...سمعتوا ليك زول في الزمن الماضي داك ..قال ليك انا كنت متسلف لي قروش من زول.
< البلد كانت لسع ما خربت في الخمسينات ..الحاجات والخدمة المدنية زي ما تركوها الانجليز.
< السودانيون كانوا لسع ما دخلوا ايدهم في حاجة ..عشان كدا اي حاجة كانت فوق.
< هسع يا كافي البلاء ..الموردة نزلت.
< زمان الموردة عادي تضرب ليك (المريخ) دا زي الحمام.
< الدنيا كانت حلوة...قبل ما يظهروا ناس صديق علي صالح ومصطفى توفيق.
< في الخمسينات ..قالوا ليك (كيلو الباسطة)..تلقى قاعد تحت الزير ما في زول بمشي عليه.
< الكديسة اللبن البايت ما بتشربو.
< ناس الستينات ..يقولوا ليك (العهد الذهبي) للسودان كان في عهدنا نحن ديل ...البلد كانت في مرحلة انفتاح ..والناس يا دوب بدأت تحصد ثمارات كفاحها وعلمها وثقافتها.
< الكورة والسياسية والفن ..كلها ازدهرت في الستينات ..واتبلورت (الثقافة) في كل اشكال الحياة في السودان.
< سيد اللبن ..البدق ليك الباب تلقاه قاري (الحب في زمن الكوليرا).
< الناس كلها كانت واحد ..مستوى المعيشة واحد ..الفايت الناس شوية تلقى عندو (عجلة).
< ما في حاجة اسمها (همر)..او روتانا سينما.
< ناس السبعينات ...يقولوا ليك (العهد الذهبي) للسودان كان في السبعينات ...الما عاش في السبعينات ما عاش...ما تسمع كلام ناس الستينات ديل.
< ديل كانوا (ممصرنين) ساكت ..ما كانت في حاجة سودانية كدا خالصة.
< في السبعينات ....بطل الفيلم الهندي ما كان بموت ...هسع (البطل) يموت قدامك في اول خمس دقائق..ما تقدر تقول اي حاجة.
< ناس التمانينات يقولوا ليك لا..العهد الذهبي للسودان كان في التمانينات...الجنيه كان بي (4) دولار.
< التفاحة كان فيها (12) تفاحة.
< ما زي هسع ربع البصل فيه (بصلة) واحدة.
< ناس التسعينات ..مقتنعين ..ما بنافسوا...اي واحد تقول ليه انت عملت شنو؟.
< يقول ليك قلبت (الحمامات) سايفون.
< ناس الالفية الثالثة ..برة المنافسة في الاساس.
< ناس الالفية الثالثة ...ركبوا الاطباق والدشوش وبقوا يتفرجوا لي في هيفاء وهبي ونانسي عجرم.
< لسانهم اتعوج.
< الدمازين ..هسع بتعيش زمن جميل ..بي خضرتها ..وبي ناسها ..وان كانت تأثرت بالصراعات والحروب في المنطقة.
< لكن تبقى رغم كل هذه الجراح ..الدمازين عايشة في عهد ذهبي ..صنعتو براها.
< الهلال يوم الاثنين ح يلعب مع المريخ في الدمازين.
< يا ناس الدمازين ابقوا عشرة على هلالكم.
< الهلال.... الدمازين وام درمان وعطبرة وكسلا ...كلها عنده واحد.
< ما فارقة معاه.
< ناس المريخ طبعا ان مرقوا (صالحة) دي ..بتجهجهوا ما بعرفو رأسهم من كرعينهم.
< رأسهم بضرب.
< اكرم الهادي سليم ..في استاد المريخ ناس كاريكا ومهند الطاهر قاعدين يجهجهو...تتخيلوا موقفو ح يكون كيف في الدمازين.
< اكرم الهادي سليم في الدمازين ..لو سألتو عن جدول اتنين بقول ليك ما حافظ فيه حاجة.
< باسكال في الدمازين بكون زي الطفل الرايح من اهلو في المولد...حالتو تحنن الكافر.
< احمد الباشا ..طبعا في ام درمان اختفى ...يا حليل الباشا الكان باشا بحق وحقيقة.
< يا ناس الدمازين قالوا يوم الاثنين في (طرد) حمام ح يصلكم من ام درمان.
< برج حمام كامل كدا ..ح يجيكم يا ناس الدمازين.
< الهلال ح يضرب ليكم (الحمام) دا ..طبق ..طبق.
< حمامة...حمامة.
< حمام الدمازين ...حمام غلاد وكبار وسمح.
< ناس باسكال واوليفيه وضفر ديل حمام (مجنح).
< ما بقدر يطير.
< قالوا ليك حمام الدمازين بجيّد اجادة تامة (7) لغات.
< بجيدوا (النفخ)..والكضب ..والخمج الاعلامي.
< هسع عليكم الله في (حمامة) عاقلة كدا ..بتعمل البعملوا فيه ناس المريخ ديل.
< حمام المريخ قالوا فاوضوا مدثر كاريكا ..وسيف الدين مساوي.
< انتوا يا حمام ...ما عارفين ناس كاريكا ومساوي ديل ..ما بفاوضوهم إلا بواسطة (الامم المتحدة).
< يعني ما في زول في المريخ الان عندو مستوى عشان يقعد مع كاريكا ومساوي.
< انتوا تقعدوا مع بلة جابر...تقولوا ليه جدد لينا.
< تقعدوا مع ضفر ..تقنعوه بعد ما حلف قسم.
< تقعدوا مع العجب ...تشربوا معاه قهوة.
< تقعدوا مع اكرم ..تقولوا ليه ح نخصم من مرتبك.
