برالمة الهلال (الله يستر ساي)

< عاد المالي (سيدي بيه) إلى بلاده بدون أي مقدمات، وكأنهم لم يوعدونا بإعادة قيده ..ومر أمام أعين لجنة تسيير الهلال التى تتكون من (20) عضوًا..أقل رتبة فيهم (لواء) مرور الكرام. حارسين شنو؟. < يا ربي يكونوا فاكرين سيدي بيه دا زول تاني. < يمكن ما عارفنو. < يمكن ما جايبين خبر. < ما تفتكروا جايبنكم يا ناس لجنة التسيير ..عشان تقعدوا تتكلموا لينا عن المصالحة ...وجمع شمل الأهلة. < والكلام بتاع (الدبلوماسية) دا ..الكلام المنمق وجميل. < الحاجات دي ناس هاشم ملاح ..كانوا بقدروا يعملوها. < الموضوع دا ما عاوز ليه أي (جنرالات). < عادي. < سيدي بيه اللاعب الصغير ..الذي لم يحدث انجازًا إلى الان ولم يلفت الأنظار إلا في نطاق ضيّق في الهلال ..فلت من لجنة تسجيلات الهلال...وفشلوا من أن يحسموا أمره ..رغم من أنه لاعب (حر)..ولا يحتاج تسجيله لمفاوضة نادي أو اتحاد. < الموضوع ما بستاهل. < الزول كان في يدكم ..عاوزين ترجونا نظرية (السيستم قفل)..وانتظروا السيستم في يونيو القادم. < والسيستم دا هسع كان فاتح. < زي دكان ود البخيت ديمة قافل ..قدر ما تمشي عليه ..يقولوا ليك ود البخيت مشى يجيب ليه (كهربة). < أنت يا ود الناس الكهربة دي بتجيبها بالوقية. < فلت سيدي بيه ليلحق بلاعب الاهلي شندي مالك اسحق ...الذي يتواجد الان في غرفة تسجيلات المريخ ..وناس الهلال بضربوا في تلفون (الجلال) لاعب النيل الحصاحيصا ..منتظرين مالك اسحق يرد عليهم من تلفون الجلال. < قالوا احتمال الخطوط تتشابك. < زمان التلفونات دي كانت بتحصل فيها حاجات غريبة..تضرب للعوض يرد عليك تامر. < المشكلة تضرب لي اخلاص ..يرد عليك عبدالجبار. < الحاجات دي عادي كانت بتحصل ...في ارقى تلفونات كان الموضوع دا بحصل. < خليها التلفونات هسع دي. < وفلت من الهلال لاعب اهلي شندي المحترف باسيرو بامبا ...وناس اللجنة بضربوا في تلفون (ادريس) لاعب فريق المريخ الفاشر. < عاوزين بيه شنو؟..أنا ما عارف. < ناس سيكافا ديل ..ما يغشوكم ساكت ..الواحد يتألق أمام اريتريا والصومال ..تعملوا لينا نجم التسجيلات. < ناس الجرايد ذاتهم يعجبوك ..بزيدوا الحكاية شوية..يقولوا ليك والله صلاح الجزولي جاب ليه قون ..في الاعادة ما بتقدر تفهمو. < باسيرو بامبا كان يتمنى الهلال ..وكان يرى بأن أسلوبه قريب من اسلوب الهلال..(ويمكن القول إن نجاح باسيرو في المريخ سوف تكون نسبته ضعيفة جدًا). < وهو لن يضيف أي شيء للمريخ ...لكن في الهلال كان يمكن أن ينجح نجاحاً كبيرًا. < لكن طبعاً ناس المريخ اللاعب الذي يمكن أن ينجح في الهلال لو قعد في (أم بدة) ما خسرانة معاهم. < هذه (التفلتات) التى تحدث من لجنة تسيير الهلال ...من (خفير) مدرسة ما بتحصل. < فكوا الورق ...ونجوم التسجيلات حايمين برة الغرفة. < يا جماعة (الثقة) دي ما بتنفع في التسجيلات ...شغلكم دا ما شغل (نجيض). < انتوا يا جماعة (20) عضو ..أقل واحد فيكم (لواء)...تفقدونا كل اولئك النجوم. < عاوزين تسجلوا منو؟. < فقدنا مالك اسحق ..قلنا ما مشكلة ..(كبير في السن)....هو ذاتو عندو (صريجات) زي ضفر. < فقدنا باسيرو ..قلنا ولا حاجة ..يعني شنو؟..(هو ذاتو تقيل)...