فتــــــــوها يا جمــــــاعة
< في اخر الاكل (وقت اللخطبة تكون حصلت في الصينية) ..وعندما يكون هناك (بوادر) شح في (الملاح) ، او ظواهر (انقطاع) سوف يحصل في المستقبل القريب في الفول او العدس ، او حتى (الملوخية) ...والرغيف بكون (كتير)..والليمون والشطة بي خيرهم..والناس لي هسع ما شبعوا ..بقوم واحد من الجماعة (المفتحين) ..من اصحاب (المبادرات) الكريمة يقوم يقول : (فتوها يا جماعة).
< خلاص يعني اكتشفت الذرة.
< الناس الفى الصينية كلهم يصوّتوا لصالح هذا الاقتراح ..ويوافقوا على ذلك الاقتراح الداعي للفتة.
< يلا الفتة احسن حاجة.
< في اتنين ..تلاتة في الصينية بعملوا فيها مهذبين ...بقوموا يصوّتوا لصالح الاقتراح بالسكوت ...(السكوت الاجماعي) يعني.
< يقوم يحصل كدا زي اتفاق جماعي على (الفتة)...يقطعوا الرغيف ويقلبوا السلطة في الشطة في الملاح ، ويضربوا.
< ما يخلوا حاجة ..ينسفوا ليك (الصينية) دي نسف..يخلوها ليك ربع لوح التلج في المناسبة.
< في حكمة يونانية (قاطعها من رأسي دا) بتقول ليك الفتة لو اتصلحت افضل من شية الجمر.
< لو اتصلحت بـ (اخلاص).
< اخلاص ..وإلا نجلاء فتحي.
< طبعا (نجلاء فتحي) ما عندها اي علاقة بالفتة دي.
< ناس المريخ السنة دي في التسجيلات ..اشتغلوا لينا بي نفس النظرية.
< نظرية (فتوها يا جماعة).
< عاوزين تغالطوا طبعا.
< عاوزين تكابروا.
< طيب انا بوريكم القصة كلها..وبثبت ليكم (النظرية)..بس انتوا خلوا (الضيّق).
< تضايقوا متل الزول القافل ..والصندوق باقى فيه (5) ورقات بس.
< بمناسبة (الضيّق) دا ..قالوا ليك (مغترب) جاء راجع من السعودية بعد (11) سنة.
< عاوز يعرس ويرجع.
< عاوز يعمل ليه مشروع عرس.
< المغترب جاء شايل قروش الدنيا كلها ..عاوز يبني ليه بيت ..ويعرس ويرجع.
< هدفو في الحياة يعمل ليه بيت.
< صاحبكم مشى قابل ليه (مقاول) ..وقال ليه عندى قطعة ارض في (الواحة) 800 متر ..عاوزك تبنيها لي (4) طوابق في خلال (21) يوم ...عشان عاوز اعرس...اها بعد تلاتة اسابيع ما بتركب لي (المراوح)...ما بتسلمني البيت بي (مراوحو).
< المقاول عاين للمغترب كدا ..من فوق لي تحت..وحاول يقدر (القروش) المتلتلة الشايلها..وقال ليه والله بعد تلاتة اسابيع (المراوح) البتتكلم عنها دي...تفكير ما بنكون فكرنا فيها ..إلا لو عاوزنا نبدأ ليك البيت دا من (المراوح) ونمشي لي تحت.
< نبدأ ليك من السقف ..وانتي ماشي لي اسفل.
< يعني اول شيء نركب (المراوح)..وبعد كدا نحفر الاساس...وبعد داك يحلها الف حلال.
< المغترب ما عرف يقول ليه شنو؟...(المقاول) منطّقو ليك...كمان في زول بقدر يمنطق ليه مقاول.
< نرجع للفتة ...ونثبت ليكم نظرية (فتوها يا جماعة) التى استعملها المريخ في تسجيلات هذا الموسم.
< اول حاجة يا جماعة رئيس لجنة تسجيلات المريخ منو؟.
< تصوروا تسجيلات المريخ الي الان ما عندها (رئيس) ..رغم الاخبار التى طلعت وقالت ان مجلس المريخ سوف يجتمع وسينصب جمال الوالي ليكون رئيسا لغرفة تسجيلات المريخ.
< تصوروا الموضوع دا ما حصل.
< طلع كلام جرايد ساكت ..ما في قرار طلع بالشكل دا.
< غرفة تسجيلات المريخ ما عندها رئيس ..(وطبعا دا دليل فلس عديل كدا).عبدالصمد دا لو فكيتو كدي ...يامزمل ابوالقاسم يقوم يسجل ليكم طلبة مدرستو كلهم في المريخ
< ما عندو افق اكتر من كدا.
