جكسا ونيمار ..حفلتنا تاني بتبدأ من اربعة وربع

< اصاب الهلال في تسجيلات الامس بحجر واحد عشر عصافير...(غير عصافير العرضة الجنوب). < طبعا ناس العرضة جنوب ديل ..(المغصة) بتكون شقتهم ...قالوا ليك امس بابكر سلك شرب (13) كباية حلبة...غير كبابي النعناع والشمار الاخضر. < وسلك دون كل الناس لمن يتقل في (الحبلة) بطول زيادة. < سجل الهلال وليد علاءالدين ومحمد عبدالرحمن ..فاصاب النجاح من عدة نواحي. < نيمار وجكسا. < زي المدرسة الفيها (7) انهار. < اول هذه النجاحات ان وليد نيمار ومحمد جكسا ..لاعبان وطنيان...(لا فيهم شق ولا طق). < لا تجنيس ولا اجانب ولا مجنس ...واللاعب السوداني يبقى له نكهة خاصة ..وموهبته وولاءه تختلف عن موهبة وولاء اللاعب الاجنبي. < برضو السوداني يبقى سوداني ..(وخليك سوداني). < هسع عليكم الله يا مريخاب ..فريقكم البقى شبكة (سوداني) ما شغال فيه ..عاجبكم. < السودانيون فيه بقوا بالعدد. < قالوا ليك اكرم الهادي سليم وبلة وموسى الزومة شغالين بـ (ام تي ان). < اللاعب وليد علاءالدين (نيمار) لاعب صغير في السن ..وموهوب وعاشق لدرجة الوله لكورة القدم (زي ما الكتاب بقول)...ضمه الهلال في خطوة مبروكة لكشوفاته امس...افتحوا قوس وانتظرونا برة. < واضاف الهلال في خطوة مباركة اخرى معه لاعب الشباب وجكسا الكورة السودانية القادم محمد عبدالرحمن. < يعني في ليلة واحدة الهلال ضم جكسا ونيمار. < سوداني على اجنبي كدا. < ما بين الموهبة السودانية الاصيلة ...والاحترافية الاجنبية الذكية...وقد تمثل ذلك في جكسا ونيمار. < وليد علاءالدين سوداني لكن (اجنبي) بالاسم. < ومحمد عبدالرحمن (جكسا) سوداني جنسا ولقبا. < شفتوا النظام دا كيف؟. < باقى انا زمان قلت ليكم نحن اي حاجة عندنا بي نظام ..وانتوا ما بتسمعوا الكلام ..رأسكم قوي زي (الفتريتة). < اول الفتريتة رأسها قوي. < والله معلومة زي دي اول مرة نسمع بيها. < يعني تاني الهلال يكون لاعب مباراة ضد المريخ وتشكيلته فيها (جكسا ونيمار)...بلة جابر دا إلا يجيه (شلل) ارتعاشي. < ديل بتقابلوا كيف؟. < بلة جابر الموضوع دا ح يلخبطو ...(جكسا ونيمار)..بلة جابر ح يكون متل الزول الادبي الجابوا ليه امتحان كيمياء. < ما ح يفهم فيه اي شيء. < او زي (الروسي) السمع محمد الامين بغني في (الجريدة)..قال ما فهمت حاجة لكن الزول دا غناي عديل كدا. < انتوا (الروس) الايامات دي وين؟..زي اختفوا من البلد وكدا. < خليهم الروس هسع دس. < جكسا ونيمار مرة واحدة ...دي (باسكال) ما بتقع ليه...ما بفهمها. < باسكال دا ..(الصبغة) البصبغ بيها شعرو دا ..لاّ يشربها تاني. < صبغة شراب بس يا باسكال. < يا عم باسكال ...(الشفع) ديل ما بتقدر عليهم ..ديل شفوت جدد ..الكورة منقطنها نقيط. < بكتبوا سطر ..ويفطوا سطر. < ديل صعبين. < وليد نيمار دا ..قالوا بطلع في الكورة وبقعد يغني في (الابيض ضميرك). < ولا عليه. < محمد عبدالرحمن كلكم شفتوه ..