< لكن تقعدوا مع كاريكا ومساوي ..عشان تتكلموا عن شنو؟.
< كاريكا ومساوي ديل ..اقل حاجة بتكلموا فيها (حادث المنصة).
< اها نوع ديل ..تجيبوا ليهم زول من وين عشان يقعد يتكلم معاهم ويتحدث.
< غايتو نحن (الحمام) بتاع الدمازين المرة دي ..ناوين (ننتف) ليه ريشو.
< اي ريشة عندنا ليها (نتفة) خاصة.
< بعد ما ننتف (الريش)..قررنا كلنا كدا ...نشوي الحمام.
< عاوزين حمام مشوي.
< فترنا من (شوربة الحمام).
< المرة دي عاوزين نخش على شية الحمام.
< مالك وخليفة والمعز محجوب والشغيل ...ديل ناس خصصناهم للنتف.
< نتف الريش.
< الشغيل حالف ما يخلي ليه (ريشة) طايرة.
< نزار الصاقعة ومهند الطاهر وبشة وسيدي بيه وكاريكا ...ديل ناس (المشوي).
< بعد ما ناس الشغيل ينضفوا الحمام من (الريش)..ح يحولوه لي ناس مهند ونزار وسيدي بيه وكاريكا عشان يشوى لينا الحمام.
< طبعا الحمام قبل ما يشوه لازم يتبهر ...والتبهير دا مسؤولية عمر بخيت.
< بعد دا ..طوالي الحمام يدخل الفرن.
< الحمام طبعا ما عاوز ليه نار كتيرة.
< (10) دقائق بستوى.
< بعد ما يستوى ..بكري المدينة ومحمد عبدالرحمن وسيف مساوي ..ح يضربوا ليك الحمام.
< والله الجنبك ما بتدي.
< الغريبة قالوا حمام الدمازين ...مع الـ (7) لغات ..عندو دبلوم صيانة اجهزة حاسوب.
< قلنا ليهم الـ (7) لغات دي عرفناها ...دبلوم صيانة الحاسوب دي شنو؟.
< قالوا لينا موش اكرم الهادي سليم ..مرات بطلع في العراضة ..ويقعد يرقص.
< قلنا ليهم بالحيل ..اكرم بعمل كدا.
< قالوا لينا ..اها البعمل فيه اكرم الهادي سليم دا اسمو (دبلوم صيانة الحاسوب).
< قلنا ليهم ان بقى كدا ...(ضفر) ذاتو عندو دبلومة.
< عشان كدا قلت ليكم الدمازين ..دمازين الزمن الجميل.
< جوز الحمام ...(ضفر وباسكال).
< جوز الحمام كان فيه (11) زول.
< بالله شوفوا الرخاء دا كيف؟.
< الدنيا كانت سمحة ...واي حاجة فيها سعة ...ما زي هسع ..الناس مخلوعة ..وزيتها طالع.
< الواحد لو عاوز يركب في الحافلة ..يتلفت ورا وقدام ..خايف يلقى ليه زول بعرفو.
< المواصلات بقت غالية.
< يعني لو طلعت حافلة الكلاكلة شرق ..ولقيت فيها (5) انفار من ناس البلد ..إلا تتحرفن وتقول للكمساري ..اسمع الحافلة دي ماشى المنشية.
< يقول ليك : لا.
< طوالي تتخارج ..وتقول ليهم معليش يا جماعة ركبت غلط.
< ملحوظة : إلا تعمل كدا.
هوامش
< وليد علاءالدين موهبة جيدة ...ولاعب ممتاز ...ما في ذلك شك ..وصغير في السن...لكن الهلال مفروض يركز على اصحاب الاجسام القوية ..والطول الفارع.
< مالك اسحق ..وباسيرو بمبا ..يتميزان بالطول والجسم الرياضي القادر على المنافسة افريقيا.
< لا بد للهلال ان يدخل طرف اصيل في مفاوضة مالك وباسيرو خاصة وهما مطلقا السراح.
< ما تضيعوا مالك وباسيرو يا ناس الهلال.
< الوزير ..ضيّع علينا الممتاز ...والظاهر عليه ح يضيع علينا نجوم التسجيلات.
< خالد ابوشيبة ونادر عطا ..كتبوا كلام جميل عن الامين البرير.
< والبرير يستحق التقدير ...والتكريم ..اوفى في فترته ..ولم يترجل او يستقيل ..رغم الصعاب والمضايقات التى تعرض لها.
< البرير خط له نفسه تاريخ لوحده.
< اختلفنا ..او اتفقنا معه.
< البرير يجب ان يكرم على صموده وثباته.
< وعلى كل الهلالاب ..العمل والتكاتف في مرحلة التسجيلات.
< ومباراة الدمازين ..مطلوب ان تكون كلمة الهلالاب واحدة.
< محمد كوكو مهاجم الاهلي عطبرة ..لاعب جيد وممتاز ..ويستحق الدخول للكشوفات الزرقاء.
< سنكارا ..وبمبا والمامي ...الله معاكم.
< قشة ما تعتر ليهم.
< لجنة التسيير فترتها يجب ألا تقل عن (6) شهور.
< الانتخابات القادمة ..نريد ان يكون فيها تنافس قوى ..وتسابق شريف.
< لذا لا بد ان تكون الفترة كافية ..وان تكون فترة لجنة التسيير اكثر من (6) شهور.
< .......................
< عاجل : سيدي بيه..قال جيبوا لي قياسات المرمى الجنوبي في استاد الدمازين بالملي.
[/SIZE]وإن طال السفر - محمد عبد الماجد
صحيفة قوون