< شفتوا جمال الوالي من يقول ما عاوز رئاسة غرفة التسجيلات ..اعرفوا طوالي انو الجماعة ما عندهم قروش.
< قاعدين على الحديدة.
< قالوا ليك (مالك) تموا ليه قروش تسجيلو بـ (13) انبوبة غاز وطبق بيض.
< بتذكروا اللوردات ..بتاعين الغاز ومزرعة الدواجن!!.
< وباسيرو قالوا ليه ..ما عندك مشكلة ..باقي قروشك ح نديك ليها في شكل (حصص) في مدارس عبدالصمد نائب رئيس نادي المريخ.
< اها يا جماعة نوع دا بتقولوا عنه شنو؟.
< دي (فتوها) ذاتها الكلمتكم عنها فوق.
< الطريف في الامر ..ناس المريخ كانوا عشمانين في (مدثر كاريكا).
< قالوا عاوزين مدثر كاريكا.
< المريخاب وقت عرفوا الهلال قدم مليار ونصف المليار للاعبه مطلق السراح...ناس المريخ قالوا ما دايرين.
< قالوا احسن ينتظروا (محمد عبدالرحمن).
< مدثر كاريكا دا ..إلا تنتظروه يكمل (17) سنة في الهلال ...يعني بعد (10) سنوات يمكن يلعب ليكم.
< المليار ونص دا..انتوا لو لقيتوها تجيبوا بيها (17) محترف نيجيري.
< شن قدركم كمان بي مدثر كاريكا؟.
< في اعادة قيد عصام الحضري ...انتوا الحضري دا ما كان عاجبكم ..مالكم صهينتوا منو.
< حقوقو ما عاوزين تدوها ليه.
< عجبنا ليكم ..ان شاءالله عصام الحضري يبقى ليكم (يوسف محمد) جديد...كل سبت يقول عاوز قروشو.
< والله يوسف محمد دا تقول عمل ليه مشروع استثماري في الهلال ..كل شهر عاوز (ارباحو).
< الزول دا من زمن صلاح ادريس مدور في الهلال.
< صلاح ادريس دفع لمن فتر في (حقوق) يوسف محمد وفات.
< جاء بعد صلاح ادريس لجنة تسيير المهندس يوسف محمد يوسف..اللجنة دي برضو دفعت ليوسف محمد وفاتت.
< بعد لجنة التسيير جاء عبر الانتخاب الامين البرير.
< الامين البرير ما قصر ..دفع جنس دفع ليوسف محمد ..برضو (قروش) يوسف محمد ما انتهت.
< هسع جاءت لجنة تسيير (الجنرالات) ديل ..اول حاجة قابلتهم (قروش) يوسف محمد.
< يعني نحن نخلى شغلنا ..ونقبل على يوسف محمد.
< انتوا يا البرير الزول دا عندو (دكاكين) في استاد الهلال.
< صلاح ادريس ما يكون مقلبكم ..وقام سجل ليه (دكاكين) في الاستاد عشان كدا كل شهر بقول عاوز نصيبوا من (ايجار) الدكاكين.
< يوسف محمد ما ترتاحو منو ..وتعيونه (مدير كورة) في الهلال.
< وإلا اقول ليكم حاجة...(فتوها) يا شباب.
< تقشف المريخ وفلسه ..كما كتب الكثير من الزملاء ..تمثل في تسجيلات هذا العام في ان المريخ فشل في اعادة قيد افضل المحترفين ..اللاعب كلتشي.
..المريخاب فشلوا في اعادة قيده ..عشان مرتبه كبير.
< يعني خلاصة الكلام كدا ...مجلس المريخ ما قدر يوفر ليه (المرتب).
< اها في (تقشف) اكتر من كدا.
< عليكم الله دي ما (فتوها يا جماعة).
< والله دي (فتوها) عديل كدا.
< ناس المريخ عشان يرتاحو من كلتشي ..وعشان ناس الهلال ما يفكروا فيها قالوا كلتشي سوف يلعب في نادي تيري التايلندي.
< شوفوا الكضب ..هي (تايلندا) بالله فيها كورة.
< كلتشي دا لو مشى (تايلندا) إلا يسوق ليه بص ولاية ...(دا طبعا لو عندهم بصات ولاية).
< الغريبة المريخاب ديل ..اللاعب العاوزين يرفعوه يقولوا ليك طلبو (موناكو) الفرنسي زي موسي الزومة او ماشي يلعب في باريس سان جيرمان زي بلة جابر.
واللاعب وقت يكونوا عاوزين يتخارجوا منو يقولوا ليك ماشي يلعب في نادي تيري التايلندي.
