مِنْ تبقِي أُم!

من تبقي أم… معناها تبقي حنان ودم
وكلما صغيرك يزيد سنين.. تزدادي إنتي كفاح وهم
تتحملي الأسى والجراح…وتتناسي إحساس الألم
ما إنتي أم
معناها تضحيه والتزام.. معناها فيك دايما عشم
تستقبلي اليوم بالدعا.. وتقولي حيّ على الفلاح
صليتي فجرك في خشوع.. وبديتي يومك في انشراح
ضايرتي.. لملمتي الهدوم.. ودعيتي بالهدي والصلاح
حصنتي ناس بيتك تمااااام.. وسألتي من الله النجاح
ما إنتي أم.. معناها من قومة الصباح
بتوزعي الحب في الدروب.. وتكبي منو علي الملاح
مشغولة دايما بالعيال.. مليانة بالرضا والسماح
كسروا الصحون؟.. مااا مشكلة
دفقوا العصير؟.. مااا مشكلة
كبوا التراب فوق العجين؟؟ ما اامشكلة
قطعوا الحبل فيهو الغسيل؟ مااااا مشكلة
بس مشكلة.. لو قحّ واحد مرتين
لو جاتو حمى علي الجبين
لو دمعه سالت في العينين
ما إنتي أم.. معناها تبقي الحبّة قبة
تفقدي المنطق تفكري بالمحبة
تبقي واحة.. مهما تكون الدنيا صعبة
ويفضل صغيرك في عيونك زول صغيييير
مهما كبر عن طوقو شبّ
قلقك عليهو محال يزول
حبك ربيع كل الفصول
لغة القلوب تلغي العقول
جواك إحساس خوف عجول
أحلام جميلة وامنيات..
تتمني من الله القبول
ما إنتي أم..
ومن تبقي أم.. معناها تبقي.. أهم زول
معناها إنتي أهم زول
تلويح:
مافي أحن من أمي.. وغيرها منو البشيل همي؟