الرئيس الذي (مرق من الليد)

أول البارح.. أعدمت الحكومة الكورية الشمالية.. عم الرئيس الكوري اسمو(جانغ سونغ ثايك).. لأنو قالو فاسد.. وبيخطط لي انقلاب على النظام.. الرئيس اسمو(جونغ اون ايل).. عمو دا ما عمو أخو أبوهو.. دا راجل عمتو.. وكان بيقول ليهو يا عمي.. وكان مستشارو.. بيشاورو في كل شيء.. قالت الحكومة الكورية انو جانغ دا بي تحت تحت داير يقلب الحكومة وبيتآمر على الحزب وعلى كوريا.. واعدموهو.. أمريكا قالت دي جريمة بشعة.. من جرائم النظام الكوري.. المحيريني أمريكا دي قدر مافي شيء في الدنيا دي مدخلة خشما فيها.. وتنضم.. وما عرفنا البيخليها تمسك خشمها عليها شنو؟.. وقوة عين.. هي عندها لسان تنضم بو؟.. داك الليلة في بكا مانديلا.. رئيسها أوباما مصورنو قبضوهو يتونس مع رئيسة وزراء الدنمارك.. ومرتو قاعدة وراهو زعلااااانة.. وتصرصر ليهو.. وبعد شوية قبل علي مرتو وقعد يتعضّر ومسك ايدها وباسها.. لكن برضو شايفها زعلانة.. غايتو رجعتهم اهلهم بتوريهو المكشّن بلا بصل.. والله انا خايف الونسة مع المرا الدنماركية دي.. يبقى لهم سبب طلاق.. وبعدين رئيسة وزراء الدنمارك زاااااتا.. ما عندها أي أدب.. البيخليها تتونس مع رجال النسوان في بيت البكا شنو؟.. جنوب أفريقيا جت موت مانديلا موجعها وداخل عليها وتردح وتبكي علي مانديلا.. وهي مقبلة علي أوباما تتونس وتتضاحك.. ومانديلا ممدد وميت.. كانت تصبر لمن يدفنو وان بقى عندها باقي ونسة مع أوباما تتمها.. علا في بيت البكا والجنازة ما شالوها هي تتونس؟. و أوباما زااااتو متغزي وسط النسوان لي شنو؟؟.. ما يمشي على الرجال.. غايتو هم الاتنين متلومين.. اتارينا ما برانا قاعدين تنونس في بيوت البكيات.. أظنها دي ثقافة عالمية (في روسيا الزول لما يموت يمددوهو يجيبو فودكا ويشربو ويسكرو ويتونسو فوقو وينضمو في الموت وفلسفة الموت، الونسة والنضم مبلوعات، علا السكر عند راس الميت دا لزومو شنو؟).. بقى عندنا الزول ممدد ميت ما دفونو تلقى اتنين يتونسو.. والنسوان بي جوا يبكن دقيقتين وبعد كدي يتفرغن لي بعضن.. غايتو البيموت الزمن دا يعد نفسو فطيسة.. الموت زمان، زمن الزمن زين.. نقارة سبعة يوم.. وصحن مليان رماد في نص الحوش.. واي مرا تجي تشيل وتكب فوق راسا.. وتردح.. ومناحة ويقولو في الميت نضم ما كان فيهو “سناد الضعفان.. ديوانو فاتح للضيفان”.. وهو يكون ديوان ما عندو، أوضة واااحدة وقدامها راكوبة وفي الركن الشمالي الشرقي من الراكوبة زير مغوزو في الواطا…. لكن حسي بنات الميت.. يجن صاحباتن يبوسنهن في جضومن “سوري.. سوري.. يا ريري.. عمو مات؟.. اوه ماي قارد.. والله تو ايرلي.. والله نفسي أبكي أبكي شديد.. بس الميك أب”.. وبنتو تعذرها وتقول ليها “عارفاااااكي يا ننو ما بتقصري”.. أرجع لأمريكا ودخيّل خشمها في الناس.. واقول لها كدي باللوال قبال ما تجيهي الناس الغرباء، شوفي رئيسك المرق من الليد دا.. وقاعد يتونس ويضاحك مع النسوان في بيت البكا!!