اي مباراة كملها شال نجوميتها. < غايتو مسكينة (الكشافات) تاني ما بتستحمل البتعملوا فيها دا يا بلة جابر. < الواحد فيكم تقول في (الكشافة) السودانية ...كورتكم كلها (كشافات). < هسع في زول واعي كدا ..تشكيلة يكون فيها (جكسا ونيمار) ..يقيف قدامها. < يا بلة جابر ويا موسى الزومة ويا ضفر ..(ان قعدتوا وما شطبوكم)..ناس نيمار وجكسا ديل نظامهم براه. < لازم يا بلة جابر في الموسم الجديد ...تحفظوا الاناشيد ..وجداول الضرب كلها. < جكسا ونيمار ديل بسمعوا من طرف. < ببدأوا ليكم من جدول واحد ...(ولي قطة صغيرة سميتها سميرة). < المقررات كلها براجعوها ليكم. < ما بخلوا حاجة. < عشان ما تقعدوا تتلفتوا لينا ساكت زي التلاجة الما فيها حاجة غير الموية الباردة. < اول التلاجة الما فيها حاجة غير الموية الباردة بتتلفت. < قادر الله ...(علم والله). < ناس مالك وباسيرو لو عارفين الكلام دا ما كانوا اتورطوا...كان اخير ليكم اهلي شندي...ما عندكم اي مشكلة تنوموا من سبعة. < ما في زول كان بسألكم. < لو عارفين التلتلة المنتظراهم ما كانوا اتمقلبوا المقلب دا. < موش مرات بتمشي السوق ..عشان تشتري ليك (حاجة) كدا ..يقوم يلاقيك وانت طالع من السوق واحد يندمك على الحاجة الاتشريتها. < بغض النظر عن الحاجة دي شنو؟...الزول بندمك في عيشتك. < يبقى ليك زي اسامة الثغر مع عوض دوكة. < بشهيك العافية. < الزول البلاقيك وانت طالع من السوق يطلع ليك الحاجة الاشتريتها اي كلام. < ويقول ليك في النهاية عشان يطمم ليك بطنك ..والله قبل شوية الحاجة الاتشريتها من السوق دا ..فكيتها بي نص التمن الاشتريت بيه انت. < انت (المغصة) تشقك. < ويقول ليك كمان ...والله حاجتي انا كمان افضل ..واصلية ..عليك الله منو الغشاك دا. < انت تموت من المغصة. < تبقى زي الزول الجرسة يوم 29 رمضان. < يضاير من ضلو. < ما تعرف تعمل شنو؟. < اها يا ناس المريخ ..بالواضح كدا ...نحن مع نيمار وجكسا ح نعمل ليكم غسيل مصارين. < نمسكم مصران ..مصران. < اي زول عندو عذر ..ولاّ مشكلة في المصران ..يمشي من هسع دي الاهلي شندي. < نحن تاني ما بنتفاهم. < تاني ما بنجامل في الحتة دي. < والله جابوا لينا مجلس ...بصرف الرواتب من يوم (21). < حوافز المباريات بسلمها قبل المباراة. < من بدري ..بدري. < غايتو المريخ الانا شايفوا دا ..البقى كلو اجانب دا ...ان قلت (نعم) يقولوا ليك قلت شنو؟...ما في زول يفهمك..فريقكم دا (5) دقائق مع ناس نيمار وجكسا ما بصمد. < تاني الهلال من الدقيقة الرابعة بكون غالب 5/ صفر. < ولا بنكضب ..ولا بنجامل في الحتة دي. < ناس مالك وباسيرو وباسكال كلموهم يشيلوا شيلتهم .. ..شجركم الكبار دا ..ح نعمل ليه (حول). < يا مالك انت بالذات بي (قصتك) العاملة زي كوم الكمونية دي ح تتعب معانا. < اعملوا ليكم كوافير بعد كدا يا مريخاب. < جماعتكم ديل مركزين في (قصة الشعر) اكتر من كورتهم. < واحد بصبغ ..