نان السوداني مالو؟.. كعب؟

تتعامل دول النفط.. التي تحتاج إلى عمالة أجنبية.. تتعامل مع هذه العمالة حسب المنطقة الجاية منها من حيث الرواتب.. أحيانا أحس انو معاها حق.. وأحيان كتيرة لا.. يعني طبيب جاي من بريطانيا.. ياخد مرتب عشرة أطباء من السودان.. شرطا أن يكون الطبيب البريطاني دا بريطاني صح صح.. ما يكون ما خد الجنسية هناك.. يعني ابيض وشعرو سبيبي.. وعيونو خدر.. وحتى إن كان أسود أن تكون أصوله ما من دولة عربية و بينضم عربي.. ما يكون أزرق شعرو قرقدي راسو كبير كرعينو رقاق.. أذكر في إحدى الجامعات الخليجية في كلية البيطرة كان هناك راعي نيوزيلندي جايبنو لغنم الكلية وحيوانات الكلية.. كان مرتب هذا الراعي يضاهي مرتب استاذ جامعي من السودان.. وبي حساب يوم الليلة مرتبه يساوي مرتب خمسين راعي سوداني.. مع انهم الاتنين رعاة.. لكن الفرق داك من نيوزيلندا ودا من عد الغنم.. وداك بيلبس جنز وكسكتة ودا بيلبس عراقي وسرول وطويقية في نص الراس.. والراعي النيوزيلندي لما يكورك للخروف يقيف ويكورك ليهو براحة يقول ليهو” كموووون.. بيبي”.. ولما يصلو الخروف يمسح علي ضهرو ويقول ليهو “أوكي.. قوود بوي.. قوود بوي”.. أما زولنا نحن.. يكورك ليهو ولو ما جاهو برطع برطع برطع يتساككو هو والخروف يوم كامل ويكون جاري ويكورك لي للخروف “اقيف.. اقيف.. تقيف فيك الحاجة التحيجك”.. ولما يقبضو يرصعو في بطنو ويمسكو يشنقلو علي ضهرو في الواطا ويكون عاضي ليهو حبل في خشمو.. يربط بيهو الخروف في كراعو لمن كراع الخروف تدور تتقطع.. الفرق هنا واضح في التعامل.. واحساس انو الخروف زيو واااااحد مافي فرق.. راعينا ممكن يبرطع ورا شافعو زي ما بيبرطع ورا الخروف.. وعادي جدا لو مشيت البادية تلقي المساككة واقعة قرف.. لو ما واحد ساكي ليهو خروف واللا نعجة يكون ساكي شافعو.. وتطبيق الحديث الشريف حرفياً “كلكم راع وكلكم مسؤول عن رعيته” والرعية ياها الرعية في المساككة كان خروف واللا كان شافع.. والشفع لو ما لقو شي يسوها يقعدو يلعبو سك سك، استعدادا للمستقبل!
هاجر إلى أمريكا في بداية التمانينات اكمل دراسته في تخصص نادر نال الجنسية الامريكية.. لكنه ما زال محتفظ بسودانيته.. أخلاقا وسلوكا وفخرا، تعاقد للعمل في إحدى دول الخليج بمبلغ وقدره خمسون ألف ريال في الشهر.. بصفته خبير أمريكي وصوهو أصحابو.. لما تمشي هناك أوعك تتكلم عربي.. لو عرفو انك عربي مرتبك ح ينقص، وصل الي موقع العمل في الخليج.. عمل بالوصية شبكهم انقليسي.. زي الزفت، مدير الشركة شكّ فيه.. حاول يستفزو قال ليهو بالعربي “والله شكلك وها الخليقة، خليقة سوداني” أخونا شالتو الهاشمية وختتو الجعلية وقال ليهو بطول حسو “نان السوداني مالو ؟.. كعب؟”
ثم صدر امر بتخفيض مرتبو من خمسين الف الي خمسة الالاف..
غايتو لو كان قال ليهو “عان دا.. نان السوداني مالو؟ كعب؟” كان مرتبو خفضوهو ليهو لي الفين.. .. جملة “عان دا” براها بي (ماينص) تلاتة ألف!!