مرقوه برة البلد.
اقول ليكم حاجة ...(فتوها).
< فتوها احسن ليكم ..(واضح كدا ان رغيفكم دا كتير ..ما عندكم ليه ملاح).
< المشكلة في تسجيلات المريخ ليس في انهم فقدوا الحضري وكلتشي ...وانما في فقدان المريخ لحارس الشباب عبدالرحمن الذي وقع في كشوفات الاهلي شندي.
< ودبّل الضربة صلاح ادريس بي حسن سليمان (سفاري) الذي وقع امس ايضا في كشوفات الاهلي ..(وناس المريخ الجعريبة انفتحت فيهم).
< مالك وباسيرو بيلعبوا منذ سنوات في الدوري الممتاز وهما ما صغار ..كما انهما في النهاية (اجانب)..لكن حسن سفاري وعبدالرحمن وطنيين ..وهما صغار في السن ويا دوب صعدوا ليلعبوا في الدوري الممتاز.
< واضح ان تسجيلات المريخ في هذا الموسم تفتقد للكاش ..وإلا ما وجه فريق اهلي شندي ضربة قاضية للمريخ.
< بعدين انتوا تعالوا هنا...انتوا موش قلتوا صلاح ادريس دا في (شوري المريخ).
< اها في زول في الشوري بعمل كدا.
اول مرة اشوف لي زول في شوري فريقه بوجه ضربات قاضية بهذا الشكل لفريقه.
< صلاح ادريس مفروض يوجه ضربة اقوى للمريخ ..وذلك بتسجيل الدعيع وفارس عبدالله ونادر الطيب في الهلال.
< يلا يا صلاح ...ناس المريخ ديل رفعوا صوتهم عليك ..وضموك كمان لمجلس الشوري...وشالوا منك باسيرو ومالك من غير استئذان.
< وجه ضربة تاني للمريخ ..خاصة بعد (الهجوم) الذي يتوقع ان يوجه لك في صحف المريخ اليوم.
< ما في حاجة بتغيظ المريخاب قدر انتقال نادر الطيب وفارس عبدالله والدعيع للهلال.
< شفتوا نحن بنلعبها كيف؟.
وإلا اقول ليكم ...فتوها.
فتوها احسن يا مريخاب ..(انتوا ما عندكم ملاح)..اقصد ما عندكم (قروش).
< ملحوظة : اخبار بايرن ميونخ شنو؟.
هوامش
< الحمدلله الهلال اعاد امس في هدوء تام ومن غير شد وجذب كاريكا ومساوي.
< وهى خطوة موفقة لمجلس الهلال...(عداكم العيب).
< في تسجيلات هذا الموسم.
< نحن في انتظار الكثير.
< اعملوا حسابكم من (السيستم).
< السيستم دا ممكن مع ناس اسامة عطا المنان يقفل ليكم من رابع يوم في التسجيلات...خاصة اذا المريخ اكمل تسجيلاته.
< مجلس المريخ الذي طعن في تسجيل حسن سليمان في الاهلي شندي ..لماذا سارع وصعد ابراهومة لكشف المريخ؟.
< انتوا لو لاعبكم في الصميم ...ليه تم تصعيد ابراهومة في اول يوم في التسجيلات.
< هذا يعني ان موقف اللاعب ما قانوني.
< مجلس الهلال مفروض يطلب رسميا من مجلس الاهلي شندي فارس عبدالله ونادر الطيب ..وصلاح ادريس اعطاكم الضوء الاخضر.
< قيادة اللواء عبدالله البشير لتسجيلات الهلال ووصوله مع كاريكا ومساوي للاكاديمية ساعة التسجيل ..يعني ان (البشير) عنده الكثير في التسجيلات هذا العام.
< غايتو ناس الهلال ديل ..وقت يقبلوا على الحقارة.
< المرة دي جابوا ليكم (اخو الرئيس) عديل كدا.
< والله يا ناس الهلال مع (اخو الرئيس) دا ..لو ما سجلتوا ليكم (قنبلة) يبقى ما في فائدة.
< المريخاب ما عارفين يعملوا شنو؟.
< انتوا تعالوا هنا ..صلاح ادريس دا عاوز يعمل شنو؟.
< الزول دا اعار اسماعيل بابا للمهدية.
< دا اعار (هداف الدوري)..طيب عاوز يسجل منو؟.
< قلت ليكم (فتوها يا جماعة)...احسن ليكم.
< عاجل : اللواء عبدالله البشير نائب الرئيس (الحاج عطا المنان)...واخو الرئيس ..يعني الزول دا رئيس (دبل قبينة).
[/SIZE]وإن طال السفر - محمد عبد الماجد
صحيفة قوون
