مالك وباسيرو (سجلتوهم) بـ (بليلة مباشر) ولاَّ ضبحتوا ليهم
< ناس المريخ ديل حيرونا ...الحاجات الكنا بنعملها قبل (17) سنة ..يا دوب جوا يعملوها الان.
< يا دوب وقعت ليهم.
< موش مرات في زول بضحك في (نكتة) حكيتها ليه في الثانوي العالي لمن يتخرج من الجامعة.
< اها ناس المريخ ديل النكتة بضحكوا فيها لمن ينزلوا معاش.
< يعني الكلام الذي كنا نقوله عن هيثم مصطفى عندما كان في بداياته..وتوهجه وتألقه ..يقوله المريخاب الان وهيثم مصطفى في خواتيم مسيرته الرياضية.
< انتوا يا دوب فهمتوا القصة.
< هسع الكلام الكنا بنقوله عن نادي الحكومة والدعم التحت تحت ..ناس المريخ طلعوا يقولوا هسع دي.. بعد (24) سنة.
< يا دوب شعروا انو في مستشفيات يفترض أن تبنى ..ومدارس يجب أن تفتح ..ومسارح يغنوا فيها.
< الحاجات دي كانت وين زمان.
< الجنوب شال ارضو.
< وحركات دارفور بالسلاح والمفاوضات دخلت القصر وشالت نصيبها من السلطة والثروة.
< نحن (الشعب السوداني) نحن الهلالاب ..عاوزين حقنا كمان.
< لقيتوا (التكية) دي ..ودفعتوا في وارغو (5) مليون دولار ..مقابل لها لمقدم وارغو كورة بـ (12) جنيه.
< كورة وارغو دي (كوم بصل) كتير عليها.
< انت من عرق الشعب السوداني دفعتوا فيها (5) مليون دولار.
< القروش دي لو حقتكم ..ما بتكبوها كدا في البحر.
< يا ريت وارغو لو كان لعب..يا ريت لو كان بستاهل ...والله ما كنا سألناكم.
< ما كنا بنقول ليكم أي شيء.
< الحضري العجوز صاحب الـ (44) سنة دفعوا فيه ايضاً قرابة الـ (3) مليون دولار.
< وزولكم العجوز دا ياريت لو قعد في البلد ..بيلعب من القاهرة ..من الطابق الـ(10) في المهندسين.
< المريخاب ..الذين جابوا لينا حارس فلسطيني ولعب في الدوري السوداني بقاعدة من قواعد (جامعة الدول العربية)..زعلانين عشان الهلال اعاد توقيع مدثر كاريكا.
< بالله شوف الفهم.
< شوف (التعقر التفهمي اللا ارادي) دا وصل لي وين في الجماعة ديل..(ولدنا) واعدنا تسجيلو ..المشكلة شنو؟.
< يا جماعة الله كاريكا دا ما جبناه بـ (قاعدة من قواعد الجامعة العربية).
< ولا اتسجل في الهلال بـ (الحريات الخمس).
< ولا جنسناه في سلم الطيارة.
< ولا دفعنا فيه عملة صعبة.
< الزول دا (ولدنا).
< يفهموكم ليها كيف دي؟..اكيد عندكم (تشبع لا فهمي في الحتة دي).
< قلت ليكم عندكم (قوقاعية) في الحتة دي.
< نديكم ليه يعني زي هيثم مصطفى ..عشان ترضوا وتنبسطوا...وتعملوا ليكم فرقة شعبية في الجرايد.
< ويا ريت ..يا ريت لو هيثم مصطفى مبسوط معاكم...(والله ما كنا بنقول حاجة).
< ولا بنزعل.
< كان على الاقل قبلنا بالواقع ..لكن هيثم فقعتوا مرارتو ..كابتنو بقى في المريخ اكرم الهادي سليم.
< دي بتبقى يا جماعة.
< سعيد السعودي بقعد (9) شهور في الكنبة وبظهر في اخر خمس دقائق في الموسم عشان يرفع كأس معتصم جعفر.
< المريخاب ..الذين سلجوا عصام الحضري العجوز (44) سنة ..ودفعوا ليه كل (غراماته) بما في ذلك نفقة الحاجة بخيتة في كفر البطيخ ...زعلانين عشان الهلال اعاد كاريكا.
< دي بتصدق.