نعمل بيه شنو في (البرد) دا؟. < هو وينو البرد؟. < وها نحن نكاد أن نفقد (سيدي بيه)..الذي كان في غرفة تسجيلات الهلال..وفشلت لجنة التسيير من التعامل معه أو حتى الابقاء عليه لبعض الوقت للتفاوض. < لجنة فيها (20) جنرالاً ..تفشل في الابقاء على لاعب كرة قدم ..عمره لا يتجاوز الـ (22). < طيب يا جماعة انتوا لو ما قادرين تقنعوا (سيدي بيه)...ح تقنعوا منو. < راجيين شنو تاني؟. < أسوأ من كل هذا ..أن اللجنة ظلت ترصد لاعبين ما عندهم أي علاقة بكرة القدم. < مرة يقولوا ليك رصدوا الطرف اليمين بتاع النيل الحصاحيصا. < عاوزين بيهو شنو الطرف اليمين ...نحن عندنا (حفلة). < ومرة يقولوا ليك ح يجيبوا الطرف بتاع مريخ الفاشر. < ومرة يقولوا ليك ..ح يجيبوا مدافع الاهلي مدني. < والزمن ماشي ..وما شفنا أي حاجة...والتسجيلات هسع ح تنتهي ..والسيستم ح يقفل. < السيستم قفل على البرير (الشفت)...ما يقفل عليكم انتوا. < ومرة يقولوا ليك ح يجيبوا حارس بري عبدالرحمن الصقر. < عينكم في الدعيع ..تمشوا تفاوضوا لي في حارس بري. < اللجنة دي ما لها عاوز توقف قلبنا. < يا جماعة انتوا ما عندكم علاقة بالكورة ولاَّ شنو؟. < لو اللجنة دي كانت عاوز تسجل صاح ..كانت تضم لغرفة التسجيلات أحمد ادم عضو المجلس السابق ..وكان يمكن أن تضم محي الدين الديبة. < انتوا لو ما عارفين ..أسألوا ....عدم العرفة ما مشكلة ..لكن (السكوت) هو المشكلة. < الاكتفاء بالسادة وقاقرين ...ليس كافي..كان يفترض أن تدعم لجنة التسجيلات بخبراء. < وكان أجمل من كل هذا أن يكون ميرغني ادريس في هذه اللجنة ..عشان يا جماعة ما تقعدوا تتكلموا لينا ساكت. < نحن الكلام شبعنا منو؟. < عاوزين نشوف. < هذه اللجنة لو لم تنجح في فترة التسجيلات الحالية ..لن تنجح في أي شيء آخر ..ولن يستحملها أي هلالابي ساعة واحدة. < حتى لو شبعتونا كلام جميل ..ومثالية ..ولم شمل أمة الهلال ..كل هذه الأشياء لن تجدي أن فشلت لجنة تسيير الهلال في التسجيلات الحالية. < دقيقة ..ما بنستحمل هذه اللجنة ..إذا سارت على هذه الطريقة التى تسير عليها الأمور الان. < أمام اللجنة فرصة تاريخية ..تتمثل في النجاح في التسجيلات وارضاء تطلعات جماهير الهلال ...حتى تخلق لنفسها الأرضية التى يمكن أن تنطلق منها. < أي مشروع مهما كان عظيماً إذا جاء بعد الفشل في التسجيلات لن يكون مقبولاً ..ولن يتحمس له أحد. < لجنة تسجيلات الهلال أمس ..(رغم القسم)..سرب خبر عن رصدهم لمهاجم المريخ السابق هنو. < هنو لاعب الاهلي الخرطوم مطلق السراح الحالي. < بالله دا كلام يا جماعة. < هنو هذا ..دفعة صلاح الأمير وعبدالحميد السعودي ..بتفاوضوا فيه الان عشان شنو يا ناس الهلال؟. < نحن نرجح أن الخبر غير صحيح ...لكنه حتى وأن كان غير صحيح ..يجب أن يردع ويرفض ..لأن الكثير من الأخبار تطلق كبالونات اختبار ..وقياس للرأي العام. < لذلك أحسن للهلالاب أن يكافحوا مثل هذه الاخبار. < واضح أن اللجنة ما عارفة شيء ..أي زول يقول ليها سجلوا فلان ..يقوموا يجيبوه. < في كرة القدم وفي الدنيا كلها تعتبر (التسجيلات) اخطر الملفات في عالم المستديرة ..وهي تحتاج إلى كياسة وتخطيط وذكاء ..