مُباصرة معايـش

علم ناشئ جديد اسمو (علم الاقتصاد العصبي).. ودا بي يهتم بالعمليات الذهنية والعصبية المرتبطة باتخاذ القرارات الاقتصادية.. للفرد.. يعني زول قلت ليهو بديك حسي عشرين جنيه.. ولو انتظرت لي بكرة بديك مائة جنيه.. تلقاهو طوالي قعد يضرب.. يمكن بكرة الزول دا يزوغ.. أو يموت.. أو يتسرق.. وعصفورة في اليد خير من مليون طايرة.. يتلفت عليك ويقول ليك.. يا زول أديني العشرين.. لو كان تفتيحة يقول ليك أديني العشرين حسي وخلي التمانين لي باكر.. ولو ست بيت قامت من الصباح.. وقعدت في بنبر في الحوش في ضل المتبخ وتفكر تسوي الأكل شنو وهي راجلا جدع ليها عشرة جنيه ومرق.. مراكز الدماغ المسؤولة عن اتخاذ القرارت تشتغل.. “يا ربي أجيب لحيمات “مسكول” وأسويهن.. واللا يا ربي أسوي ليهم سخينة؟.. أجيب لي بصيلة.. وموية وملح.. ورغيفات بخمسة جنيه.. وأكبها ليهم في الصينية.. ويلغفو؟..” في النهاية تقرر تنتظر الوليدات لمن يجو من المدرسة ويتلملمو.. وتسوقهم بي عصاية المعلم ويمشو يتغدو في بيت ناس أبوها.. والعشرة جنيه خمسة للركشة.. وتوفر خمسة لأنو بعدين أبوهم فوق عينو بيجي يسوقنا ويرجعنا.. أو زول جا لقى رغيف أبو أربعة وزن صغير.. بجنيه.. وأبو تلاتة وزن أكبر شوية بجنيه برضو.. طوالي يرجع بعقلو للبيت ويحسب ناس البيت.. ويلقى أخير ليهو يشتري العددو كتير وصغير عشان يوزعو عليهم.. ولما شافع يقول ما شبعت ينهزو “يا ولد.. ما شبعت شنو؟؟؟؟.. انت ماكل ليك رغيفة بي حالا..”.. ولو واحد مشى الدكان يشتري فول وبتاع الدكان قال ليهو فول بجنيه مافي أقل حاجة باتنين جنيه.. يشتري الفول باتنين ويعصر على بتاع الدكان يكتر ليهو موية الفول.. ويمشي البيت ويقسم الفول على اتنين.. جزء يفطر بيهو حسي وجزء يفطر بيهو باكر.. ويكون اشترى فول بجنيه من غير ما بتاع الدكان يعرف.. أو لو ماشي مشوار وداير يتقلهد ويركب أمجاد.. وقال ليهو بخمسين جنيه.. يحسبها بسرعة جدا قبل أن يرتد لسيد الأمجاد طرفه.. ويقرر يمشي بالمواصلات عادي.. بتكلفو عشرة جنيه.. ويكون وفر أربعين جنيه..!!! إن الخواجات أصحاب هذا العلم الوليد (الاقتصاد العصبي).. لو دايرين يعرفو الاقتصاد العصبي المو خمج يجونا هنا.. ويمسكو أقرب زول.. يلقوهو ماهيتو أربعمائة جنيه.. وعندو ستة شفع.. ومرتو.. وأمو.. قاعدين في بيت واحد.. ماكلين شاربين.. ومتفرجين في المسلسل ويبكو ججججججت لي عند الحبوبة على موت “ملكة جانسي” في المسلسل الهندي المدبلج.. والبنت الكبيرة في الجامعة ومشترية موبايل باتنين مليون بالأقساط على حساب أبوها “أب اربعمية جنيه ماهية”.. بالميت كدا مصاريفو في الشهر تلاتة مليون.. وتلقاهو ماشي في الأسواق.. ويضحك ويهظر.. ومرات مرات تنتابه موجات من القلهدة والتغا.. ويغز كوعو في نص الحوش ويقول لي مرتو “اصبري انتي.. إن ما عرستّ فوقك لوميني”!!!!