< الحضري دفعوا فيه اكثر من (3) مليون دولار ..ولعب في المريخ بقاعدة (الحريات الخمسة)...زعلانين ..عشان كاريكا السوداني ..كاريكا ولدنا ..(ود البلد دي) اخذ نصيبو ..وقبض قروشو عشان اعاد توقيعو في الهلال.
< لا عليكم الله.
< خلاص معليش ..تاني ما بنعمل كدا.
< نحن اسفين.
< قروش البلد كلها ..قروش النفط والتجنيب ..والسمك ...والبنوك تكبوها في حارس مصري عجوز مقيم في القاهرة ..وترفضوها على اولاد البلد.
< دا فهم شنو يا جماعة؟.
< كاريكا دا لعب في التاج ..واتربى في ام درمان ..وطلع من ملامح البلد دي ....حرام لو اديناه حقو.
< الثروة دي اصلو ما عندو فيها نصيب.
< ما عندو حق.
< وارغو الذي لم يتجاوز مشاركته مع المريخ على مدى خمس سنوات اكثر من (250) دقيقة ..اخذ (5) مليون دولار من خزينة الدولة..حرام كاريكا ينال نصيبو.
< يا جماعة قولوا ليكم حاجة تتبلع.
< قولوا ليكم حاجة تصدق..ما تضحكوا عليكم الناس.
< يعني نحن كاريكا دا يا نقول ليه ما عندنا قروش ..يا نسجلوا بالشيكات عشان انتوا ترضوا ..يا انتوا ما عاوزين.
< دا كلام يا جماعة.
< طيب باسيرو ومالك ديل انتوا (سجلتوهم) بي شنو؟..وبي كم؟.
< ما تقولوا لي عبدالصمد دفع حافز التسجيل.
< عبدالصمد دا قالوا لمن تجيب ليه سيرة (الدفع) بتجيه حمى.
< طوالي بقول ليك موبايلو بطاريتو نازلة.
< أما الامين العام للمريخ الفريق طارق ..فهو جايبنو عشان الكلام.
< زول بتاع (معاشات) يعني ح يجيب ليكم قروش من وين؟.
< عاوزين كلام ..بتكلم ليكم ما مشكلة.
< عاوزنو يشتم الهلال ..بشتم الهلال ما عندو مشلكة.
< لكن بس ما تقولوا ليه ادفع.
< دي الحاجة الوحيدة الما بقدر عليه.
< لو عاوزين تكتلوه ..قولوا ليه (ادفع).
< ممكن يموت فيها عديل كدا.
< اها يا مريخاب قروش مالك وباسيرو ديل ..جبتوها من وين؟.
< طبعاً ما ح يكونوا اتسجلوا ليكم بي (بليلة مباشر).
< اكيد ما عملتوا ليهم حفلة شاي ..عشان يوقعوا ليكم.
< واكيد ما اتسجلوا (صدقة).
< ولا اتسجلوا (تطوع).
< ولا خدمة الزامية.
< ولا عملتوا ليكم (صندوق)..الصرفة الاولى سجلتوا بيها باسيرو ومالك.
< ديل اجانب ..(الدولار) ما بجاملوا فيه ..لو ما كبوه ليهم ..ما بتفاهموا.
< ولا بتلفتوا في الحتة الزي دي.
< حلال عليكم تسجلوا زي ما عاوزين وتدفعوا قروش البلد في صفقات اجنبية ما نافعة.
< وحرام علينا نحن لمن نعيد قيد لاعب سوداني اصلاً كان بيلعب في الهلال.
< حكايتكم دي يا مريخاب ..بتذكرني ليكم حكاية (المرا) والجلابية السمنية.
< قالوا ليك في راجل صعب ..جاء البيت ..فقد جلابيتو السمنية ما لقاها.
< اول يوم ما قال حاجة ..قال في نفسو بتكون (مرمية) في حتة كدا.
< تاني يوم الراجل حاول يتظارف ..قال لي زوجتو انتي تعالي هنا جلابيتي السمنية وين؟.
< المرا ..غيرت الموضوع.
< بكرة الراجل جاء من الشغل ...قام تاني سأل زوجتو ..قال ليها ...انتي الجلابية السمنية أنا ما شايفها.
< المرا تاني غيرت الموضوع.
< اليوم الرابع ..الراجل عرف ليك الموضوع دا وراه كلام..قام شدد في سؤاله وقالها بلهجة حادة: (انتي الجلابية السمنية وين؟).
< المرا حاولت تغير الموضوع ...لكن الراجل المرة دي ثبتها ليك ..وقال ليها : (قلت ليك الجلابية السمنية وين؟).