وواحد عندو قصة. < باسكال دا تاني ان شاءالله يلف براهو متل (الزنبلك) الوقع من الساعة. < وعلاءالدين يوسف مع الشفع ديل ...تاني ح يخد ليه في المباراة (4) كروت حمر. < دا لو جاملوه. < ناسكم كبار السن ديل ما ح ينستروا مع الشفع ديل. < ديل ولاد صغار ..المستقبل قدامهم ...والدنيا فاردة ليها اجنحتها. < شفتوا الكلام دا كيف؟. < زي الزول المشي ليه مستشفى وقال للدكتور ..والله يا دكتور عندي انتفاخ في المعدة ..وشاعر كدا زي كأني اكلت لي (رجلة) ..وعملت لي نفاخ ..رغم من اني (7) سنوات ما قبلت لي على رجلة...يا دكتور عندي احساس (بالتقرزم الانطوائي)...وبشعر مرات كمان بالوحدة ...وبالردمية برضو. < الدكتور عاين ليه كدا ...وقال ليه مشكلتك دي ما من (المعدة). < ولا من (الرجلة). < الحاجات دي ما عندها اي دخل ..ما عندها اي ذنب. < زولكم قال للدكتور ..طيب يا دكتور الحاجات دي من شنو؟. < الدكتور قال ليه : (من طرفك الشمال دا)...كورتو كلها في الكشافات ..تقول كابتن طيران ..ما كابتن كورة. < لكن (موسى الزومة) بعمل نفاخ. < نرجع للموضوع العلمي ..بتاعنا...(عشان ما تعقدوا تتغالطوا فينا بعدين). < جني وجن الغلاط ساعة الغدا. < في ناس من يجيبوا ليهم (صينية الغدا) يفكوا اي حاجة ويقعدوا يتغالطوا. < زي (الكرسي) القصادو عشرة اشخاص. < بعدين صينية الغداء من يكون فيها سلطة اسود ..الغلاط بكتر فيها. < ما عارف السر في كدا شنو؟. < نيمار وجكسا اضافهما الهلال لكشوفاته وهما دون العشرين عاما ..وهذا مستقبل اخضر للهلال ان شاءالله....ورؤية جيدة من مجلس الهلال ومن لجنة التسجيلات والجهاز الفني. < جكسا ونيمار ..كلاهما موهوب وكلاهما صغير في السن ووطنيين كمان ..والاثنين عندهم وله شديد بالكورة ..وعشق خرافي للمجنونة. < اضحي من اهم دوافع النجاح في كورة القدم ان تكون (عاشقا) لها في المقام الاول ..من بعد تأتي الاحترافية. < لعل الكثير من المواهب في عالم الكورة ضاعت واندثرت لأنها لم تكن محبة بدرجة الوله للكورة. < التعلق الشديد بالكورة والارتباط بها حد ان تكون متيما بها ..دلالة على عظمة الموهبة ...وعلى المهارة والتقدير للكورة...ومن بعد سوف ينعكس على العطاء. < لاحظت في السنوات الاخيرة ان لاعب الشباب محمد عبدالرحمن ..يحب كورة القدم بصورة واضحة ..والكورة معه طول اليوم لا يفارقها ولا تفارقه. < وقد جاء محمد عبدالرحمن في سن صغيرة جدا للهلال ولعب وسط لاعبين كبار ...تعلم منهم الكثير..وكان ذلك عاملا من عوامل الاحترافية والوعي الكروي الذي تميز به محمد عبدالرحمن (جكسا) وهو في هذا السن الصغيرة. < تشبع محمد عبدالرحمن بحب الهلال ...واخذ لقب اعظم لاعب في تاريخ الهلال. < هو (جكسا)..