المريخ سبعة اجانب والبخت خائب

عندما شرعت في الكتابة عن (اجانب) المريخ..تحسبت ان اقول عنهم (اجانب) وبعضهم نال (الجنسية) السودانية بالتجنس.

تحاشيا من الوقوع في عدم الدقة في الوصف …قلت: فلنقل عنهم (سودانب)…على نسق سوداتل وسودانير …الخ.. باعتبارهم خلطة بين السودانية والاجنبية.

لكن عدت وسلمت على انهم (اجانب) لأن اكتسابهم للجنسية السودانية تم بصورة غير مقنعة..فهم اجانب وان اتشلخوا (111).

يعني اللاعب الاجنبي ..يمنحوه (الجنسية السودانية) بكل تاريخها وإرثها وعظمتها ..عشان يعكس ليه (كورنر)…او يجدع ليه رمية تماس.

مجازاً يمكن ان نقول عنهم (سودانب)..وذلك بأخذ (سودا) من سودان …واخذ (نب) من (اجا)نب.

وكدا يمكن ان نرضي كل الاطراف.

ممكن بكل سهولة …(اللبن) تقلبو شاي بي لبن ..اذا (كشحت) ليك شاي حب في اللبن.

وكلمة (كشحت)..فعل (شايي) خالص..وعادة تستعمل الكلمة عندما يكون الناس مستعجلين ..وطالعين والشباك فاتح.

انا ما عارف (الشباك الفاتح) الدخلو في الموضوع دا شنو؟…لكن (الشباك) وفتحو جزء اصيل من الاستعجال ..والشاي باللبن.

انتوا موش بتسمعوا هذه العبارة كثيرا عندما تكونوا طالعين (اقفل الشباك معاك).

يمكن انتوا ما عندكم حاجات بالشكل دي ..لكن نحن عندنا …(التفاصيل) دي بي كترة.

اهم حاجة عندنا في الشاي ..الشباك يكون فاتح.

وممكن الشاي الاحمر …تكب فيه لبن ..يبقى شاي بي لبن ..(دا برضو امر عادي ومقدور عليه).

لكن ما بتقدر تفصل (اللبن) من الشاي.. اللبن يطلع في حتة والشاي الاحمر يطلع في حتة تانية.

مرة زمان في المدرسة …جابوا لينا (حاوي).

زمان المدارس كان في كل فترة بزورها (حاوي) ..الطلاب يتلموا في حوش المدرسة…والحاوي يعمل ليه (حركات) كدا نطلع بعدها الاسبوع كلو بنتكلم عن الحركات دي.

الحركات دي كانت بتدهشنا ليك ..جنس دهشة..سنونو يبقن في نص رأسنا من (الدهشة).

هسع ما في حاوي بمشي ليه مدرسة …ولو في حاوي مشى ليه مدرسة ما بدهش ليه اي طالب.

طلاب الزمن دا هم البدهشوا (الحواة).

نحن زمان كنا مساكين ..اي حاجة بتدهشنا…الحاوي لو رفع حواجبو ساكت ..نقول دي عملها كيف؟.

زمان الحاوي لو طلع ليه (حمامة) من خشمو ..الناس كلها تستغرب بما في ذلك (مدير المدرسة).

هسع يمين (الحاوي) لو طلع من خشمو (قمر صناعي) ما في زول بشتغل بيه.

لو طلع نوال الزغبي من جيبو ..ما في زول بستغرب.

شفع الزمن دا مفتحين…ما في حاجة بتفوت عليهم …ولا بندهشوا ليهم بي حاجة.

يمكن عشان شفع الزمن دا شافوا حاجات كتيرة ..في الفضائيات وفي النت والواتساب..ودمهم اصبح بارد.

ويمكن عشان (الحواة) بقوا في اي ملف ..زمان بجوا المدارس ..هسع اي زول بقى (حاوي).

ابوك حاوي …واخوك حاوي …وانت ذاتك حاوي.

زمان انا بتذكر وقت نسمع نشيد (جدودنا زمان وصونا على الوطن) نقيف الف احمر..ما بنتفاهم …الدم يربط في عروقنا.

شفع الزمن دا الواحد لو سمع (جدودنا زمان)..بقول ليك (طيب الترجمة وين؟).

بفتكروها حاجة تانية.

المهم زمان وقت كنا في المدرسة جابوا لينا (حاوي).

اتذكر لقطنا (رسوم الحاوي) من حق الفطور..اسبوع ما بنفطر عشان نشوف (الحاوي).

الحاوي قال لينا انا بفصل ليكم الشاي من اللبن ..وبطلع ليكم اللبن براهو والشاي براهو.