< المرا قالت ليه لو قلت ليك بخاف تزعل.
< الراجل قال ليها بحدة اكثر : (الجلابية السمنية وين؟).
< المرا قالت ليه دقيقة ..ومشت على المطبخ.
< الراجل افتكرها عاوزة تجيب الجلابية من جوة.
< المرا جات شايلة ليها كبايتين وجك.
< الراجل قال ليها ديل شنو؟.
< قالت ليه : دي الجلابية ..بدلتها بي الكبايتين والجك دا.
< الراجل عرف ليك الموضوع منتهى وما بتلحق تاني..قال لي زوجتو اسمعي يا ولية أنا الموضوع دا ما ح اقول ليك فيه حاجة ...لكن اوعى يوم اجي اسألك من الجلابية (السكروتة) تجيبي لي صحن وطقم حلل.
< كلمتك أنا.
< المرا قالت ليه ..صحن شنو وطقم حلل شنو؟..انت ما عارف جلابيتك السكروتة يمين بتجيب ليها كدا بالميت نص دستة صحون وطقم حلل ..و(4) كوريات كبيرة.
< الراجل قال ليها اوعى تقولي لي (الكوريات) الفى التلاجة ديل ...(جلابيتي السكروتة).
< المرا قالت ليه : والله يا حاج بتاع العدة ما وافق على العملية دي إلا بعد ما اديتو (قميصك) البيجي مع الجلابية.
< الراجل طوالي (كتم).
< جاتوا سكتة قلبية.
< هسع ناس المريخ شغالين بي نفس النظرية ...يبدلوا في العدة بالملابس القديمة.
< ملحوظة : عاوزين تغالطوا طبعاً.
هوامش
< ناس لجنة التسجيلات ديل كلموهم يظبطوا الساعات.
< التسجيلات باقى ليها (17) يوماً.
< ما تعملوا لينا فيها ما عارفين حاجة.
< ناس الاتحاد الشتر ديل ..هسع يقولوا ليكم (السيستم) قفل.
< ونحن إلى الان ما عملنا (ابداء رغبة).
< الاهلي شندي سجل.
< المهدية سجلت هداف الممتاز...وانتوا قاعدين إلى الان تتفاوضوا لي مع (خليفة).
< خليفة دا ما صعب للدرجة دي.
< ما تصعبوا الحكاية ساكت.
< المريخ ضيّع كل لاعبي الفريق الرديف ...وسجل (العجائز).
< المريخ ضيّع وليد علاءالدين وضيّع حسن سفاري وعبدالرحمن النسور.
< وضيّع (ابراهومة) ذاتو.
< المضك بعد العملية دي ..اشتكوا في الاتحاد العام.
< طبعاً الاتحاد حق ابوهم ..بعمل ليهم أي حاجة.
< لكن صلاح ادريس ..بقدر عليكم.
< السم القدر عشاكم.
< الموردة يجب أن تدخل التسجيلات بدراسة ..وبقوة ..عشان تعود سريع.
< وكذلك ننتظر اضافات حقيقية لفريق حي العرب وفريق هلال الساحل وهلال الابيض من اجل التأهيلي القادم.
< التأهيلي العام القادم ح يكون مولع نار.
< الكاردينال وطه علي البشير وصلاح ادريس ..الهلال ينتظر منهم دعم ومساهمة فعالة في التسجيلات.
< أي واحد يجيب ليه لاعب قاطع كدا.
< يا ناس الهلال عووووك ...السيستم باقى ليه (17) يوماً ويقفل.
< الزول يقول ليكم الكلام دا مية مرة.
< بقى ما في فرق كتير بين الاهلي شندي والمريخ.
< اللخبطة بقت تحصل.
< عبدالله سيسه مهاجم ما فيه كلام اذا وفق الهلال في التعاقد معه.
< الهلال يحتاج إلى اطراف وقلب دفاع من بره السودان.
< لا بد من أن يتعاقد الهلال مع مدافع محترف على مستوى وبيلعب في منتخب كبير ..ومضمون ..والناس كلها شافوه.
< شغل (البطيخ) دا ما بنفع.
< يجب التعاقد مع نجوم معروفة على المستوى الافريقي.
< في الانتظار.
< .....
< عاجل : عبد الصمد نائب رئيس مجلس المريخ ادوه (اعارة) النيل الحصاحيصا ...الزول دا بدري عليه.
[/SIZE]وإن طال السفر - محمد عبد الماجد
صحيفة قوون