اللقب وحده يجعل المسؤولية كبيرة وعظيمة على محمد عبدالرحمن. < اذكر مرة ان لاعب الهلال المحترف تراوري قد اشاد اشادة خاصة بمحمد عبدالرحمن وقال بالحرف اللاعب دا خطير. < وليد علاءالدين يشبه محمد عبدالرحمن في كثير من الاشياء ..غير انه نشأ في المريخ ..وكان متعلقا به..وزامل ولعب مع لاعبين كبار امثال العجب وقلق وهو صغيرا...ولا بد من انه استفاد من هذا الامر. < وليد علاءالدين من حبه للكورة والتزامه كنت اشاهده صغيرا في استاد المريخ وهو يتابع مباريات المريخ. < غير ان المريخ اهمل هذه الموهبة التى فلتت من (القلعة الحمراء) والتقطها الهلال من جبال كادوقلي ليعيد انتاجها وتقديمها بصورة افضل للكورة السودانية. < الاقدار كأنها رتبت لهذا التلاقي بين جكسا ونيمار ..ليكونا في الهلال معا. < واظن اننا امام ثنائية قادمة في الهلال ..تعيد لنا عهد الثنائيات في الهلال ..وترجعنا لزمن حمد والديبة حاجة عجيبة. < نعم الاقدار ترتب لاحداث سعيدة ان شاءالله في الهلال. < ملحوظة : وانتظرونا ..حفلتنا تاني بتبدأ من اربعة وربع. هوامش < مضت من التسجيلات (6) ايام ...والهلال فعليا سجل لاعب واحد هو وليد علاءالدين نيمار. < وفقدنا اكثر من لاعب ..تراوري ..وسنكارا والمامي وبمبا. < كمية من المحترفين لم يستفد منهم الهلال في الموسم الماضي. < الجماعة ديل كانوا قاعدين ساكت ..ما شفنا ليهم اي شيء. < هسع ديل تاني كل (6) شهور ..يظهروا يقولوا عاوزين حقهم. < لذلك يجب ان يتعاقد الهلال مع محترفين (سوبر) ..ومعروفون على نطاق القارة ..بدل جيش المحترفين الجرار دا. < (4) محترفين كبار ..ممكن الهلال يجيب بطولة خارجية في الموسم الجديد. < ناس سنكارا والمامي وبمبا ديل اوعكم منهم. < سيدي بيه نتمنى ان يكون وصل فجر اليوم. < ونتمنى ان يكون هذا الفجر اتي باحد مفاجآت الهلال. < التسجيلات باقى ليها (13) يوم. < وانتوا عارفين (السيستم). < الهلال محليا لو ضم فارس عبدالله ومحمد عبدالله كول واسماعيل صديق ..يكون قفل المجموع (محليا). < ونبقى ناس محترفين ساكت. < نبقى على مطار الخرطوم. < فارس عبدالله وكول ...اضافة حقيقية للهلال ..اذا انجز مجلس الهلال هذا الملف ..يكون ما قصر. < فارس مهم جدا في الطرف الشمال. < لا بد في اي خانة يكون هناك اكثر من لاعب بحالة جيدة. < محمد عبدالله كول اخطر مهاجم في الدوري الممتاز ..وقد اشاد به اكثر من مدرب واعتبروه لاعب مظلوم وغير مكتشف. < يتميز كول بالحركة والقوة والمهارة والتسديد. < اتمنى ألا يفرط الهلال في هذا اللاعب. < هو مكسب حقيقي ان سجله الهلال. < اما نجم التسجيلات الاول فهو من غير شك فارس عبدالله. < عبدالرحمن الدعيع قصتو شنو؟. < وقع ام لم يوقع. < شنو كل يوم خبر جديد عن الدعيع. < وما في زول فاهم حاجة. < الدعيع خلوه. < جمعة دا رجع لينا من وين؟. < يوسف محمد رجع ..وجمعة رجع ...وبمبا قاعد عاوز حقو. < ..... < عاجل : همد برضو رجع في المريخ.[/SIZE]وإن طال السفر - محمد عبد الماجد صحيفة قوون