جبنا ليه الشاي باللبن.

قال جيبوا لي شاي سادة ..احمر ساكت.

جبنا ليه الشاي السادة.

قال جيبوا لي لبن …(حليب) صر.

جبنا ليه اللبن حليب صافي.

قال لينا انتوا وقت عندكم الشاي السادة براهو …واللبن الحليب الصافي براهو…مشكلتكم شنو؟….فاصلين اللبن من الشاي ليه؟…التعب في شنو؟.

أهو دا الشاي …ودا اللبن…اما الشاي باللبن دا …انا عاوز اشربو.

قطع ليك الشاي باللبن …ونحن نتلفت زي (تاريخ سنة تالتة).

اول تاريخ سنة تالتة بتلفت.

قلنا برضو منطق….ما في داعي لفصل الشاي من اللبن ..وقت نحن عندنا لبن (مفصول)..وشاي (قاعد براهو).

يعني فلاحة مننا.

ما في داعي للفصل…(مضيعة زمن ساكت).

واتخارجنا على كدا.

مرقنا فرحانين….الفرح عاوز يشقنا.

اسبوع كامل كنا بنحكي عن (الحاوي) الشفت دا.

مندهشين في الدنيا دي.

هسع مع (الروس) ديل ما في حاجة بتدهش.

الروس ديل اي حاجة عملوها…ديل (القمر) عندهم زي (قندهار) بمشوا ليه يوم الجمعة يتغدوا فيها ويرجعوا.

نحن هنا الواحد لو ماشي (الكلاكلة) رأسو يضرب.

يكسل ..وعينو تطلع.

نعود الي (سودانب) المريخاب..وديل يا جماعة من الليلة ولاحقا مختصر اجانب المريخ ومجنسيه.

عشان الحكاية تبقى ليكم واضحة …(ما تقعدوا تقلموا لي في ضفوركم زي الفي المعاينات).

في المريخ الان (7) اجانب ..(سودانب)..بداية من باسكال (الزول البصبغ شعرو)..ثم مالك اسحق (الزول ابو قصة)..ثم غاندي واليفيه وباسيرو وتراوري.

ثم هيثم مصطفى الذي اعتبرناه في كتابة سابقة (اجنبي) في المريخ.

المريخ الان يفاوض ويجهز لاجنبي ثامن.

يعني (8) اجانب في المريخ (سودانب).

اي ان كشف المريخ هذا العام سوف يكون تلته اجانب …تلته (سودانب) باعتبار ان الكشف يتكون من (25) لاعبا.

(8) اجانب في كشف المريخ ..يعني قرابة (ربع) الكشف.

هذا الكم الهائل من الاجانب في كشف المريخ ..سوف يفقد المريخ خاصيته وملامحه السودانية ..وسوف يشكل اجانب المريخ (تكتل) في الفريق.

يعني ناس بلة جابر وموسي الزومة وضفر ديل ح يكون كومهم براهم ..وناس باسكال وباسيرو ومالك واليفيه وتراوري وغاندي كوم براهم.

ترواري دا في الهلال مع (نفرين) عمل ليه (نقابة).

في المريخ مع (7) بعمل ليه جالية (مالية).

فريق الاهلي المصري حقق بطولاته الافريقية الاخيرة بمحترف واحد ..جلس في كل المباريات (احتياطيا) ولم يشارك إلا في بعض لحظات من عمر البطولة كلها.

الترجي التونسي عندما كان في كشفه (7) اجانب قبل سنوات كان قوة ضاربة نعم ..لكنه لم يكن يحقق بطولات قارية.

الترجي حققها بعد ان قلّص عدد المحترفين.

المريخ الان يمر بنفس الظروف ..كمية كبيرة من المحترفين الذين تشعر بأنهم يلعبون من اجل (الدولار) فقط ..يفتقدون الروح والحماس ويلعبون فقط من اجل (جيبوهم).

خاصة وان كل المحترفين في المريخ تجاوزوا الـ(30) عاما ..يعني ما عندهم اي طموح او امل في اللعب في اوروبا او الاحتراف في دوري افضل.

من اهلي شندي للمريخ.

كلها (170) كيلو متر.

هذا لا يعني ألا جدوى من المحترفين ..بل هم اضافة حقيقية اذا احسن اختيارهم.

واظن ان عدد المحترفين بما في ذلك المجنسين اذا تجاوزوا الـ(5) محترفين سوف يصبح ضررهم اكثر من نفعهم.

وقد كان الدكتور كمال شداد بعيد النظر عندما حدد وجودهم في كشوفات اي نادٍ لا يتجاوز الـ(3) محترفين.