وعين فاحصة. < شغلكم البتعملوا فيه دا ..مخيف. < لا يعقل أن نقرأ في (72) ساعة ألف خبر عن مدثر كاريكا. < الاتفاق مع مدثر كاريكا. < مدثر كاريكا طلع زعلان. < مدثر كاريكا ح يقعد جلسة صلح مع هيثم مصطفى وهو سيف مساوي. < مدثر كاريكا يدخل غرفة التسجيلات. < مدثر كاريكا يطلع من الغرفة. < مدثر كاريكا ..يقفل التلفون. < التسجيلات لا يتعاملوا فيها على هذا النحو ...التسجيلات دي اشتغلوا فيها بنظرية ( امسك لي وبقطع ليك). < ما يحدث في جانب اللاعبين المحليين ..يحدث أيضاً في جانب المحترفين. < الهلال يعيد ترواري. < لا ترواري ما ممكن يرجع. < الهلال يفاوض سادومبا. < الهلال يرصد الزمبابوي الذي يلعب في جنوب أفريقيا. < أبدًا الهلال ح يجيب لاعب الزمالك السابق عبدالله سيسه. < الهلال يفاوض محترف شبيبة القبائل. < انتوا قايلين التسجيلات دي ح تشتغل (6) شهور. < يا ناس اللجنة عووووك ..التسجيلات دي بدأت اليوم ..وفترتها (20) يوماً فقط. < وأسامة عطا المنان بي (مريخيتو) دي ..هسع ح يقول ليكم : (السيستم قفل). < سيستمكم دا اسألوني منو أنا. < ملحوظة : ألحقوا السيستم يا عالم. هوامش < الهلال سوف يعيد قيد مدثر كاريكا وسيف الدين مساوي ..واتمنى كذلك اعادة خليفة الذي لم يُقيَّم تقييم جيد. < اللجنة ظلمت خليفة. < ارجو أن يكونوا تداركوا ذلك الأمر ..لأن خليفة لاعب مهم وضروري في الهلال. < ومن باب العدل أن يُقيَّم بشكل جيد. < كذلك أتمنى أن تكون اللجنة وصلت إلى حل مرضٍ مع محمد عبدالرحمن. < أما سيدي بيه ، فنخشى أن نقول منه العوض وعليه العوض. < نذكر رئيس لجنة التسجيلات عبدالله البشير أنه وعد بإعادة قيد الخماسي. < والجماعة ديل بدون سيدي بيه أربعة يا جنابو. < ما تقعدوا تجهجهونا ساكت. < اسماعيل صديق لاعب الخرطوم الوطني لاعب بنيته الجسمانية ضعيفة. < واخشى على الهلال من أصحاب البنية الضعيفة ..والهلال يقاتل وينافس أفريقياً. < المريخ أصبح (أهلي شندي) اخر. < فيصل موسى وباسيرو ومالك ..وربما الدعيع. < طيب ما تحولوا المريخ إلى (شندي). < الهلال إذا طلع بي فارس عبدالله يكون طلع بنجم التسجيلات الأول. < نخشى ناس اللجنة ديل يطلعوا لينا بتاعين كلام ساكت. < بتاعين كلام ..وتلفزيونات ..ولم شمل الهلال. < لموا لعيبتكم أول. < الشمل ملحوق. < الكلام السمح ..والدبلوماسي ما بيأكل عيش. < التسجيلات ما عاوزة شغلكم دا. < ننتظر أن ينجز المجلس الملف الأول اليوم في التسجيلات. < ونقول ليكم من الان ..السيستم باقى ليه (19) يوماً. < (19) يوماً ويقفل. < برالمة لجنة التسجيلات ديل يمكن يكونوا ما عارفين. < يمكن يكونوا ما جايبين خبر. < نحن لمن كنا برالمة في الجامعة ...أول ما مشينا الكافتريا نشرب بيبسي ...السنايرة ثبتونا ليكم. < قالوا لينا ما في برلوم بشرب بيبسي. < وهسع نحن بنقول نفس الكلام لي ناس لجنة التسيير. < ما في برلوم بشرب ليه بيبسي. < البرالمة ديل ..وش كدا لقوا نفسهم أمام التسجيلات. < يلا يا نجاح. < يا يا غريب يلا لي بلدك. < كمان نحن ما بنعرف. < إن شاء الله تصب مطرة. < ......... < عاجل : طبعاً المطرة ما عندها أي علاقة بالموضوع دا.[/SIZE]وإن طال السفر - محمد عبد الماجد صحيفة قوون