غير ان الاندية تجاوزت هذا الخط بالتجنيس.

نتمنى حتى بعد التجنيس ألا يتجاوز العدد خمسة محترفين كأقصى عدد لهم في كشوفات النادي الواحد.

(7) محترفين اجانب في المريخ (سودانب) غير هيثم مصطفى ..مقابل محترف واحد في الهلال الان (مامادو كوليبالى) الي جانب (سيدي بيه) الذي ينتظر ان يوقع اليوم.

(7) اجانب في المريخ مقابل اثنين في الهلال حتى الان.

يجب ان يرتفع عدد الاجانب في الهلال الي خمسة محترفين ثلاثة اجانب واثنين مجنسين.

لا نريد اكثر من هذا العدد ..لكن يجب ان يكون الخمسة محترفين نجوم معروفين واسماء كبيرة ولا خلاف عليها.

سيدي بيه طبعا محترف مجرب لا خلاف عليه …وكوليبالي سيرته مبشرة باعتباره هدافا للكونفدرالية.

يبقى على مجلس الهلال ان يحسن اختيار الاسماء القادمة …(رغم ضيق الوقت).

لا بد ان تكون الاسماء القادمة للاحتراف في الهلال اسماء كبيرة على مستوى القارة الافريقية كلها.

وإلا سوف ندفع الثمن غاليا.

مجلس الهلال للاسف الشديد صرف النظر عن الليبي ربيع اللافي لاعب الطرف اليمين ..والذي كان يمكن ان يحل هذه الاشكالية …وهو لاعب جيد ومعروف على المستوى الافريقي.

الهلال قدم (150) الف دولار للاعب في الموسم الواحد …والنادي طالب بـ (250) الف دولار ..ولا احسب ان المبلغ كبير على اللاعب ..لأن اللاعب جيّد …والخانة التى يلعب فيها اللاعب يحتاجها الهلال..وهي نقطة ضعف الفريق.

السنغالي القادم ..اخشى ألا يكون في المستوى…وضيّق الفترة يجعلنا نتخوف ان يجعل المجلس يسد الفراغات بمحترفين من نوعية سنكارا وبمبا.

لا استبعد بعد هذا ان يلحق مجلس المريخ بالمحترف الليبي ربيع اللافي ويستقدمه للاحتراف في صفوفه..بعد ان مهد لهم الهلال ذلك وقدم لهم اللاعب في طبق من فضة ثم فشل في التعاقد مع اللاعب.

ليت مجلس الهلال يتدارك الموقف ..ويتعاقد مع ربيع اللافي لموسم واحدا …حتى يحلق الهلال باطراف حديدية.

نذكر مجلس الهلال ان التسجيلات باقى ليها (6) ايام.

يعني بعد دا إلا تلحقوا السوق وتسجلوا من ميدان عقرب.

ملحوظة : ومازلنا في انتظار الاخبار السعيدة.

هوامش

الدعيع وين؟.

ناس المريخ شبكونا ليك وقع اقرار.

وزكي عباس يصرح اليوم كلو.

واللاعب في قبضة الاهلي شندي.

انتوا وقت الاهلي شندي ما قادرين تنافسوا معاه …(الفصاحة ليكم شنو؟).

اها بعد كدا يا عبدالصمد ابقوا على (عبد الرحمن حمدي) ساكت.

عبد الرحمن ما كعب.

بسد الفرقة.

عليكم الله ناس الاهلي شندي ديل ما حقارين.

يشيلوا عبد الرحمن الدعيع ..ويشيلوا كمان حارس شباب المريخ.

يعني لا لميتوا في الكبير ولا في الصغير يا ناس المريخ.

الاهلي شندي كان في اول يوم في التسجيلات قد خطف من المريخ حارس الرديف عبد الرحمن.

وهسع شالوا عبد الرحمن الدعيع.

ابقوا مارقين.

ابقوا على عبد الرحمن حمدي.

برضو اسمو عبد الرحمن.

يعني ما في فرق كبير.

وكمان بقولوا ليه عبد الرحمن الصقر.

يعني مقطعها.

حارس النيل الحصاحيصا ..احتياطي لي محمد كمال.

هو محمد كمال ذاتو شن طعمو.

حارس النيل حارس قصير القامة ..واحتياطي ..وبهاء الدين افضل منه بالقوة والخبرة.

ما تسجلوا ساكت.

نحن عارفين الايام الاخيرة دي بتشتغلوا لينا بي نظرية ألحق السوق.

…..

عاجل : اقول ليكم حاجة (الاقرار) بتاع الدعيع ..سجلوا بيه محمد كمال…برضو حل.